ନୂଆ ସାଥି ସନ୍ଧାନରେ ଦାମ । ବିଜୟ ଓ ଦିଲ୍ଲୀପଙ୍କୁ ମେସେଜ ପଠାଇ ବିଜୁ ସମତା କ୍ରାନ୍ତି ଦଳରେ ସାମିଲ ହେବାକୁ ଦେଲେ ପ୍ରସ୍ତାବ
ବିଜୟ କହିଲେ, କେହି କରିନାହାନ୍ତି ଆଲୋଚନା, ଦିଲ୍ଲୀପ ଆସିବା ପରେ ନିଷ୍ପତି
କନକ ବ୍ୟୁରୋ: ରାଜ୍ୟ ରାଜନୀତିରେ ପ୍ରଭାବ ବିସ୍ତାର କରିବାକୁ ମୌକା ଖୋଜୁଛନ୍ତି ବରିଷ୍ଠ ନେତା ଦାମୋଦର ରାଉତ । ବିଜେପିକୁ ଦିଲ୍ଲୀପ ରାୟ ଓ ବିଜୟ ମହାପାତ୍ର ଅଲବିଦା କରିବା ପରେ ଦାମ ସେମାନଙ୍କୁ ସାଥି ବନେଇବା ପାଇଁ ଆଗ୍ରହ ପ୍ରକାଶ କରିଛନ୍ତି । ପରିବର୍ତନ ପାଇଁ ଦୁଇଜଣଙ୍କୁ ବିଜୁ ସମତାକ୍ରାନ୍ତି ଦଳରେ ସାମିଲ ହେବା ପାଇଁ ପ୍ରସ୍ତାବ ଦେଇଛନ୍ତି । ମେସେଜ କରି ତାଙ୍କ ପାର୍ଟିର ଦ୍ୱାର ଏହି ଦୁଇନେତାଙ୍କ ପାଇଁ ଖୋଲା ଥିବା କହିଛନ୍ତି ଦାମ ରାଉତ ।
Kanak News is now on WhatsApp
Join and get latest news updates delivered to you via WhatsApp
ବିଜେଡିରୁ ବିଦା ହେବା ପରେ ୨୦୧୯ରେ ବିଜେଡିକୁ କଡା ଟକ୍କର ଦେବାପାଇଁ ନୂଆ ଦଳ ଗଢିଥିବା ଦାମୋଦର ରାଉତ ଏବେ ସାଥି ଖୋଜୁଛନ୍ତି । ଠିକ ଏତିକି ବେଳେ ତାଙ୍କର ପୁରୁଣା ସାଥି ଦିଲ୍ଲୀପ ରାୟ ଏବଂ ବିଜୟ ମହାପାତ୍ର ବିଜେପି ଛାଡିବା ଦାମଙ୍କ ପାଇଁ ଏକ ସୁଯୋଗ ସୃଷ୍ଟି କରିଛି । ଉଭୟଙ୍କୁ ବିଜୁ ସମତାକ୍ରାନ୍ତିରେ ସାମିଲ ହେବା ପାଇଁ ସେ ଆହ୍ୱାନ କରିିଛନ୍ତି । ମେସେଜ ପଠାଇ ଏହି ନିମନ୍ତ୍ରଣ ଦେଇଛନ୍ତି ଦାମ । ଦାମଙ୍କ କହିବା ହେଲା ଯିଏ ପରିବର୍ତନ ଚାହୁଁଛନ୍ତି ମୋ ସହ ଆସନ୍ତୁ ।
ଏବେ ପ୍ରଶ୍ନ ଉଠୁଛି ଇତିହାସର ପୁନରାବୃତି ହେବ କି ? ପୁଣିଥରେ ବିଜେଡିରେ ସାମିଲ ହେବେ କି ଦିଲ୍ଲୀପ ଓ ବିଜୟ ? ଏହାକୁ ନେଇ ଚାଲିଛି ଜୋରଦାର ଚର୍ଚ୍ଚା । ଏତିକି ବେଳେ ବିଜେଡିରେ ଯୋଗ ଦେବା ପ୍ରସଙ୍ଗରେ ଦାମ କହିଛନ୍ତି, ଯିଏ ନବୀନଙ୍କୁ ଆଣି ନେତା କଲେ, ପ୍ରଥମେ ତାଙ୍କୁ ଦଳରୁ ବିଦା କରାଗଲା । ତେଣୁ ଯାହାର ସ୍ୱାଭିମାନ ଥିବ ସେ କେମିତି ପୁଣି ବିଜେଡିକୁ ଫେରିବ ବୋଲି ପ୍ରଶ୍ନ ଉଠାଇଛନ୍ତି ଦାମ ।
ଅନ୍ୟପକ୍ଷରେ ବିଜୟ କହିଛନ୍ତି ତାଙ୍କୁ କେହି ଡାକିନାହାନ୍ତି ଏବଂ ଆଲୋଚନା କରିନାହାନ୍ତି । ୧୫ଦିନ ପରେ ଦିଲ୍ଲୀପ ରାୟ ଓଡିଶା ଫେରିବା ପରେ ଯାହା ରାଜନୈତିକ ନିଷ୍ପତି ନିଆଯିବ । ତେବେ ରାଜନୈତିକ ଜୀବନର ଆରମ୍ଭରେ ବିଜୟ ମହାପାତ୍ର, ଦିଲ୍ଲୀପ ରାୟ ଓ ଦାମୋଦର ରାଉତ ବିଜୁ ପଟ୍ଟନାୟକଙ୍କ ଅତ୍ୟନ୍ତ ଘନିଷ୍ଠ ଥିଲେ । ଏଣୁ ଦାମଙ୍କ ଅଫର ପରେ ଉଭୟ କି ନିଷ୍ପତି ନେଉଛନ୍ତି ତା ଉପରେ ସମସ୍ତଙ୍କ ନଜର ।