ହୀରାକୁଦ ବନ୍ଧ ସ୍ଥିତି ସନ୍ତୋଷଜନକ : ସିଏସଏମଆରଏସ୍ ପକ୍ଷରୁ ରିପୋର୍ଟ ଦାଖଲ; ଖୁବଶୀଘ୍ର ଆଉ ଏକ ଟିମ୍ କରିବ ବିସ୍ତୃତ ଯାଞ୍ଚ
କନକ ବ୍ୟୁରୋ : ହୀରାକୁଦ ନଦୀବନ୍ଧର ବୟସକୁ ଦେଖିଲେ ଏହାର ସ୍ଥିତି ସନ୍ତୋଷଜନକ ଥିବା ରିପୋର୍ଟ ଦେଇଛନ୍ତି କେନ୍ଦ୍ରୀୟ ମୃତିକା ଓ ଧାତବ ଗବେଷଣା ଷ୍ଟେସନର ବିଶେଷଜ୍ଞ ଟିମ୍ । ଓଡ଼ିଶା ସରକାରଙ୍କ ଅନୁରୋଧକ୍ରମେ ସିଏସଏମଆରଏସର ୨ଜଣ ବୈଜ୍ଞାନିକ ୩ ଦିନ ଧରି ହୀରାକୁଦ ବନ୍ଧର ପୁଙ୍ଖାନୁପୁଙ୍ଖ ଯାଞ୍ଚ କରିଥିଲେ । ସେମାନେ ଅପରେସନ୍ ଗ୍ୟାଲେରୀ, ଫାଉଣ୍ଡେସନ୍ ଗ୍ୟାଲେରି, ସ୍ପିଲୱେ, ଗେଟ୍ ଆଦି ନଦୀବନ୍ଧର ସବୁ ଅଂଶ ଯାଞ୍ଚ କରିଥିଲେ । ପୂର୍ବରୁ ରହିଥିବା ଫାଟଗୁଡ଼ିକ ସମେତ ଡ୍ୟାମର ନିରାପତ୍ତା ସମ୍ପର୍କିତ ସମସ୍ତ ଉପାଦାନର ଅନୁଧ୍ୟାନ କରିଥିଲେ ।
Kanak News is now on WhatsApp
Join and get latest news updates delivered to you via WhatsApp
ଏହା ପରେ ୨୧ ତାରିଖ ଦିନ ସେମାନେ ନିଜର ରିପୋର୍ଟ ପ୍ରଦାନ କରିଥିବା ଅପର ମହାନଦୀ ବେସନ୍ ମ୍ୟାନେଜର ତଥା ମୁଖ୍ୟଯନ୍ତ୍ରୀ ଆନନ୍ଦ ଚନ୍ଦ୍ର ସାହୁ ସୂଚନା ଦେଇଛନ୍ତି । ପ୍ରାରମ୍ଭିକ ଯାଞ୍ଚରୁ ବୟସ ଅନୁସାରେ ହୀରାକୁଦ ବନ୍ଧର କଂକ୍ରିଟ୍ ଓ ଯନ୍ତ୍ରାଂଶର ସ୍ଥିତି ସନ୍ତୋଷଜନକ ବୋଲି ସେମାନେ ରିପୋର୍ଟରେ ଉଲ୍ଲେଖ କରିଛନ୍ତି । ଏହା ସହ ବିସ୍ତୃତ ଯାଞ୍ଚ, ବିଭିନ୍ନ ସମସ୍ୟାର ନିର୍ଦ୍ଧିଷ୍ଟ ଭାବେ ଅନୁଧ୍ୟାନ ଓ ପ୍ରତିକାର ନିମନ୍ତେ ଆଉ ଏକ ଅନୁସନ୍ଧାନ ପାଇଁ ସେମାନେ ସୁପାରିଶ କରିଛନ୍ତି । ଏଥିପାଇଁ ବ୍ୟୟ ଅଟକଳ ମଧ୍ୟ ପ୍ରଦାନ କରିଛନ୍ତି । ଓଡ଼ିଶା ସରକାର ସେ ବାବଦ ଅର୍ଥ ଜମା କଲେ ସିଏସଏମଆରଏସ୍ ଆଉ ଏକ ଟିମ୍ ଆସି ବିସ୍ତୃତି ଅନୁସନ୍ଧାନ କରିବ ବୋଲି ମୁଖ୍ୟଯନ୍ତ୍ରୀ ଆନନ୍ଦ ଚନ୍ଦ୍ର ସାହୁ ସୂଚନା ଦେଇଛନ୍ତି ।