ଗୋପାଳପୁର ରାଡାର ରେଞ୍ଜରେ ‘ଫୋନି’: ୧୫ କିଲୋମିଟର ବେଗରେ କରୁଛି ଗତି ବାତ୍ୟା, କାଲି ସଂଧ୍ୟାରେ ପୁରୀରେ କରିବ ଲ୍ୟାଣ୍ଡଫଲ
କନକ ବ୍ୟୁରୋ: ଗୋପାଳପୁର ଡୋପଲର ରାଡାର ରେଞ୍ଜରେ ବାତ୍ୟା ଫୋନି । ପୁରୀଠାରୁ ୪୨୦ କିମି ଦୂରରେ ରହିଛି ବାତ୍ୟା ଫୋନି । ଘଂଟାପ୍ରତି ୧୫କିମି ବେଗରେ ଗତି କରୁଛି ବାତ୍ୟା । ସ୍ଥଳଭାଗ ଛୁଇଁଲେ ପୁରୀରେ ପବନର ବେଗ ୨୦୦ କିମି ହେବାର ସମ୍ଭାବନା ରହିଛି । ସେହିପରି ଗୋପାଳପୁରରେ ୧୪୦ରୁ ୧୫୦ କିମି ବେଗରେ ବହିବାର ସମ୍ଭାବନା ରହିଥିବା ସୂଚନା ରହିଛି । ବାତ୍ୟା ଫୋନି ପ୍ରଭାବରେ ଗୋପାଳପୁରରେ ଆରମ୍ଭ ହୋଇଛି ବର୍ଷା । ପାଗ କୋହଲା ସାଙ୍ଗକୁ ଝିପି ଝିପି ବର୍ଷା ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ଭାରତୀୟ ପାଣିପାଗ ବିଭାଗର ଆକଳନ କହୁଛି, ଏକ୍ସଟ୍ରିମଲି ସିଭିୟର ସାଇକ୍ଲୋନିକ ଷ୍ଟର୍ମର ରୂପ ନେଇ ମାଡି ଆସୁଥିବା ସାମୁଦ୍ରିକ ଝଡ-ଫୋନି ଏବେ ପୁରୀଠାରୁ ୪୨୦ କିଲୋମିଟର ଓ ବିଶାଖାପାଟଣାରୁ ୨୧୦ କିମି ଦୂରରେ ରହିଛି । ଏହା ଘଂଟାପ୍ରତି ୧୫ କିଲୋମିଟର ବେଗରେ ଗତି କରୁଛି । ବାତ୍ୟା , ଆସନ୍ତାକାଲି ଅର୍ଥାତ୍ ଶୁକ୍ରବାର ଅପରାହ୍ନ ସାଢେ ୫ଟାରେ ପୁରୀ ଉପକୂଳରେ ସ୍ଥଳଭାଗ ଭାଗ ଛୁଇଁବ । ଭାରତୀୟ ପାଣିପାଗ ବିଭାଗ ପୂର୍ବାନୁମାନ ଅନୁଯାୟୀ, ବାତ୍ୟା ଫୋନି ସ୍ଥଳଭାଗ ଛୁଇଁବା ସମୟରେ ପବନର ବେଗ ଘଂଟାପ୍ରତି ୧୭୦ରୁ ୧୮୦ କିଲୋମିଟର ରହିପାରେ ।
ଏହାପରେ ବାତ୍ୟା ଖୋର୍ଦ୍ଧା, କଟକ, ଯାଜପୁର ଓ ଭଦ୍ରକ ଦେଇ ଗତି କରିବ । ପରେ ଭଦ୍ରକରୁ ବାଲେଶ୍ୱର ଦେଇ ପଶ୍ଚିମବଙ୍ଗ ମୁହାଁଇବ ବାତ୍ୟା ଫୋନି । ତେବେ ଗୁରୁତ୍ୱପୂଣ୍ଣ କଥା ହେଉଛି ବର୍ତମାନ ରାଡାର ରେଂଜ୍ ଭିତରକୁ ଆସିଯାଇଛି ବାତ୍ୟା ଫୋନି । ଫଳରେ ବାତ୍ୟାର ଆଗାମୀ ଗତି ଓ ଦିଗ ନେଇ ତୁରନ୍ତ ଏବଂ ସଠିକ୍ ସୂଚନା ମିଳିପାରିବ । ଫୋନି ଯେତିକି ଯେତିକି ଓଡିଶା ଉପକୂଳ ପାଖଉଛି, ପବନର ବେଗ ନେଇ ଆଶା ଆଶଙ୍କା ସୃଷ୍ଟି ହୋଇଛି । ଭାରତୀୟ ପାଣିପାଗ ବିଭାଗର ସୂଚନା ଅନୁସାରେ, ସାମୁଦ୍ରିକ ଝଡ ଫୋନି ଓଡିଶା ଉପକୂଳ ଛୁଇଁବା ବେଳକୁ ପବନର ବେଗ ଘଂଟାକୁ ୨୦୫ କିଲୋମିଟର ରହିବ ।