ସୋନିଆଙ୍କୁ ଦ୍ରୌପଦୀ ଏବଂ ମୋଦୀଙ୍କୁ ଭୋଟ ଭିକ୍ଷା କଲେ ଯଶୱନ୍ତ । ଝାଡ଼ଖଣ୍ଡ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କ ଉପରେ ସମସ୍ତଙ୍କ ନଜର । କାହାକୁ ସମର୍ଥନ ଦେବ ଜେଏମଏମ୍?
କନକ ବ୍ୟୁରୋ: ସୋନିଆଙ୍କୁ ଦ୍ରୌପଦୀ ଏବଂ ମୋଦୀଙ୍କୁ ଭୋଟ ଭିକ୍ଷା କଲେ ଯଶୱନ୍ତ । ରାଷ୍ଟ୍ରପତି ପଦ ପାଇଁ ସମର୍ଥନ ଗୋଟାଇବାରେ ଲାଗିଛନ୍ତି ଦ୍ରୌପଦୀ ମୁର୍ମୁ ଓ ଯଶୱନ୍ତ ସିହ୍ନା । ରାଷ୍ଟ୍ରପତି ନିର୍ବାଚନରେ ତାଙ୍କ ସପକ୍ଷରେ ଭୋଟ୍ ଦେବା ପାଇଁ କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀ, ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀ ଓ ଏନସିପି ମୁଖ୍ୟ ଶରଦ ପାୱାରଙ୍କ ସହ କଥା ହୋଇଛନ୍ତି ଦ୍ରୌପଦୀ । ସେପଟେ ଦ୍ରୌପଦୀଙ୍କୁ ପ୍ରାର୍ଥୀ କରି ଏନଡିଏ ଯେଉଁ ମାଷ୍ଟର ଷ୍ଟ୍ରୋକ ଖେଳିଥିଲା ସେଥିରେ ଦଳ ବେଶ ସଫଳ ହୋଇଥିବା ଦେଖିବାକୁ ମିଳୁଛି । କାରଣ ବିରୋଧୀ ଶିବିରରୁ ଗୋଟିଏ ପରେ ଗୋଟିଏ ଦଳ ଏହି ଆଦିବାସୀ ନେତ୍ରୀଙ୍କୁ ସମର୍ଥନ ଜଣାଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଦ୍ରୌପଦୀ ମୁର୍ମୁଙ୍କୁ ରାଷ୍ଟ୍ରପତି ପ୍ରାର୍ଥୀ କରି ବିଜେପି ଯେଉଁ ମାଷ୍ଟର ଷ୍ଟ୍ରୋକ ଖେଳିଥିଲା, ସେଥିରେ ସଫଳ ହୋଇଛି ଦଳ । ରାଷ୍ଟ୍ରପତି ନିର୍ବାଚନକୁ ନେଇ ବିରୋଧୀ ଦଳ ଭାଗ ଭାଗ ହୋଇ ଯାଇଛନ୍ତି । କାରଣ ଦ୍ରୌପଦୀ ଜଣେ ଆଦିବାସୀ ଓ ମହିଳା ନେତ୍ରୀ ହୋଇଥିବାରୁ ଆଦର୍ଶ ଦୃଷ୍ଟିରୁ ଏନଡିଏ ବାହାରେ ଥିବା ଗୋଟିଏ ପରେ ଗୋଟିଏ ଦଳ ସମର୍ଥନ ଘୋଷଣା କରିଛନ୍ତି । ବହୁଜନ ସମାଜବାଦୀ ପାର୍ଟିର ସୁପ୍ରିମୋ ମାୟାବତୀ କହିଛନ୍ତି, ଜଣେ ଆଦିବାସୀ ନେତ୍ରୀ ରାଷ୍ଟ୍ରପତି ହୁଅନ୍ତୁ ବୋଲି ତାଙ୍କ ଦଳ ଚାହୁଁଛି ।
ଏନଡିଏ ପ୍ରାର୍ଥୀ ଦ୍ରୌପଦୀ ମୁର୍ମୁଙ୍କୁ ସମର୍ଥନ ତାଲିକା ବଢ଼ି ବଢ଼ି ଚାଲିଛି । ଦ୍ରୌପଦୀଙ୍କ ପ୍ରାର୍ôଥତ୍ୱକୁ ବିଜେଡି, ଜେଡିୟୁ, ୱାଇଏସଆର କଂଗ୍ରେସ ଓ ବିଏସପି ସମର୍ଥନ ଘୋଷଣା କରିଛନ୍ତି । ସେପଟେ ଯଶୱନ୍ତ ସିହ୍ନାଙ୍କୁ କଂଗ୍ରେସ, ତୃଣମୂଳ କଂଗ୍ରେସ, ବାମଦଳ, ଏନସିପି, ଶିବସେନା ଓ ସମାଜବାଦୀ ପାର୍ଟି ସମର୍ଥନ ଦେଉଛନ୍ତି । ତେବେ କେଜ୍ରିୱାଲଙ୍କ ଆମ ଆଦମୀ ପାର୍ଟି କାହାକୁ ସମର୍ଥନ ଦେବ ଏପର୍ଯନ୍ତ ଘୋଷଣା କରିନାହିଁ ।
