କନକ ବ୍ୟୁରୋ: ବରଗଡ ଜିଲ୍ଳା ବରପାଲି ବ୍ଳକ ଅନ୍ତର୍ଗତ କୁମ୍ଭାରୀ ଗ୍ରାମର ଯୁବ ଚାଷୀ ଜଟାଧାରୀ ପ୍ରଧାନ ଏବେ ବିଦେଶୀ ଫଳ ଡ୍ରାଗନ ଫ୍ରୁଟ ଚାଷକରି ଚର୍ଚ୍ଚାରେ ରହିଛନ୍ତି । ୟୁଟ୍ୟୁବ ମାଧ୍ୟମରେ ଦେଖି ଏବଂ କିଛି ନୂଆ କରିବାର ଲକ୍ଷ ନେଇ ସେ ଏହି ଚାଷ ପ୍ରତି ଆଗ୍ରହ ପ୍ରକାଶ କରିଥିଲେ ତାହା ଏବେ ବେଶ ଲାଭପ୍ରଦ ହୋଇଛି ଜଟାଧାରୀଙ୍କ ପାଇଁ । ପ୍ରଥମେ ସେ ଧାନ ଚାଷ କରି ପରିବାର ପୋଷଣ କରୁଥିଲେ ,ଏବେ ସେ ୨୦ ଡିସିମିଲ ଭାଗ ଜମିରେ ଏହି ଚାଷ କରି ବେଶ ଲାଭବାନ ହୋଇଛନ୍ତି । ଏପରିକି ଏହି ବିଦେଶୀ ଫଳରେ ଔଷଧିୟ ଗୁଣ ଭରପୁର ଥିବାରୁ ମାର୍କେଟରେ ଏହାର ଚାହିଦା ବଢିବାରେ ଲାଗିଛି ଏବଂ ଅନ୍ୟ ଚାଷୀ ମଧ୍ୟ ଏପରି ଚାଷ ପାଇଁ ଆଗ୍ରହ ପ୍ରକାଶ କରୁଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଧାଡି ଧାଡି ହୋଇ ରହିଛି କଣ୍ଟା ପରି ଦିଶୁଥିବା ଗଛ ଆଉ ଗଛରେ ଲାଲ ଲାଲ ହୋଇ ଫଳିଛି ବିଦେଶୀ ଫଳ ଡ୍ରାଗନ ଫ୍ରୁଟ । ଆଉ ଏହି ଡ୍ରାଗନ ଫ୍ରୁଟ ଚାଷ କରି ସଫଳ ହୋଇଛନ୍ତି ବରଗଡ ବରପାଲି ବ୍ଳକ କୁମ୍ଭାରୀ ଗ୍ରାମର ଯୁବ ଚାଷୀ ଜଟାଧାରୀ ପ୍ରଧାନ । ମାତ୍ର ଦଶମ ଶ୍ରେଣୀ ପର୍ଯ୍ୟନ୍ତ ପାଠ ପଢିଥିବା ଜଟାଧାରୀ ୟୁଟ୍ୟୁବ ମାଧ୍ୟମରେ ଚାଷ କାର୍ଯ୍ୟର ପ୍ରଣାଳୀ ଦେଖି ଅନଲାଇନ ମାଧ୍ୟମରେ ଚାରା ମଗାଇବା ସହ ବାରଙ୍ଗପାଲି ଠାରେ ୨୦ ଡିସିମିଲ ଜମିରେ ଚାଷ କରିଛନ୍ତି ।
୯ ମାସ ପରେ ଏବେ ଏହି ଗଛରେ ଫୁଲ ସହ ରଙ୍ଗ ବେରଙ୍ଗର ଡ୍ରାଗନ ଫ୍ରୁଟ ଉତ୍ପାଦନ ହେଉଛି । ଯାହା ସମସ୍ତଙ୍କୁ ଆକୃଷ୍ଟ କରୁଥିବା ବେଳେ ଏହା କିଲୋପିଛା ୨୦୦ ରୁ ୪୦୦ ଟଙ୍କା ପର୍ଯ୍ୟନ୍ତ ବିକ୍ରୟ ହେଉଛି । ଜଟାଧାରୀ ପ୍ରଥମେ ଧାନ ଚାଷ କରୁଥିଲେ । ଏବେ ଧାନର ବିକଳ୍ପ ଭାବେ ଏହି ଡ୍ରାଗନ ଫ୍ରୁଟର ଉତ୍ପାଦନ କରିଛନ୍ତି ଏବଂ ବଜାରରେ ଏହାର ଭଳ ଚାହିଦା ରହିଥିବାରୁ ଆଗାମୀ ଦିନରେ ଆହୁରି ଚାଷ କରିବେ ବୋଳି ଜଟାଧାରୀ କହିଛନ୍ତି ।
ଅନ୍ୟପକ୍ଷରେ ଡ୍ରାଗନ ଫ୍ରୁଟରେ ଔଷଧୀୟ ଗୁଣ ଓ ରୋଗ ପ୍ରତିରୋଧକ ଶକ୍ତି ଭରି ରହିଛି , ଏପରିକି କ୍ୟାନସର,ଉଚ୍ଚ ରକ୍ତଚାପ ଓ ମଧୁମେହ ପାଇଁ ଏହା ଉପକାରୀ ବୋଲି କୁହାଯାଉଛି । ଥରେ ଏହି ଚାଷ କଲେ ୨୫ ବର୍ଷ ପର୍ଯ୍ୟନ୍ତ ଫଳ ଉତ୍ପାଦନର କ୍ଷମତା ମଧ୍ୟ ରହିଛି ଯାହାଦ୍ୱାରା କମ ଖର୍ଚ୍ଚରେ ଚାଷୀ ଅଧିକ ଲାଭବାନ ହେଉଛି । ତେବେ ଜଟାଧାରୀ ଆଗାମୀ ଦିନରେ ଆହୁରି ଅଧିକ ଡ୍ରାଗନ ଫ୍ରୁଟ ଚାଷ କରିବାକୁ ଲକ୍ଷ୍ୟ ରଖିଛନ୍ତି । ଜାତୀୟ କୃଷି ମିଶନ ଯୋଜନାରେ ସାମିଲ କରି ତାଙ୍କୁ ସରକାରୀ ସହାୟତା ଯୋଗାଇ ଦିଆଯିବ ବୋଲିି କହିଛନ୍ତି ବରଗଡ ସହକାରୀ ଉଦ୍ୟାନ କୃଷି ନିର୍ଦ୍ଦେଶକ ।