କନକ ବ୍ୟୁରୋ : ଦୁଇଦୁଇଥର ବୈଠକ ବିଫଳ ହେବା ପରେ ଏବେ ପୁଣି ଫେବୃଆରୀ ୧୬ ତାରିଖରେ ଦିଲ୍ଲୀ ନଗର ନିଗମର ମେୟର, ଡେପୁଟୀ ମେୟର ଓ ଷ୍ଟାଣ୍ଡିଂ କମିଟିର ୬ ସଦସ୍ୟଙ୍କ ପାଇଁ ନିର୍ବାଚନ ହେବ । ଏନେଇ ଦିଲ୍ଲୀ ନଗର ନିଗମର ବୈଠକ ୧୬ ତାରିଖକୁ ସ୍ଥିର କରାଯାଇଛି । ଅଧିକାରୀଙ୍କ ସୂଚନା ମୁତାବକ ଦିଲ୍ଲୀ ଉପରାଜ୍ୟପାଳ ଆଜି ସକାଳେ ମୁଖ୍ୟମନ୍ତ୍ରୀ କେଜ୍ରିୱାଲ ମେୟର ନିର୍ବାଚନ କରିବାକୁ ପଠାଇଥିବା ପ୍ରସ୍ତାବକୁ ସ୍ୱୀକାର କରିଛନ୍ତି । ବିଜେପି ଓ ଆମ୍ ଆଦମୀ ପାର୍ଟି ସଦସ୍ୟଙ୍କ ମଧ୍ୟରେ ହଟ୍ଟଗୋଳ ପାଇଁ ଏହି ନିର୍ବାଚନ ୩ଥର ସ୍ଥଗିତ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ଉପ ରାଜ୍ୟପାଳଙ୍କ ଦ୍ୱାରା ମନୋନୀତ ୧୦ଜଣ ସଦସ୍ୟଙ୍କୁ ଭୋଟ ଦେବାକୁ ଅନୁମତି ମିଳିବା ପରେ ଆମ୍ ଆଦମୀ ପାର୍ଟି ସଦସ୍ୟ ଏହାକୁ ଘୋର ବିରୋଧ କରିଥିଲେ । ଫଳରେ ନିଗମ ବୈଠକକୁ ରଦ୍ଦ କରାଯାଇଥିଲା । ସେପଟେ ନଗର ନିଗମର ନିୟମ ମୁତାବକ ମନୋନୀତ ସଦସ୍ୟମାନେ ଉଚ୍ଚ ସଦନର ବୈଠକରେ ମତଦାନ କରିପାରିବେ ନାହିଁ ।
ଆପ୍ ସଦସ୍ୟମାନେ ଅଭିଯୋଗ କରିଛନ୍ତି କି ବିଜେପି ଉପ ରାଜ୍ୟପାଳଙ୍କୁ ହାତ କରି କୌଣସି ପରିସ୍ଥିତିରେ ଦିଲ୍ଲୀ ନଗରନିଗମର ମେୟର ପଦ ଦଖଲ କରିବାକୁ ଚାହୁଁଛି । ସୂଚନା ଥାଉକି ଦିଲ୍ଲୀ ଏମସିଡି ନିର୍ବାଚନରେ ଆମ୍ ଆଦମୀ ପାର୍ଟିକୁ ବହୁମତ ମିଳିଛି । ଡିସେମ୍ବରରେ ହୋଇଥିବା ଏମସିଡି ନିର୍ବାଚନରେ ମୋଟ ୨୫୦ ଆସନରୁ ଆପ୍ କୁ ୧୩୪ଟି ଆସନ ମିଳିଥିବା ବେଳେ ବିଜେପିକୁ ୧୦୪ ଆସନ ମିଳିଥିଲା ।