କୋଭିସିଲ୍ଡ ଟିକାର ଦୁଇ ଡୋଜ ମଧ୍ୟରେ ବ୍ୟବଧାନ ବଢିଲେ ଶରୀରରେ ସୃଷ୍ଟି ହେବ ଅଧିକ ଆଂଟିବଡି : ଅକ୍ସଫୋର୍ଡ ବିଶ୍ୱବିଦ୍ୟାଳୟର ଗବେଷକ କହିଲେ, ଦ୍ୱିତୀୟ ଡୋଜ ନେବାକୁ ୪୫ ସପ୍ତାହ ବିଳମ୍ବ କଲେ ବଢିବ ରୋଗ ପ୍ରତିରୋଧ ଶକ୍ତି
କନକ ବ୍ୟୁରୋ : କୋଭିସିଲ୍ଡ ଟିକାର ଦୁଇ ଡୋଜ୍ ମଧ୍ୟରେ ବ୍ୟବଧାନ ବୃଦ୍ଧି ହେଲେ, ଶରୀରରେ ଅଧିକ ଆଂଟିବଡି ସୃଷ୍ଟି ହେବ । ଅକ୍ସଫୋର୍ଡ ବିଶ୍ୱବିଦ୍ୟାଳୟର ଜଣେ ଗବେଷକ କହିଛନ୍ତି, କୋଭିସିଲ୍ଡର ଦ୍ୱିତୀୟ ଡୋଜ୍ ନେବାକୁ ୪୫ ସପ୍ତାହ ବିଳମ୍ବ କଲେ ଅଧିକ ରୋଗ ପ୍ରତିରୋଧ ଶକ୍ତି ବୃଦ୍ଧି ପାଇବ । ଏହା ସହ ସେ ତୃତୀୟ ଡୋଜ୍ ସପକ୍ଷରେ ମଧ୍ୟ ସେ ମତ ଦେଇଛନ୍ତି । ଅକ୍ସଫୋର୍ଡ ଗବେଷଣାରୁ ମିଳିଥିବା ତଥ୍ୟ ଅନୁସାରେ, ତୃତୀୟ ଡୋଜ୍ ଟିକା ନେଲେ ଶରୀରରେ ଯଥେଷ୍ଟ ପରିମାଣର ଆଂଟିବଡି ସୃଷ୍ଟି ହେବ ।
Kanak News is now on WhatsApp
Join and get latest news updates delivered to you via WhatsApp
ଟିକାର ଅଭାବକୁ ଦୃଷ୍ଟିରେ ରଖି ଭାରତ ସମେତ ଅନେକ ଦେଶ ଟିକାର ଦୁଇ ଡୋଜ୍ ଟିକା ମଧ୍ୟରେ ବ୍ୟବଧାନ ବୃଦ୍ଧି କରିଛନ୍ତି । ଏହି ପରିପ୍ରେକ୍ଷୀରେ ଦେଖିଲେ ଅକ୍ସଫୋର୍ଡ ଗବେଷଣାର ଗୁରୁତ୍ୱ ରହିଛି । ଭାରତ ସରକାର କୋଭିସିଲ୍ଡର ଦୁଇ ଡୋଜ୍ ମଧ୍ୟରେ ବ୍ୟବଧାନକୁ ୬ରୁ ୮ ସପ୍ତାହ ପରିବର୍ତେ ୧୨ରୁ ୧୬ ସପ୍ତାହକୁ ବୃଦ୍ଧି କରିଛନ୍ତି । ଏହାର ପ୍ରଭାବ ନେଇ ବିତର୍କ ଚାଲିଥିବା ବେଳେ ଅକ୍ସଫୋର୍ଡର ଗବେଷଣା କିଛି ପରିମାଣରେ ଆଶ୍ୱସ୍ତି ଆଣିଛି । ଅକ୍ସଫୋର୍ଡ-ଆଷ୍ଟ୍ରାଜେନେକା ପକ୍ଷରୁ ବିକଶିତ ହୋଇଥିବା କରୋନା ଟିକାକୁ କୋଭିସିଲ୍ଡ ନାଁରେ ସେରମ୍ ଇନଷ୍ଟିଚ୍ୟୁଟ ତିଆରି କରୁଛି ।