ସ୍ୱାଧୀନତା ଦିବସରେ ପରାଧୀନତାର ଚିତ୍ର! ଛୁଆଁଅଛୁଆଁ ଭେଦଭାବକୁ କେନ୍ଦ୍ର କରି ସ୍କୁଲରେ ପତାକା ଉତୋଳନରୁ ବଂଚିତ ରହିଲେ ଦଳିତ ଛାତ୍ରଛାତ୍ରୀ, ବସ୍ତିରେ ପାଳିଲେ ସ୍ୱାଧୀନତା ଦିବସ
କନକ ବ୍ୟୁରୋ : ସ୍ୱାଧୀନତାକୁ ୭୧ ବର୍ଷ ବିତିଯାଇଛି, ଆଜି ଆମେ ୭୨ ତମ ସ୍ୱାଧିନତା ଦିବସ ପାଳନ କରୁଛେ । ଦିଲ୍ଲୀର ଲାଲକିଲ୍ଲାରେ ପ୍ରଧାନମନ୍ତ୍ରୀ ମହାକାଶ ଅଭିଯାନ ପାଇଁ ଯୋଜନା ଘୋଷଣା କରୁଛନ୍ତି । ଦେଶ, ବିଶ୍ୱର ଏକ ଶ୍ରେଷ୍ଠ ଅର୍ଥନୀତି ବୋଲି କୁହାଯାଉଛି । ଏଭଳି ବଡ ବଡ ନାରା ଭିତରେ ଆମେ କେତେ ସ୍ୱାଧୀନ, ତାର ଏକ ଚିତ୍ର ଆସିଛି ପୁରୀ ଜିଲ୍ଲାରୁ । ଯେଉଁଠି ଆଜି ବି ରହିଛି ଛୁଆଁ ଅଛୁଁଆ ଭେଦଭାବ । ଆଉ ଏହି ଛୁଆଁଅଛୁଆଁ ଭେଦଭାବ ଯୋଗୁଁ କୁନି କୁନି ପିଲାମାନେ ସ୍କୁଲରେ ତ୍ରିରଙ୍ଗା ପତାକା ଉଡାଇବାରୁ ବଂଚିତ ହୋଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଗୋଟିଏ ପଟେ ସ୍କୁଲ ଅଗଣାରେ ତ୍ରିରଙ୍ଗା ଉଡୁଛି, ଅନ୍ୟପଟେ ଦଳିତ ବସ୍ତିରେ ଛୋଟିଆ ପତାକାଟିଏ ଧରି ସ୍ୱାଧୀନତା ଦିବସ ପାଳନ କରୁଛନ୍ତି କୁନି କୁନି ପିଲା । ସ୍କୁଲ ଯାଇନଥିବା ଏହି ପିଲାମାନେ ବି ଛାତ୍ରଛାତ୍ରୀ । ଆଉ ଯେଉଁମାନେ ସ୍କୁଲ ପରିସରରେ ତ୍ରିରଙ୍ଗା ଉଡାଇଛନ୍ତି ସେମାନେ ବି ଛାତ୍ରଛାତ୍ରୀ । କାରଣ ଏହି ଛାତ୍ରଛାତ୍ରୀ ମାନେ ହେଉଛନ୍ତି ଜାତିରେ ଦଳିତ । ହେଲେ କାହିଁକି ଦଳିତ ପିଲାଙ୍କୁ ନିଜ ସାହିବସ୍ତିରେ ତ୍ରିରଙ୍ଗା ଉଠାଇବାକୁ ପଡୁଛି, ତାର କାରଣ ଜାଣିଲେ ଆପଣ ବି ଆଶ୍ଚର୍ଯ୍ୟ ହୋଇଯିବେ । ଏହା ପଛରେ ଏକମାତ୍ର କାରଣ ହେଉଛି ଦଳିତଙ୍କ ପ୍ରତି ଥିବା ଛୁଆଁଅଛୁଆଁ ଭେଦଭାବ ।
ଏକବିଂଶ ଶତାବ୍ଦୀର କଥିତ ସଭ୍ୟ ସମାଜ ଭିତରେ ପୁରୀ ଜିଲ୍ଲା ପିପିଲି ବ୍ଲକ୍ ନାହାମଙ୍ଗ ପାଟଣା ଗାଁରୁ ଅଭାବନୀୟ ଘଟଣା ସାମ୍ନାକୁ ଆସିଛି । ଦଳିତମାନେ ଅଭିଯୋଗ କରୁଛନ୍ତି ଯେ-ସ୍କୁଲ ଭିତରେ ଛୁଆଁ ଅଛୁଆଁ ଭେଦଭାବର ଶିକାର ହେଉଛନ୍ତି ଛାତ୍ରଛାତ୍ରୀ । ଅନ୍ୟପଟେ ସାଧାରଣବର୍ଗର ଅଭିଯୋଗ ହେଉଛି-ଦଳିତ ସଂପ୍ରଦାୟ ଲୋକମାନେ, ବିନାକାରଣରେ ଗାଳିଗୁଳଜ କରୁଛନ୍ତି । ଆଉ ଏହିବିବାଦ ଯୋଗୁଁ ଏହି କୁନି କୁନି ପିଲାମାନେ ୧୦ ଦିନ ହେଲା ସ୍କୁଲ ଯାଉ ନାହିଁନ୍ତି । ଏବଂ ନିଜ ଘର ପାଖରେ ସ୍ୱାଧିନତା ଦିବସ ପାଳନ କରିଛନ୍ତି ।
ଅନ୍ୟପଟେ ସ୍କୁଲ ଭିତରେ କୌଣସି ଭେଦଭାବ ହେଉନଥିବା ପ୍ରଧାନଶିକ୍ଷକ କହିଥିବା ବେଳେ ନିଜ ବସ୍ତିରେ ସ୍ୱାଧିନତା ଦିବସ ପାଳନ କଥା ତାଙ୍କୁ ମର୍ମାହତ କରିଥିବା କହିଛନ୍ତି । ଗାଁରେ ସୃଷ୍ଟି ହୋଇଥିବା ଏହି ବିବାଦକୁ ନେଇ ଉଭୟ ଗୋଷ୍ଠୀ ପକ୍ଷରୁ ବଳଙ୍ଗା ଥାନାରେ ଅଭିଯୋଗ ହୋଇଛି । ହେଲେ ଏଯାଏଁ ସମାଧାନର ବାଟ ବାହାରି ପାରି ନାହିଁ । ପିପିଲି ଅଂଚଳର ଏହି ଘଟଣା ହିଁ ପ୍ରମାଣ କରୁଛି ଯେ, ଆଜି ବି କେଉଁଠି ନା’ କେଉଁଠି ଛୁଆଁ ଅଛୁଆଁ ଭଳି କୁତ୍ସିତ ପ୍ରଥା ବଂଚି ରହିଛି ।