କନକ ବ୍ୟୁରୋ: ଆପଣ ଅନଲାଇନରେ କିଣାବିକା କରୁଛନ୍ତି କି? ଯଦି କରୁଛନ୍ତି, ତେବେ ସାବଧାନ । କାରଣ, ଆପଣଙ୍କର ଟିକିଏ ଅସାବଧାନତା, ହୁଏତ ଆପଣଙ୍କ ବ୍ୟାଙ୍କ ଖାତାରୁ ସବୁ ଟଙ୍କା ଖାଲି କରିଦେବ । ଅନଲାଇନରେ ଗାଈ ବିକ୍ରି କରିବାକୁ ଯାଇ, ଏଭଳି କିଛି ଠକାମୀର ଶିକାର ହୋଇଛନ୍ତି ଭୁବନେଶ୍ୱରର ଜଣେ ଯୁବକ ଦେବାଶିଷ ସାହୁ ।
Kanak News is now on WhatsApp
Join and get latest news updates delivered to you via WhatsApp
ଅନଲାଇନରେ ଗାଈ ବିକ୍ରି କରିବାକୁ ବିଜ୍ଞାପନ ଦେଇ ଏକ ଲକ୍ଷ ଟଙ୍କାର ଠକେଇର ଶିକାର ହୋଇଯାଇଛନ୍ତି ଏହି ଯୁବକ । ଗାଈର ମୂଲ୍ୟ ୨୦ ହଜାର ଟଙ୍କା ସ୍ଥିର ହୋଇଥିବା ବେଳେ ସାଇବର ଠକ ତାଙ୍କଠୁ ଲକ୍ଷେ ଟଙ୍କା ଲୁଟି ନେଇଛି । କ୍ୟୁ-ଆର କୋଡ୍ ସ୍କାନ ଆଳରେ ୫ଟି ପର୍ଯ୍ୟାୟରେ ଲକ୍ଷେ ଟଙ୍କା ଲୁଟି ଦେଇଛି ଠକ ।
ତେବେ ଏନେଇ ଦେବାଶିଷ ଥାନାରେ ଦେଇଥିବା ଅଭିଯୋଗରେ ଲେଖିଛନ୍ତି –ଗୋଟିଏ ଆପରେ ମୋର ଗାଈ ବିକ୍ରି କରିବା ପାଇଁ ବିଜ୍ଞାପନ ଦେଇଥିଲି । ମୋର ଗାଈ କିଣିବା ପାଇଁ ଗୋଟିଏ ନମ୍ବରରୁ ଫୋନ୍ ଆସିଥିଲା । ଲୋକଟି କହିଲା ଗାଈ ମୋର ପସନ୍ଦ ହୋଇଛି ଓ ଗାଈଟି କିଣିବାକୁ ଚାହୁଁଛି । ତେବେ ଫୋନ୍ ପେ’ରେ ୧୦ ହଜାର ଦେବି ଏବଂ କ୍ୟାସ୍ ୧୦ ହଜାର ଦେବି । ହେଲେ ମୋର ଡାଇରେକ୍ଟ ଫୋନ୍ ପେ’ ହେଉନି ତେଣୁ କ୍ୟୁ-ଆର କୋଡ୍ ପଠାଇଥିଲା । ତାକୁ ସ୍କାନ କଲେ ମୁଁ ଟଙ୍କା ପାଇଯିବି ବୋଲି କହିଥିଲା । ହେଲେ ସ୍କାନ୍ କରିବା ପରେ ପର୍ଯ୍ୟାୟକ୍ରମେ ଟଙ୍କା କଟି ଚାଲିଥିଲା ବୋଲି ଦେବାଶିଷ ଲେଖିଛନ୍ତି ।
ଗାଈକୁ ଅନଲାଇନରେ ବିକ୍ରି କରିବା ପାଇଁ ବିଜ୍ଞାପନ ଦେବା ଯେତେ କୌତୁଳ ସୃଷ୍ଟି କରୁଛି, ଗାଈ କିଣିବା ଆଳରେ ଏକ ଲକ୍ଷ ଟଙ୍କା ଠକିଯିବା ତାଠୁ ଅଧିକ ଆଶ୍ଚର୍ଯ୍ୟ କରୁଛି । ଅନଲାଇନରେ ଆର୍ଥିକ କାରବାର କରିବା ପୂର୍ବରୁ ସତର୍କତା ଅବଲମ୍ବନ କରିବା ପାଇଁ ବାରମ୍ବାର କୁହାଯାଉଛି । ହେଲେ, ଏତେ ସତର୍କତା ସତ୍ତ୍ୱେ ଲୋକ ଭୁଲ କରୁଛନ୍ତି, ଯାହା ଫଳରେ ଏଭଳି ଘଟଣା ସବୁ ଘଟୁଛି ।