ଦୁଇ ଦିନର ବନ୍ଦ ପରେ ପୁରୀରେ ପୁଣି ଆଜିଠାରୁ ଉଚ୍ଛେଦ : ବଡଆଖଡା ମଠରେ ଚାଲିବ ଡ୍ରୋଜର, ମାଜିଷ୍ଟ୍ରେଟଙ୍କ ସହ ଜଗିବେ ୨୫ ପ୍ଲାଟୁନ ଫୋର୍ସ
କନକ ବ୍ୟୁରୋ : ଦୁଇ ଦିନ ବନ୍ଦ ରହିବା ପରେ ଆଜି ପୁଣି ଆରମ୍ଭ ହେବ ପୁରୀରେ ଉଚ୍ଛେଦ ପ୍ରକିୟା । ଏମାର ମଠର ବିବାଦୀୟ ଜାଗାକୁ ବାଦ୍ ଦେଇ ଆଜିଠାରୁ ବଡ଼ଆଖଡ଼ା ମଠକୁ ଭାଙ୍ଗିବାକୁ ପ୍ରଶାସନ ନିଷ୍ପତ୍ତି ନେଇଛି । ଏମାର ମଠ ଜାଗାରେ ଥିବା ବଣିଆପଟିର ବଳକା ଦୋକାନ ଘର ସହ ଖଜାପଟିର କିଛି ଦୋକାନ ବି ଭଙ୍ଗାଯିବାକୁ ନିଷ୍ପତ୍ତି ହୋଇଛି । ଏ ନେଇ ପ୍ରସ୍ତୁତି ଶେଷ ହୋଇଥିବା ଜିଲ୍ଲାପାଳ ବଲୱନ୍ତ ସିଂହ କହିଛନ୍ତି । ଆବଶ୍ୟକ ହାଇଡ୍ରା, ଜେସିବି, ଡ୍ରିଲର୍ ମେସିନକୁ ପ୍ରସ୍ତୁତ ରଖାଯାଇଛି । ଆଇନଶୃଙ୍ଖଳା ଦୃଷ୍ଟିରୁ ଏକାଧିକ ମାଜିଷ୍ଟ୍ରେଟ୍ଙ୍କ ସହ ପ୍ରାୟ ୨୫ ପ୍ଲାଟୁନ୍ ଫୋର୍ସଙ୍କୁ ମୁତୟନ କରାଯାଇଛି।
Kanak News is now on WhatsApp
Join and get latest news updates delivered to you via WhatsApp
ଅନ୍ୟପଟେ ଆଜିଠାରୁ ପ୍ରଶାସନ ତରଫରୁ ଅସ୍ଥାୟୀ ଥଇଥାନ ବ୍ୟବସ୍ଥା ଆରମ୍ଭ ହୋଇଛି । ଜଗନ୍ନାଥ ବଲ୍ଲଭରେ ଖାଲିଥିବା ଦୋକାନ ଘର ଓ ଅନ୍ୟାନ୍ୟ ଜାଗାରେ ବଣିଆପଟି, ଲୁଗାପଟି, କଂସାପଟି ସହ ଅନ୍ୟାନ୍ୟ ଦୋକାନୀମାନଙ୍କୁ ଥଇଥାନ କରାଯିବାର ବ୍ୟବସ୍ଥା ହୋଇଛି । ତେବେ ଏମାର ମଠ ମହନ୍ତଙ୍କୁ ଖାଲି କରିବାକୁ ବିଫଳ ହୋଇଛି ପ୍ରଶାସନ । ମହନ୍ତ ନିଜ ଜିଦ୍ରେ ଅଟଳ ରହିଥିବାରୁ ଏମାର ମଠ ଉଚ୍ଛେଦ କାମ ଅଧାରେ ଅଟକିଛି । ପୁରାତନ ବଡ଼ଆଖଡ଼ା ମଠରେ ପୂର୍ବରୁ ଏସିଆର ସବୁଠୁ ବଡ଼ ସିଂହଦ୍ବାର ଥାନା ବର୍ଷ ବର୍ଷ ଧରି ଚାଲି ଆସୁଥିଲା ।
