ନିର୍ବାଚନ ରଣନୀତିକାର ପ୍ରଶାନ୍ତ କିଶୋର ଗଢ଼ିପାରନ୍ତି ନୂଆ ଦଳ: ପିକେଙ୍କ ଟ୍ୱିଟକୁ ନେଇ ଚର୍ଚ୍ଚା
କନକ ବ୍ୟୁରୋ: ନିର୍ବାଚନ ରଣନୀତିକାର ପ୍ରଶାନ୍ତ କିଶୋରଙ୍କୁ ନେଇ ରାଜନୀତି ଗଳିରେ ଆଜିକାଲି ବେଶ ଚର୍ଚ୍ଚା ଚାଲିଛି । ଗତ ସପ୍ତାହରେ କଂଗ୍ରେସର ବଡ ଅଫରକୁ ପ୍ରତ୍ୟାଖାନ କରି ପିକେ ଖବରର ଶିରୋନାମା ପାଲଟିଥିଲେ । ଏବେ ପୁଣି ତାଙ୍କୁ ନେଇ ନୂଆ ଖବର ସାମ୍ନାକୁ ଆସୁଛି । ସୋମବାର ସକାଳୁ ପ୍ରଶାନ୍ତଙ୍କ ଏକ ଟୁଇଟ ଦିନ ତମାମ ଚର୍ଚ୍ଚା ବିଷୟ ପାଲଟିଛି । ରାଜନୀତିର ପ୍ରଚ୍ଛଦପଟ ନାୟକ ପ୍ରଶାନ୍ତ ଆଗକୁ କୌଣସି ଦଳ ପାଇଁ ପରାର୍ମଶଦାତା ନହୋଇ ହୁଏତ ନିଜର ଦଳ ଗଠନ କରିପାରନ୍ତି । ନିର୍ବାଚନ ରଣନୀତିକାର ପିକେ ଟୁଇଟ କରି ଯେଉଁ କଥା ଲେଖିଛନ୍ତି ସେଥିରୁ ଗୋଟେ କଥା ନିଶ୍ଚିତ କି ଖୁବ କମ ଦିନ ଭିତରେ କୌଣସି ବଡ ଘୋଷଣା କରିପାରନ୍ତି ।
Kanak News is now on WhatsApp
Join and get latest news updates delivered to you via WhatsApp
କଂଗ୍ରେସ ସହ ଫାଟ ଦେଖାଯିବା ପରେ ଏବେ ନିଜ ନୂଆ ମିଶନ ମୁହାଁ ନିର୍ବାଚନୀ ରଣନୀତିକାର ପ୍ରଶାନ୍ତ କିଶୋର । ମନ ନ ମିଶିବାରୁ କଂଗ୍ରେସର ହାତ ଛାଡିଥିବା ପିକେ ଏବେ ପ୍ରତ୍ୟକ୍ଷ ରାଜନୀତିରେ ପାଦ ଦେବାକୁ ଯୋଜନା କରୁଛନ୍ତି । ସୋମବାର ସକାଳୁ ତାଙ୍କର ଗୋଟେ ଟୁଇଟ ଏହି ନୂଆ ସଙ୍କେତ ଦେଇଛି । ଟୁଇଟରୁ ଅନୁମାନ କରାଯାଉଛି ଯେ ପ୍ରଶାନ୍ତ ଖୁବ ଶିଘ୍ର ନୂଆ ରାଜନୈତିକ ଦଳ ଗଠନ କରି ପାରନ୍ତି । ଟୁଇଟରେ ପ୍ରଶାନ୍ତ ଲେଖିଛନ୍ତି
ଗଣତନ୍ତ୍ର ସହ ଏବେ ସିଧାସଳଖ ସାମିଲ ହେବା ଏବଂ ଲୋକଙ୍କ ପାଇଁ କାର୍ଯ୍ୟନୀତି ପ୍ରସ୍ତୁତ କରିବାର ସମୟ ଆସିଛି । ପ୍ରକୃତ ମାଲିକ ହୋଇ ଜନତାଙ୍କ ନିକଟରେ ପହଁଚି ସେମାନଙ୍କ ସମସ୍ୟା ବୁଝିବା ପାଇଁ ସମୟ ଆସିଛି । ଏହି ନୂଆ ଯାତ୍ରା ବିହାରରରୁ ଆରମ୍ଭ ହେବ । ବିହାରରୁ ଆରମ୍ଭ ହେବାକୁ ଥିବା ପ୍ରଶାନ୍ତଙ୍କ ଏହି ନୂଆ ଅଭିଯାନର ନାଁ ରହିିଛି ଜନ ସୁରାଜ ଅର୍ଥାତ ଲୋକଙ୍କ ପାଇଁ ସୁଶାସନ ।
