ଓଡିଶାରେ ପ୍ରତ୍ୟେକ ଦିନ ୧୫ ହଜାର କରୋନା ପରୀକ୍ଷା କରିବାକୁ ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶ । ସୁରଟରୁ କେବଳ ଟ୍ରେନରେ ଫେରିବା ପାଇଁ ଅନୁମତି ଦେବେ ସରକାର, ଗ୍ରୀନ ଜୋନରେ କୃଷି, ଶିଳ୍ପ ଓ ଜୀବନ ଜୀବିକା ପାଇଁ କୋହଳ କରାଯିବ କଟକଣା ।
କନକ ବ୍ୟୁରୋ: ରାଜ୍ୟରେ ପ୍ରତିଦିନ ନମୁନା ପରୀକ୍ଷଣ ୧୫ହଜାରକୁ ବୃଦ୍ଧି କରିବା ପାଇଁ ପଦକ୍ଷେପ ନିଆଯିବ । ଆଜି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଭିଡିଓ କନଫରେନ୍ସିଂ ଜରିଆରେ ରାଜ୍ୟରେ କରୋନା ସଂକ୍ରମଣ ପରିସ୍ଥିତି ନେଇ ବରିଷ୍ଠ ଅଧିକାରୀଙ୍କ ସହିତ ସମୀକ୍ଷା କରିବା ପରେ ଏହି ନିର୍ଦ୍ଦେଶ ଦେଇଛନ୍ତି । ମୁଖ୍ୟତଃ ବାହାରୁ ଆସୁଥିବା ଶ୍ରମିକଙ୍କ ପାଇଁ ଆବଶ୍ୟକୀୟ ବ୍ୟବସ୍ଥା କିପରି ଗ୍ରହଣ କରାଯାଉଛି ସେନେଇ ଆଲୋଚନା ହୋଇଥିଲା ।
Kanak News is now on WhatsApp
Join and get latest news updates delivered to you via WhatsApp
ତେବେ ଏଣିକି ସୁରତରୁ ଫେରୁଥିବା ଶ୍ରମିକମାନେ କେବଳ ଟ୍ରେନ ଯୋଗେ ହିଁ ଫେରିବା ପାଇଁ ସରକାର ଅନୁମତି ଦେବେ । ସୁରତରୁ ଶ୍ରମିକମାନେ ବସରେ ଫେରିବା ବେଳେ ଖାଇବା ପିଇବାରେ ଅସୁବିଧା ହେବା ସହ ଦୁର୍ଘଟଣା ଭଳି ସମସ୍ୟା ରହିଛି । ତେଣୁ ରାଜ୍ୟ ସରକାର ଟ୍ରେନରେ ଆସିବା ପାଇଁ ନିଷ୍ପତି ନେଇଛନ୍ତି । ଏଥିସହ ଗ୍ରୀନ ଜୋନରେ କୃଷି କାର୍ଯ୍ୟ, ଶିଳ୍ପ, ଜୀବନଜୀବିକା ଓ ପରିବହନକୁ ସ୍ୱାଭାବିକ କରିବା ପାଇଁ ନିର୍ଦ୍ଦେଶ ଦେଇଛନ୍ତି ନବୀନ ।
ଅନ୍ୟପଟେ ଶିଳ୍ପ ସଂସ୍ଥା ଗୁଡିକର ସମସ୍ୟାର ସମାଧାନ ପାଇଁ ଏକ ଆଦର୍ଶ ନୀତି ପ୍ରଣୟନ କରାଯିବ । ଚାଷୀ ଏବଂ ଏସଏଚଜିମାନଙ୍କ ଋଣ ସହାୟତା ବୃଦ୍ଧି କରାଯିବ । ଗଞ୍ଜାମ, କେନ୍ଦ୍ରାପଡା, ଭଦ୍ରକ, ବଲାଙ୍ଗିର, ଯାଜପୁର ଓ ବାଲେଶ୍ୱର ପରି ଜିଲ୍ଲାରୁ ଅଧିକ ଲୋକ ବାହାର ରାଜ୍ୟରେ କାମ କରୁଥିବାରୁ ତା ଉପରେ ସ୍ୱତନ୍ତ୍ର ଦୃଷ୍ଟି ଦିଆଯିବ ।