ସେହିଭଳି ଲୁଗାପଟିରେ ୧୦ରୁ ଅଧିକ ଲୁଗା ଦୋକାନ ସହ ପୂଜା ସାମଗ୍ରୀ ଓ ଅନ୍ୟାନ୍ୟ ଦୋକାନ ବି ରହିଥିଲା । ଏମାର ମଠ ଭାଙ୍ଗିବା ସମୟରେ ସିଂହଦ୍ବାର ଥାନାକୁ ବାଗେଡ଼ିଆ ମଠକୁ ଅସ୍ଥାୟୀ ଭାବେ ସ୍ଥାନାନ୍ତର କରାଯାଇଛି । କିନ୍ତୁ ଲୁଗାପଟି ଓ ଅନ୍ୟାନ୍ୟ ଦୋକାନୀମାନେ ଦୋକାନ ଘର ଖାଲି କରିନଥିବାରୁ ଗତ ଅଗଷ୍ଟ ୩୧ ସଂଧ୍ୟା ସୁଦ୍ଧା ଦୋକାନ ଘର ଖାଲି କରିବାକୁ ପ୍ରଶାସନ ନିର୍ଦେଶ ଦେଇଥିଲା । ଏହି ନିର୍ଦେଶ ପରେ ଦୁଇ ମହଲା ବିଶିଷ୍ଟ ବଡ଼ଆଖଡ଼ା ମଠ ଖାଲି ହୋଇଯାଇଛି । ସ୍ନାନମଣ୍ଡପ ସମ୍ମୁଖ ଲଙ୍ଗୁଳି ମଠକୁ ଲାଗି ରହିଥିବା ଏହି ମଠକୁ ମାଟିରେ ମିଶାଇବା ପ୍ରକ୍ରିୟା ଆରମ୍ଭ ହୋଇଛି । ଏ ଦୃଷ୍ଟିରୁ ଆଜି ରାତିରୁ ସୁରକ୍ଷାକୁ କଡ଼ାକଡ଼ି କରାଯାଇଛି । ଆଜି ସକାଳୁ ବଡ଼ଆଖଡ଼ା ମଠ ଭଙ୍ଗା କାର୍ଯ୍ୟ ଆରମ୍ଭ ହେବ ।
ଶ୍ରୀମନ୍ଦିର ସୁରକ୍ଷା ପାଇଁ ମେଘନାଦ ପାଚେରୀରୁ ୭୫ ମିଟର ଉଚ୍ଛେଦ ହୋଇଥିବା ମଠ, ଦୋକାନ, ଲଜ୍ ଏବଂ ଘର ପାଇଁ ସ୍ୱତନ୍ତ୍ର ଥଇଥାନ ଓ ପୁନର୍ବାସ ନୀତି ଘୋଷଣା କରିଛନ୍ତି ରାଜ୍ୟ ସରକାର । ପ୍ରଥମେ ବ୍ୟାପକ ଉଚ୍ଛେଦ କରିବା ପରେ ଏବେ ଥଇଥାନ ପାଇଁ ବ୍ୟବସ୍ଥା ହୋଇଛି । ଯେଉଁଥିରେ ବାସହୀନଙ୍କୁ ଘର, ଏବଂ ଦୋକାନୀଙ୍କୁ ଦୋକାନ ଯୋଗାଇ ଦିଆଯିବ । ସୁରକ୍ଷା ଜୋନ୍ରେ ଥିବା ଲଜ୍ ଗୁଡିକୁ ମଧ୍ୟ କ୍ଷତିପୂରଣ ସହାୟତା ମିଳିବ । ଉଚ୍ଛେଦ ବେଳେ କ୍ଷତିଗ୍ରସ୍ତ ହେଉଥିବା ଐତିହାସିକ ମଠର କୀର୍ତୀରାଜିର ସଂରକ୍ଷଣ କରାଯିବ ବୋଲି ସରକାର ପ୍ରତିଶ୍ରୁତି ଦେଇଛନ୍ତି ।