କଂଗ୍ରେସ ସହ ସର୍ମ୍ପକ ତୁଟିବା ପରେ ଆଗକୁ ପ୍ରଶାନ୍ତଙ୍କ ଯୋଜନା କଣ ରହିବ? ତାଙ୍କର ରାଜନୈତିକ ଭବିଷ୍ୟତ କେଉଁ ଦିଗକୁ ଯିବ ଏନେଇ କଳ୍ପନା ଲାଗି ରହିଥିଲା । ବର୍ତମାନ ତାଙ୍କର ଏହି ଟୁଇଟ ଏହି ସସପେନ୍ସ ଉପରୁ ପର୍ଦ୍ଦା ଉଠାଇ ତାଙ୍କ ଆଗାମୀ ଯୋଜନା ସମ୍ବନ୍ଧରେ ସଙ୍କେତ ଦେଉଛନ୍ତିି ପିକେ । ଯଦିଓ ପିକେ ରାଜନୈତିକ ଦଳ ଗଠନ କରିବା ନେଇ ସିଧାସଳଖ ଘୋଷଣା କରିନାହାଁନ୍ତି କିନ୍ତୁ ଏହି ଟୁଇଟ ତାଙ୍କର ନୂଆ ରଜନୈତିକ ଯୋଜନାର ଆଭାସ ଦେଉଛି ।
ବିହାର ରାଜନୀତିକୁ ନେଇ ପ୍ରଶାନ୍ତଙ୍କ କାଫି ଅଭିଜ୍ଞତା ରହିଛି । ୨୦୨୦ ବିଧାନସଭା ନିର୍ବାଚନ ହେଉ କିମ୍ବା ଜେଡିୟୁ ପାଇଁ ରଣନୀତି ପ୍ରସ୍ତୁତି । ବିହାର ରାଜନୈତିକ ସ୍ଥିତିକୁ ନେଇ ବେଶ ଭଲଭାବେ ପିକେ ଅବଗତ ତେଣୁ ନୂଆ ଦଳ ଗଢି ବିହାରରେ କିଭଳି ନିଜର ସ୍ଥିତି ମଜବୁତ କରିବେ ସେ ଦିଗରେ ପିକେଙ୍କୁ ତାଙ୍କର ଏହି ପୂର୍ବ ଅଭିଜ୍ଞତା ସହାୟକ ହୋଇପାରେ ।
ବର୍ତମାନ ପିକେ ବିହାରଗସ୍ତରେ ଅଛନ୍ତି ଓ ବିଭିନ୍ନ ଜିଲ୍ଲା ବୁଲି ବୁଲି ଜନସଭା କରୁଛନ୍ତି । ବିହାର ମୁଖ୍ୟମନ୍ତ୍ରୀ ନିତିଶ କୁମାରଙ୍କୁ ଭେଟିବା କାର୍ଯ୍ୟକ୍ରମ ମଧ୍ୟ ରହିଛି । କହିବାକୁ ଗଲେ ୨୦୨୪ ସାଧାରଣ ନିର୍ବାଚନ ପାଇଁ ପିକେ ହୁଏତ ନିଜର ପ୍ରସ୍ତୁତି ଆରମ୍ଭ କରିସାରିଲେଣି ।
ଆଗକୁ ପିକେଙ୍କ ରାଜନୀତୀ ରଣନୀତି କଣ ରହିବ ସେ ବାବଦରେ ମେ ୪ ତାରିଖରେ ହେବାକୁ ଥିବା ସାମ୍ବାଦିକ ସମ୍ମୀଳନୀରେ ଜଣାପଡିପାରେ । ହୁଏତ ଏହି ଦିନ ପିକେ କିଛି ବଡ ଘୋଷଣା କରିପାରନ୍ତି । ତେବେ ଯାହା ବି ହେଉ ବିହାର ମାଟିରେ ପ୍ରଶାନ୍ତଙ୍କ ନୂଆ ଯୋଜନା କେତେଦୁର ସଫଳ ହେଉଛି ସେକଥା ଆଗାମୀ ଦିନରେ ଜଣାପଡିବ ।