ପ୍ରଧାନମନ୍ତ୍ରୀଙ୍କୁ ଚିଠି ଲେଖିଲା ହିନ୍ଦୁ ମହାସଭା, ଜାମା ମସଜିଦ ତଳେ ରହିଛି ହିନ୍ଦୁ ଦେବା ଦେବୀଙ୍କ ମୂର୍ତ୍ତି
କନକ ବ୍ୟୁରୋ : ବାରଣାସୀର ଜ୍ଞାନବ୍ୟାପୀ ମସଜିଦ ତଳୁ ଶିବ ଲିଙ୍ଗ ମିଳିବା ନେଇ ହିନ୍ଦୁ ପକ୍ଷ ଦାବି କରିବା ପରେ ଏହାକୁ ନେଇ ଏବେ ବିବାଦ ଉଗ୍ରରୂପ ନେବାରେ ଲାଗିଛି । ଏହାରି ମଧ୍ୟରେ ହିନ୍ଦୁମହାସଭା ପ୍ରଧାନମନ୍ତ୍ରୀଙ୍କୁ ଚିଠି ଲେଖି ପୁଣି ଏକ ବିବାଦ ସୃଷ୍ଟି କରିଛି । ହିନ୍ଦୁ ମହାସଭା ଦାବି କରିଛି କି, ଦିଲ୍ଲୀରେ ଥିବା ଜାମା ମସଜିଦା ଶିଡି ତଳେ ବି ହିନ୍ଦୁ ଦେବା ଦେବୀଙ୍କ ମୂର୍ତ୍ତି ରହିଛି ।
Kanak News is now on WhatsApp
Join and get latest news updates delivered to you via WhatsApp
ହିନ୍ଦୁ ମହାସଭାର ଅଧ୍ୟକ୍ଷ ସ୍ୱାମୀ ଚକ୍ରପାଣି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଚିଠି ଲେଖି ଜମା ମସଜିଦରେ ସର୍ଭେ କରିବାକୁ ଅନୁରୋଧ କରିଛନ୍ତି । ସେ ପ୍ରଧାନମନ୍ତ୍ରୀଙ୍କୁ ଲେଖିଥିବା ଚିଠିରେ ଉଲ୍ଲେଖ କରିଛନ୍ତି କି ଜାମା ମସଜିଦର ଶିଡି ତଳେ ହିନ୍ଦୁ ଦେବା ଦେବୀଙ୍କ ମୂର୍ତ୍ତି ରହିଛି । ଏହାକୁ ତୁରନ୍ତ ଖୋଳି ଦେବାଦେବୀଙ୍କ ମୂର୍ତ୍ତିକୁ ବାହାର କରିବା ପାଇଁ ପଦକ୍ଷେପ ନେବାକୁ ସେ ପ୍ରଧାନମନ୍ତ୍ରୀଙ୍କୁ ଚିଠି ମାଧ୍ୟମରେ ଉଲ୍ଲେଖ କରିଛନ୍ତି । ସୂଚନା ଥାଉକି ହିନ୍ଦୁ ମହାସଭା ଏଭଳି ଏକ ସମୟରେ ଏଭଳି ଦାବି କରିଛି କି ଯେତେବେଳେ ଜ୍ଞାନବାପୀ ମସଜିଦରୁ ଶିବଲିଙ୍ଗ ମିଳିଥିବା ନେଇ ହିନ୍ଦୁପକ୍ଷ ଦାବି କରୁଥିବା ବେଳେ ଏହାକୁ ଖଣ୍ଡନ କରିଛି ମୁସଲମାନ ପକ୍ଷ ।
କହିରଖୁ କି ଦେଶରେ ମହଙ୍ଗାମାଡ ୨୪ ବର୍ଷ ମଧ୍ୟରେ ସର୍ବାଧିକ ସ୍ତରରେ ପହଂଚିଛି । ବେରୋଜଗାରୀ ଓ ଋଣ ବୋଝରେ ୨୦୧୮-୨୦୨୦ ମଧ୍ୟରେ ୨୫ ହଜାର ଲୋକ ଆତ୍ମହତ୍ୟା କରିସାରିଛନ୍ତି । କରୋନା ମହାମାରୀ ବେଳେ ଅକ୍ସିଜେନ ସଂକଟରୁ ମେଡିକାଲରେ ହଜାର ହଜାର ଲୋକ ଛଟପଟ ହୋଇ ପ୍ରାଣ ହରାଇଛନ୍ତି । କୋଭିଡ ପାଇଁ ଲକଡାଉନ ଯୋଗୁଁ ଦେଶର ଶିକ୍ଷା ବ୍ୟବସ୍ଥା ଭୁଷୁଡି ପଡିଛି । ଏସବୁକୁ ସମାଧାନ କରିବା ସରକାରଙ୍କ ପ୍ରଥମ କର୍ତ୍ତବ୍ୟ ହୋଇଥିବା ବେଳେ ଏସବୁ ସମସ୍ୟା ଓହାଡରେ ମନ୍ଦିର ମସଜିଦକୁ ନେଇ ଯେଉଁ ରାଜନୀତି କରାଯାଉଛି ତାହା ଦେଶର ଭବିଷ୍ୟତ ପାଇଁ ନିଶ୍ଚିନ୍ତ ଭାବେ ଏକ ଗମ୍ଭୀର ସଂକଟ ସୃଷ୍ଟି କରିପାରେ ।