କନକ ବ୍ୟୁରୋ: କାନ୍ଥରୁ ଲିଭିନି ବିବାହ ପତ୍ରିକା । ପାଦରୁ ଲିଭିନି ଅଳତା । ହେଲେ ଲିଭିଗଲା ନବବଧୂର ଜୀବନ ଶିଖା । ବାହାଘରକୁ ଦିନ କେଇଟା ନପୁରୁଣୁ ଯୌତୁକ ଜୁଇରେ ବଳିପଡିଛି ଆଉ ଜଣେ ନବବଧୂ । ଏଭଳି ଦୁଃଖଦ ଘଟଣା ଘଟିଛି ଗଂଜାମ ସେରଗଡ ଥାନା ଅନ୍ତର୍ଗତ ପଟ୍ଟାପାବୁଲି ଗାଁରେ ।
Kanak News is now on WhatsApp
Join and get latest news updates delivered to you via WhatsApp
ଲାଞ୍ଚିଆପଲ୍ଲୀ ଗାଁର ସୀମାଞ୍ଚଳ ସ୍ୱାଇଁଙ୍କ ଝିଅ କବିତା ପଟ୍ଟାପାବୁଲି ଗାଁର ଅଭି ସ୍ୱାଇଁଙ୍କ ପୁଅ କାଳୁ ସ୍ୱାଇଁଙ୍କୁ ବୈଦିତ ରୀତିନୀତିରେ ବିବାହ କରିଥିଲେ । ବିବାହ ସମୟରେ ବର ପକ୍ଷଙ୍କ ଦାବି ମୁତାବକ ଯୌତୁକ ବି ଆଣିଥିଲେ କବିତା । ହେଲେ ଏତିକିରେ ମେଣ୍ଟିନଥିଲା ଯୌତୁକ ଲୋଭି ଦାନବଙ୍କ ଭୋକ । ଶାଶୁଘରେ ପାଦ ଦେଉଦେଉ ତାଙ୍କ ଉପରେ ଆରମ୍ଭ ହୋଇଯାଇଥିଲା ନିର୍ଯାତନା । ଯୌତୁକ ପାଇଁ ଶାଶୁଘର ଲୋକେ ମିଶି ତାଙ୍କୁ ମାଡ ମାରୁଥିବାର କବିତା ତାଙ୍କ ବାପ ଘରକୁ ଫୋନ କରି ଜଣାଇଥିଲେ । ଏହି ଘଟଣାକୁ ନେଇ କବିତାଙ୍କ ବାପା ପୋଲିସର ଦ୍ୱାରସ୍ଥ ହୋଇଥିଲେ । ବହୁ ବାଦ ବିବାଦ ପରେ ସମସ୍ୟାର ସମଧାନ ହୋଇଥିଲା । ହେଲେ ପୁଣିଥରେ ୧୬ ତାରିଖରେ କବିତା କାନ୍ଦି କାନ୍ଦି ବାପାଙ୍କ ପାଖକୁ ଫୋନ କରିଥିଲେ । ଶାଶୁ ଘରେ ପୁଣିଥରେ ତାଙ୍କୁ ମାଡ ମାରିବା ସହ ଜୀବନରେ ମାରିଦେବାକୁ ଚକ୍ରାନ୍ତ କରିଥିବା କଥା କହିଥିଲେ । ହେଲେ ସକାଳୁ ଯାଇ ବୁଝାସୁଝା କରିବାକୁ ଚିନ୍ତା କରିଥିଲେ କବିତାଙ୍କ ବାପଘର ଲୋକେ । ହେଲେ ପରଦିନ ସକାଳ ସୂର୍ଯ୍ୟ ଦେଖିପାରିନଥିଲେ କବିତା । ବାପା ସୀମାଞ୍ଚଳ ବାରମ୍ବାର ଫୋନ୍ କରିବା ପରେ ବି କବିତା ଫୋନ୍ ନଉଠାଇବାରୁ ତାଙ୍କ ମନରେ ସନ୍ଦେହ ହୋଇଥିଲା । ଆସି ଦେଖିବା ବେଳକୁ ଖଟ ଉପରେ ପଡିଥିଲା କବିତାର ନିସ୍ତେଜ ଦେହ ।
ଏନେଇ ଶେରଗଡ ଥାନାରେ ଅଭିଯୋଗ କରିବା ପରେ ଥନାଧିକାରୀ ପହଞ୍ଚି ମାମଲା ରୁଜୁ କରିବା ସହ ଘଟଣାର ତଦନ୍ତ ଆରମ୍ଭ କରିଛନ୍ତି । ଘଟଣାସ୍ଥଳରେ ସାଇଣ୍ଟିଫିକ୍ ଟିମ , ମାଜିଷ୍ଟ୍ରେଟ ଅକ୍ଷୟ କୁମାର ପହଞ୍ଚି ଶବ କୁ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇଥିଲେ । କବିତାଙ୍କ ସ୍ୱାମୀ , ଶାଶୁ , ଦେଢଶୁରଙ୍କୁ ଅଟକ ରଖି ପଚରାଉଚୁରା ଚଳାଇଛି ପୋଲିସ ।
ଦିନ ପ୍ରତିଦିନ ଯୌତୁକ ନିଆଁରେ ଜଳିପୋଡି ପାଉଁଶ ହୋଇଯାଉଛି ନବବଧୂଙ୍କ ଜୀବନ । ଏଠି ପ୍ରଶ୍ନ କେବେ ଲିଭବ ସମାଜର ଏ କଳଙ୍କ । କେବେ ମିଳିବ ଯୌତୁକ ଦାନବଙ୍କୁ କଠୋର ଶାସ୍ତି?