କନକ ବ୍ୟୁରୋ: ଗତବର୍ଷ ଏପ୍ରିଲ ମାସରେ ବଲାଙ୍ଗୀର ସହରର ହାତୀଶାଳପଡ଼ାରେ କଂଟେନମେଂଟ ଜୋନ୍ ତିଆରି ହୋଇଥିଲା । ସହରରେ ପ୍ରଥମ ଏହି ଅଂଚଳରେ କରୋନା ପଜିଟିଭ୍ ଚିହ୍ନଟ ହେବା ପରେ କଟକଣା ଲଗାଇଥିଲା ପ୍ରଶାସନ । ଏହି କଂଟେନ୍ମେଂଟ ଜୋନ ପାଇଁ ପ୍ରାୟ ୮ ଖଣ୍ଡ ବାଉଁଶ ବ୍ୟବହାର ହୋଇଥିଲା । କିନ୍ତୁ ଏହି ୮ ଖଣ୍ଡ ବାଉଁଶକୁ ପ୍ରଶାସନ କେତେ ଟଙ୍କାରେ କିଣିଥିଲା, ଆପଣ ଶୁଣିଲେ ଚମକି ପଡ଼ିବେ । ଏହି ୮ ଖଣ୍ଡ ବାଉଁଶକୁ ୨ ଲକ୍ଷ ୪୨ ହଜାର ୪୧୬ ଟଙ୍କାରେ କିଣା ଯାଇଥିଲା ।
Kanak News is now on WhatsApp
Join and get latest news updates delivered to you via WhatsApp
ଗୋଟିଏ ବାଉଁଶକୁ ଅତି ବେଶୀରେ ୨୦୦ ଟଙ୍କାରେ କିଣିଲେ, ଏତିକି ବାଉଁଶ କିଣିବା ପାଇଁ ମାତ୍ର ୧୬ଶହ ଟଙ୍କା ଖର୍ଚ୍ଚ ହେବ । ରଶି, ମଜୁରୀ ଆଦି ମିଶାଇଲେ ହୁଏତ ଆଉ ହଜାରେ ଟଙ୍କା ଖର୍ଚ୍ଚ ହୋଇପାରେ । ମୋଟ ଖର୍ଚ୍ଚ ଅତି ବେଶୀରେ ୨୫ ଶହରୁ ୨୬ ଶହ ହୋଇପାରେ ।ବଲାଙ୍ଗୀର ଜିଲ୍ଲାର ଆର୍ ଆଣ୍ଡ ବି ଡିଭିଜନ୍ ପକ୍ଷରୁ ଏହି ହିସାବ କିତାବର ତଥ୍ୟ ସାମନାକୁ ଆସିଛି । ପ୍ରଥମେ ହାତୀଶାଳପଡ଼ା କଥା ଉଲ୍ଲେଖ କରାଯାଇଛି । କଂଟେନ୍ମେଂଟ ଜୋନ ପାଇଁ ଖର୍ଚ୍ଚ ହୋଇଛି ୨ ଲକ୍ଷ ୪୨ ହଜାର ୪୧୬ ଟଙ୍କା । ପ୍ରକୃତ ଖର୍ଚ୍ଚର ଏହା ୧୦୦ ଗୁଣ ହେବ । ସେହିପରି ଠିକାଦାରପଡ଼ାର କଂଟେନମେଂଟ ଜୋନ୍ ପାଇଁ ଖର୍ଚ୍ଚ ହୋଇଛି ୩୯ ହଜାର ୪୫୬ ଟଙ୍କା । ତାଲପାଲିପଡ଼ାର କଂଟେନମେଂଟ ଜୋନ ପାଇଁ ଖର୍ଚ୍ଚ ହୋଇଛି ୨୩ ହଜାର ୯୮୪ ଟଙ୍କା । ସୁଦପଡ଼ାର କଂଟେନମେଂଟ ଜୋନ ପାଇଁ ସମାନ ୨୩ ହଜାର ୯୮୪ ଟଙ୍କା ଖର୍ଚ୍ଚ ହୋଇଛି ।
ଏହି ଘଟଣାକୁ ନେଇ ଜିଲ୍ଲାପାଳ କହିଥିଲେ, ଯଦି ସେଭଳି ଦୁର୍ନୀତି ହୋଇଥାଏ, ଏହାର ଅନୁସନ୍ଧାନ କରାଯିବ । ଏଥିସହ ସଂପୃକ୍ତ ବାବୁଙ୍କ ଠାରୁ ଟଙ୍କା ଆଦାୟ କରାଯିବ ବୋଲି ସେ କହିଛନ୍ତି । ତେବେ ହାତୀଶାଳପଡ଼ାର ଘଟଣା ସମସ୍ତଙ୍କ ମନରେ ଏକ ବଡ଼ ପ୍ରଶ୍ନ ସୃଷ୍ଟି କରିଛି । ସେହି ପ୍ରଶ୍ନଟି ହେଉଛି, ସତରେ କ’ଣ ୮ଟି ବାଉଁଶ ପୋତି ଆମର ବାବୁମାନେ ଅଢ଼େଇ ଲକ୍ଷ ଟଙ୍କା ବିଲ୍ କରିଛନ୍ତି? ନା, ଏଥିରେ ଆଉ କିଛି ଖର୍ଚ୍ଚ ମିଶିଛି । ଏକଥା ତୁରନ୍ତ ସ୍ପଷ୍ଟ ହେବା ଆବଶ୍ୟକ । ନହେଲେ ଓଡ଼ିଶାବାସୀଙ୍କ ମନରେ ସରକାରଙ୍କ କରୋନା ପରିଚାଳନା ନେଇ ବଡ଼ ସଂଦେହ ସୃଷ୍ଟି ହେବ ।