କନକ ବ୍ୟୁରୋ : ପୁଣି ଥରେ କରୋନା ସଂକ୍ରମଣ ଦିନକୁ ଦିନ ଯେପରି କାୟା ମେଲାଉଛି, ଦ୍ୱିତୀୟ ଲହରର ଭୟ ସେତିକି ବଢ଼ିବାରେ ଲାଗିଛି । ଦିନକରେ ଦେଶରେ ୨୬ ହଜାର ୨୯୧ ନୂଆ ପଜିଟିଭ୍ ମାମଲା ସାମନାକୁ ଆସିଛି । ମାର୍ଚ୍ଚ ୧୩ରେ- ୨୪ ହଜାର ୮୮୨ ନୂଆ ଆକ୍ରାନ୍ତ ଚିହ୍ନଟ ହୋଇଥିଲା । ମାର୍ଚ୍ଚ ୧୨ରେ ଏହି ସଂଖ୍ୟା ଥିଲା ୨୩ ହଜାର ୨୮୫ । ଗତ ୨୪ ଘଂଟା ଭିତରେ ଯେତିକି ମାମଲା ଆସିଛି, ତାହା ୮୫ ଦିନ ମଧ୍ୟରେ ସର୍ବାଧିକ । ଗତବର୍ଷ ଡିସେମ୍ବର ୨୦ ତାରିଖ ପରେ ଏହା ହେଉଛି ସବୁଠୁ ଅଧିକ ଦୈନିକ ସଂକ୍ରମଣ ।
Kanak News is now on WhatsApp
Join and get latest news updates delivered to you via WhatsApp
ଚିନ୍ତାର ବିଷୟ ହେଉଛି, ଗତ ଗୋଟିଏ ସପ୍ତାହରେ କରୋନା ସଂକ୍ରମଣ ମାମଲା ପୂର୍ବ ସପ୍ତାହ ତୁଳନାରେ ୩୩ ପ୍ରତିଶତ ବଢିଛି । ରବିବାର ଶେଷ ହୋଇଥିବା ସପ୍ତାହରେ ଦେଢଲକ୍ଷରୁ ଅଧିକ ମାମଲା ରେକର୍ଡ କରାଯାଇଛି । ଏହି ସମୟରେ କରୋନା ଜନିତ ମୃତ୍ୟୁ ମାମଲାରେ ୨୮ ପ୍ରତିଶତ ବୃଦ୍ଧି ହୋଇଛି । ଯାହା ଗତ ୬ ସପ୍ତାହରେ ସର୍ବାଧିକ । ଗତ ୨୪ ଘଂଟାରେ କରୋନାରେ ପ୍ରାଣ ହରାଇଛନ୍ତି ୧୧୮ ଜଣ । ତେବେ ଗତ ଗୋଟିଏ ସପ୍ତାହରେ ୮୮୭ ଜଣଙ୍କ କରୋନାରେ ମୃତ୍ୟୁ ହୋଇଛି ।
ଏବେ ଯଦି ସାପ୍ତାହିକ କରୋନା ସଂକ୍ରମଣକୁ ବିଚାର କରିବା, ଫେବ୍ରୁଆରୀ ମଧ୍ୟ ଭାଗରୁ ଦେଶରେ କରୋନାର ସଂକ୍ରମଣ ଦ୍ରୁତ ଗତିରେ ବୃଦ୍ଧି ପାଇବାରେ ଲାଗିଛି । ଫେବ୍ରୁଆରୀ ୮ରୁ ୧୪ ଗୋଟିଏ ସପ୍ତାହରେ ଦେଶରେ ୭୭ ହଜାର ୨୮୪ କରୋନା ସଂକ୍ରମଣ ଚିହ୍ନଟ ହୋଇଥିଲା । ଯାହା ଗତବର୍ଷ ସେପ୍ଟେମ୍ବର ପରେ ଥିଲା ସର୍ବନିମ୍ନ । ହେଲେ ଏହାପରଠାରୁ କ୍ରମାଗତ ଭାବେ ବଢିଚାଲିଛି କରୋନା ସଂକ୍ରମଣ ।
