ବ୍ରହ୍ମପରରୁ ଆସିଲା ମହିଳା ନିର୍ଯାତନାର ତିନି କାହାଣୀ । ଏସପିଙ୍କ ନିକଟରେ ଫେରାଦ ହେଲେ ଡାକ୍ତର, ଇଂଜିନିୟର ଏବଂ ସେନା କର୍ମଚାରୀଙ୍କ ପତ୍ନୀ ।
କନକ ବ୍ୟୁରୋ: ଘରର ଏରୁଣ୍ଡି ଡେଇଁ ଜଣେ ମହିଳା ସେତେବେଳେ ଅଭିଯୋଗ କରିବାକୁ ଗୋଡ଼ ବାହାରକୁ କାଢ଼ିବାକୁ ସଂକୋଚ କରେ ନାହିଁ, ଯେତେବେଳେ ନିର୍ଯାତନାର ସୀମା ଟପିଯାଏ । ଏଭଳି କିଛି ଘଟଣା ଘଟିଛି ବ୍ରହ୍ମପୁରର ତିନି ଜଣ ମହିଳାଙ୍କ ଉପରେ । ସେମାନଙ୍କର ସ୍ୱାମୀ ଉଚ୍ଚଶିକ୍ଷିତ, ଜଣେ ଡାକ୍ତର, ଜଣେ ଇଂଜିନିୟର ଏବଂ ଆଉ ଜଣେ ସେନାକର୍ମଚାରୀ । ହେଲେ ଶାଶୁଘରେ ସ୍ୱାମୀ, ଶାଶୁ, ଶ୍ୱଶୁର ସେମାନଙ୍କୁ ନିର୍ଯାତନା ଦେଉଥିବା ଅଭିଯୋଗ କରି ଏସପିଙ୍କ ଫେରାଦ ହୋଇଛନ୍ତି ତିନି ଜଣ ମହିଳା ।
Kanak News is now on WhatsApp
Join and get latest news updates delivered to you via WhatsApp
ଏମକେସିଜି ମେଡିକାଲ କଲେଜ ଆନାସ୍ଥାସିଆ ବିଭାଗର ଡାକ୍ତର ଶାନ୍ତିଭୂଷଣ ପାଠୀ ତାଙ୍କ ପତ୍ନୀ ନିବେଦିତା ସାହୁଙ୍କୁ ଅକଥନୀୟ ନିର୍ଯାତନା ଦେଉଛନ୍ତି । ଏପରିକି ପୂରା ପରିବାର ସାମ୍ନାରେ ସ୍ୱାମୀ ବସ-ଉଠ କରାନ୍ତି ବୋଲି ଅଭିଯୋଗ କରିଛନ୍ତି ନିବେଦିତା । ଅନ୍ୟ ଜଣେ ପୀଡିତା ୱାଇ ଅନସୂୟା କହିଛନ୍ତି ଗୋଳାବନ୍ଧରେ ସେନା କ୍ଲର୍କ ଭାବେ କାମ କରୁଥିବା ତାଙ୍କ ସ୍ୱାମୀ ୱାଇ. ରମେଶ ବିବାହ ଦିନରୁ ଯୌତୁକ ନିର୍ଯାତନା ଦେଇ ଆସୁଛନ୍ତି । ସେହିଭଳି ଅନ୍ୟ ଜଣେ ଇଂଜିନିୟରଙ୍କ ପତ୍ନୀ ପ୍ରିୟତମା ମହାନ୍ତି କହିଛନ୍ତି, ତାଙ୍କ ଗର୍ଭରେ କନ୍ୟା ସନ୍ତାନ ଥିବା ଜାଣିବା ଦିନରୁ ପର କରି ଦେଇଛନ୍ତି ସ୍ୱାମୀ ଚିନ୍ମୟ ଦାସ ।
ପୀଡିତାଙ୍କ ଠାରୁ ସମସ୍ତ ଘଟଣା ଶୁଣିବା ପରେ ଘଟଣାର ତର୍ଜମା କରି ଆଇନଗତ କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଛନ୍ତି ବ୍ରହ୍ମପୁର ଏସପି ପିନାକ ମିଶ୍ର ।