କନକ ବ୍ୟୁରୋ : ଆସନ୍ତାକାଲି ନୂଆ ଦଳ ଘୋଷଣା କରିବେ ପାରାଦୀପ ବିଧାୟକ ଡାକ୍ତର ଦାମୋଦର ରାଉତ । କାଲି ଅପରାହ୍ନରେ ସାମ୍ବାଦିକ ସମ୍ମିଳନୀରେ ବିଧିବଦ୍ଧ ଭାବେ ନୂଆ ଦଳର ଘୋଷଣା କରିବେ ଦାମ ରାଉତ । ଆଉ ଏହାସହ ରାଜ୍ୟ ରାଜନୀତିରେ ଆଉ ଏକ ନୂଆ ଇନିଂସ ଖେଳିବାକୁ ଯାଉଛନ୍ତି ରାଜନୀତିର ପୋଖତ ଖେଳାଳୀ ଦାମ ରାଉତ । ଦାମଙ୍କ ନୂଆ ଦଳର ନାଁ ବିଜୁ କ୍ରାନ୍ତି ଦଳ ରହିବ ବୋଲି କନକ ନ୍ୟୁଜକୁ କହିଛନ୍ତି । ନିଜକୁ ବିଜୁ ଅନୁଗତ କହି ଆସୁଥିବା ଦାମ ତାଙ୍କ ନାମ ଅନୁସାରେ ଦଳ ଗଠନ କରିବେ ବୋଲି ଚର୍ଚ୍ଚା ହୋଇ ଆସୁଥିଲା । ଏନେଇ ପୂର୍ବରୁ ସୂଚନା ଦେଇଥିଲେ ପୂର୍ବତନ ମନ୍ତ୍ରୀ ।
Kanak News is now on WhatsApp
Join and get latest news updates delivered to you via WhatsApp
ଦାମଙ୍କ ନୂଆ ଦଳରେ କିଏ ସାମିଲ ହେବ ସେନେଇ କୌଣସି ସ୍ପଷ୍ଟ ସୂଚନା ମିଳିନଥିଲେ ମଧ୍ୟ ଯଜେ୍ଞଶ୍ୱର ବାବୁ , ବ୍ରଜ କିଶୋର ତ୍ରିପାଠୀଙ୍କୁ ନେଇ ନୂଆ ଦଳକୁ ଦାମ ଆଗକୁ ନେବେ ବୋଲି ସୂଚନା ମିଳିଛି । ତେବେ ବୈଜୟନ୍ତ ପଣ୍ଡା ନୂଆ ଦଳରେ ସାମିଲ ହେବେ କି ନାହିଁ ସେନେଇ ମୁହଁ ଖୋଲି ନାହାନ୍ତି ଦାମ । କିନ୍ତୁ ସେ ଦଳର ମଙ୍ଗ ଧରିବେ ଏକଥା ସ୍ପଷ୍ଟ କରିଛନ୍ତି ଦାମ ।
ପୂର୍ବରୁ ବିଜେଡିରେ ଥିବା ଦାମ ବିବାଦୀୟ ମନ୍ତବ୍ୟ ପାଇଁ ପ୍ରଥମେ ମନ୍ତ୍ରୀପଦରୁ ବିଦା ହୋଇଥିଲେ । ପରେ ପରେ ନିଜର ବେଲଗାମ ତୁଣ୍ଡ ପାଇଁ ସେପ୍ଟେମ୍ବର ୧୨ରେ ଦଳରୁ ଦାମଙ୍କୁ ବହିଷ୍କାର କରାଯାଇଥିଲା । ଆଉ ଏହାପରେ ନବୀନଙ୍କୁ ଚେକମେଟ ଦେବାକୁ ଦାମ ନୂଆ ଦଳ ଗଠନ କରିବେ ବୋଲି ଘୋଷଣା କରିଥିଲେ । ବୈଜୟନ୍ତ ପଣ୍ଡା, ପ୍ରଫୁଲ ଘଡେଇ, ପଞ୍ଚାନନ କାନୁନଗୋଙ୍କ ଭଳି ନେତାଙ୍କୁ ସାଙ୍ଗରେ ନେଇ ନୂଆ ଦଳ ଗଠନ କରିବେ ବୋଲି କହିଥିଲେ ଦାମ । ତେବେ ସେତେବେଳେ ଏକଥାକୁ ଖଣ୍ଡନ କରିଥିଲେ ତିନି ନେତା । ଆଉ ଏହାପରେ ଦାମ ରାଜ୍ୟର ବିଭିନ୍ନ ସ୍ଥାନରେ ନବୀନଙ୍କ ବିରୋଧରେ ସଭା କରି ଆସୁଛନ୍ତି ।
କାର୍ତ୍ତିକ ପୂର୍ଣ୍ଣିମାରେ ନୂଆ ଦଳର ଘୋଷଣା କରିବେ ଦାମ । ୨୦୧୯ ନିର୍ବାଚନକୁ ଆଉ ମାତ୍ର ଅଳ୍ପ କିଛି ଦିନ ବାକି ଥିବା ବେଳେ ଦାମଙ୍କ ନୂଆ ଦଳ ରାଜିନୀତିର ପଶାପାଲିରେ ବିଜେଡିକୁ ଚେକମେଟ ଦେଇପାରୁଛି କି ନାହିଁ ତାହା ଉପରେ ଏବେ ରାଜ୍ୟବାସୀଙ୍କ ନଜର ରହିବ । କାରଣ ପୂର୍ବରୁ ମଧ୍ୟ ବିଜେଡିକୁ ଟକ୍କର ଦେବାକୁ ଓଡିଶାରେ ଅନେକ ଆଞ୍ଚଳିକ ଦଳ ଗଠନ ହୋଇଥିଲା । କିନ୍ତୁ ନବୀନଙ୍କ ଲୋକପ୍ରିୟତା ଆଗରେ କିଛି ଆଞ୍ଚଳିକ ଦଳ ସମ୍ପୂର୍ଣ୍ଣ ମୂଳପୋଛ ହୋଇଥିବା ବେଳେ ଆଉ କିଛି ଆଞ୍ଚଳିକ ଦଳ ରାଜନୀତିରେ ତିଷ୍ଠି ରହିବା ପାଇଁ ସଂର୍ଘଷ କରୁଛନ୍ତି । ଆଉ ଏଭଳି ସମୟରେ ଦାମଙ୍କ ନୂଆ ଦଳ କେଉଁ ରାଜ୍ୟ ରାଜନୀତିରେ କଣ ପ୍ରଭାବ ପକାଇବ ତାହା ଦେଖିବା ବାକି ରହିଲା ।