ବିଶେଷ କରି ମାର୍ଚ୍ଚ ଆରମ୍ଭରୁ ଦ୍ରୁତ ବେଗରେ ବଢୁଛି ସଂକ୍ରମଣ ମାମଲା । ମାର୍ଚ୍ଚ ପ୍ରଥମ ସପ୍ତାହ ଅର୍ଥାତ ୧ରୁ ୭ ତାରିଖ ମଧ୍ୟରେ ଦେଶରେ ୧ ଲକ୍ଷ ୧୭ ହଜାର ୧୯୮ଟି ନୂଆ ସଂକ୍ରମଣ ମାମଲା ଚିହ୍ନଟ ହୋଇଥିଲା । ଯାହା ଗତ ୬ ସପ୍ତାହରେ ଥିଲା ସର୍ବାଧିକ । ସେହିପରି ମାର୍ଚ୍ଚ ୮ରୁ ୧୪ ତାରିଖ ଗୋଟିଏ ସପ୍ତାହରେ ଦେଶରେ ୧ ଲକ୍ଷ ୫୫ ହଜାର ୯୦୯ଟି ନୂଆ କରୋନା ସଂକ୍ରମଣ ଚିହ୍ନଟ ହୋଇଛି । ଏହା ମଧ୍ୟ ଗତ ୧୨ ସପ୍ତାହରେ ସର୍ବାଧିକ । ଗୋଟିଏ ସପ୍ତାହରେ ଦେଢଲକ୍ଷରୁ ଅଧିକ କରୋନା ସଂକ୍ରମିତ ହେବା ଦେଶରେ ଦ୍ୱିତୀୟ ଲହର ଆରମ୍ଭ ହେବା ନେଇ ଭୟ ବଢାଇ ଦେଇଛି ।
ଏହି ସମୟ ମଧ୍ୟରେ କରୋନା ଜନିତ ମୃତ୍ୟୁ ସଂଖ୍ୟା ମଧ୍ୟ ବଢିଛି । ଚଳିତବର୍ଷ ଆରମ୍ଭରୁ ଅର୍ଥାତ ଜାନୁଆରୀ ପ୍ରଥମ ସପ୍ତାହରେ କରୋନା ଜନିତ ମୃତ୍ୟୁ ୧ ହଜାରରୁ ଅଧିକ ରହିଥିଲା । ହେଲେ ଫେବ୍ରୁଆରୀ ବେଳକୁ ଏହା ଅଧା ହୋଇଯାଇଥିଲା । ଫେବ୍ରୁଆରୀ ପ୍ରଥମ ସପ୍ତାହ ଅର୍ଥାତ ୧ରୁ ୭ ଫେବ୍ରୁଆରୀ ଗୋଟିଏ ସପ୍ତାହରେ ୬୮୦ ଜଣଙ୍କର କରୋନାରେ ମୃତ୍ୟୁ ରେକର୍ଡ କରାଯାଇଥିଲା । ସେହିପରି ପରବର୍ତୀ ସପ୍ତାହରେ ଏହା ଥିଲା ୬୫୦ । ଫେବ୍ରୁଆରୀ ତୃତୀୟ ସପ୍ତାହରେ ମଧ୍ୟ ୬୬୦ ଜଣଙ୍କ କରୋନାରେ ମୃତ୍ୟୁ ହୋଇଥିଲା ।
ଫେବ୍ରୁଆରୀ ୨୨ରୁ ୨୮ ମଧ୍ୟରେ ଏହି ସଂଖ୍ୟା ସାମାନ୍ୟ ବଢିବା ଆରମ୍ଭ କଲା । ଏହି ସସ୍ତାହରେ ସାରା ଦେଶରେ ମୋଟ୍ ୭୭୬ ଜଣଙ୍କ କରୋନାରେ ମୃତ୍ୟୁ ହୋଇଥିଲା । ମାର୍ଚ୍ଚ ଆରମ୍ଭରୁ କରୋନା ମୃତ୍ୟୁ ସାମାନ୍ୟ କମି ପୁଣି ଦ୍ୱିତୀୟ ସପ୍ତାହ ବେଳକୁ ଏଥିରେ ଉନ୍ନତି ହୋଇଛି । ଅର୍ଥାତ ମାର୍ଚ୍ଚ ୮ରୁ ୧୪ ଗୋଟିଏ ସପ୍ତାହରେ ସାରାଦେଶରେ ୮୮୭ ଜଣଙ୍କ ମୃତ୍ୟୁ ହୋଇଥିବା ଜଣାପଡିଛି । ଜାନୁଆରୀ ଶେଷ ସପ୍ତାହ ବେଳକୁ ଏହି ହାରରେ କରୋନା ମୃତ୍ୟୁ ରେକର୍ଡ କରାଯାଇଥିଲା ।