- ସୋନିଆ, ମମତାଙ୍କ ସମର୍ଥନ ଲୋଡ଼ିଲେ ଦ୍ରୌପଦୀ
- ମୋଦୀ ଓ ରାଜନାଥଙ୍କୁ ସମର୍ଥନ ମାଗିଲେ ଯଶୱନ୍ତ
ରାଷ୍ଟ୍ରପତି ପଦ ପାଇଁ ସମର୍ଥନ ଗୋଟାଇବାକୁ ଲାଗି ପଡ଼ିଛନ୍ତି ଉଭୟ ଦ୍ରୌପଦୀ ମୁର୍ମୁ ଓ ଯଶୱନ୍ତ ସିହ୍ନା । କଂଗ୍ରେସର ଅଧ୍ୟକ୍ଷା ସୋନିଆ ଗାନ୍ଧୀ, ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀ ଏବଂ ଏନସିପି ମୁଖ୍ୟ ଶରଦ ପାୱାରଙ୍କ ସହ କଥା ହୋଇଛନ୍ତି ଦ୍ରୌପଦୀ ମୁର୍ମୁ । ସେହିପରି ମିଳିତ ବିରୋଧୀ ପ୍ରାର୍ଥୀ ଯଶୱନ୍ତ ସିହ୍ନା, ପ୍ରଧାନମନ୍ତ୍ରୀ, ପ୍ରତିରକ୍ଷା ମନ୍ତ୍ରୀଙ୍କୁ ଫୋନ୍ କରି ନିର୍ବାଚନରେ ତାଙ୍କୁ ସମର୍ଥନ କରିବାକୁ ନିବେଦନ କରିଛନ୍ତି । ଝାଡଖଣ୍ଡ ମୁକ୍ତି ମୋର୍ଚ୍ଚା ଶୀର୍ଷ ନେତା ତଥା ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କୁ ଫୋନ୍ କରି ଯଶୱନ୍ତ ବିରୋଧୀ ଦଳର ଏକତା କଥା କହି ଭୋଟ୍ ଅପିଲ୍ କରିଛନ୍ତି ।
ତେବେ ଏହି ନିର୍ବାଚନରେ ଝାଡ଼ଖଣ୍ଡ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କ ଉପରେ ସମସ୍ତଙ୍କ ନଜର ରହିଛି । କାରଣ ଦ୍ରୌପଦୀ, ଝାଡଖଣ୍ଡର ପୂର୍ବତନ ରାଜ୍ୟପାଳ ସହିତ ଜଣେ ଆଦିବାସୀ ନେତ୍ରୀ । ଦୁଇ ନେତାଙ୍କ ମଧ୍ୟରେ ଘନିଷ୍ଠ ପାରିବାରିକ ସଂପର୍କ ରହିଥିବା କୁହାଯାଉଛି । ତେଣୁ ଦ୍ରୌପଦୀଙ୍କୁ ଜେଏମଏମ ସମର୍ଥନ ଦେବା ସମ୍ଭାବନା ଅଧିକ ବୋଲି ଚର୍ଚ୍ଚା ହେଉଛି ।
ସେପଟେ ଚଳଚ୍ଚିତ୍ର ନିର୍ମାତା ରାମ ଗୋପାଳ ବର୍ମା ରାଷ୍ଟ୍ରପତି ପ୍ରାର୍ଥୀ ଦ୍ରୌପଦୀ ମୁର୍ମୁଙ୍କୁ ନେଇ ବିବାଦୀୟ ଟିପ୍ପଣୀ ଦେବା ପରେ ତାଙ୍କ ବିରୋଧରେ ତେଲେଙ୍ଗାନାର ବରିଷ୍ଠ ବିଜେପି ନେତା ଜି ନାରାୟଣ ରେଡ୍ଡି ଏତଲା ଦେଇଛନ୍ତି । ଟ୍ୱିଟରରେ ରାଷ୍ଟ୍ରପତି ପ୍ରାର୍ଥୀଙ୍କୁ ନେଇ ଆପତ୍ତିଜନକ ବୟାନ ପୋଷ୍ଟ୍ କରିଥିଲେ । ଏସସି/ଏସଟି ଆଇନ ଆଧାରରେ ମାମଲା ରୁଜୁ କରି କାର୍ଯ୍ୟାନୁଷ୍ଠାନ ଆରମ୍ଭ କରିବାକୁ ବିଜେପି ଦାବି କରିଛି । ଏହା ବିରୋଧରେ ଅପରାଧିକ ମାମଲା ରୁଜୁ ହେବ ବୋଲି କହିଛି ହାଇଦ୍ରାବାଦ ପୁଲିସ । ବିବାଦ ବଢ଼ିବା ପରେ ରାମ ଗୋପାଳ ବର୍ମା ତାଙ୍କ ସଫେଇରେ କହିଛନ୍ତି ଯେ, ମହାଭାରତରେ ଦ୍ରୌପଦୀ ଚରିତ୍ରକୁ ସେ ଅଧିକ ପସନ୍ଦ କରନ୍ତି । କୌଣସି ଖରାପ ଉଦ୍ଦେଶ୍ୟରେ ସେ ଏହି ଟ୍ୱିଟ କରିନଥିଲେ ବୋଲି କହିଛନ୍ତି ।