ଭଲପାଇବା ଆଗରେ ହାର ମାନିଲା ଭୂତାଣୁ । ବାହାଘର ଦିନ କନ୍ୟା ପଜିଟିଭ୍ ପରେ ବି ହାତ ଛାଡ଼ିଲାନି ବର । ପିପିଇ କିଟ ଭିତରେ ହେଲା ବାହାଘର, ସାକ୍ଷୀ ରହିଲା କୋଭିଡ୍ ସେଣ୍ଟର ।
କନକ ବ୍ୟୁରୋ: ବେଦୀ ବନ୍ଧା ହୋଇଛି, ମନ୍ତ୍ରପାଠ ଚାଲିଛି, ହୋମ ନିଆଁକୁ ସାକ୍ଷୀ ରଖି ବେକରେ ବରଣମାଳା ପକାଇ ପାଖାପାଖି ବସିଛନ୍ତି ବରକନିଆଁ । ମୁଣ୍ଡରେ ଅଛି ମୁକୁଟ, ମଥାରେ ଲାଗିଛି ସ୍ୱାମୀ ହାତର ସିନ୍ଦୂର ଆଉ ସବୁ ରୀତିନିତି ସରିବା ପରେ ଦୁହେଁ ସାଜିଛନ୍ତି ସ୍ୱାମୀ ସ୍ତ୍ରୀ । ବିବାହର ଏ ବିରଳ ଦୃଶ୍ୟରେ ଆପଣଙ୍କ ଆଖି ବରକନ୍ୟାଙ୍କ ପୋଷାକ ଉପରେ ଲାଖି ରହିଥିବ । ଆଜ୍ଞା ହଁ ! ପିପିଇ କିଟ୍ ଭିତରେ ପଡିଛି ହାତଗଣ୍ଠି । କୋଭିଡ ସେଣ୍ଟର ଭିତରେ କରୋନା କବଚ ପିନ୍ଧି ଦୁହିଁଙ୍କ ଜୀବନ ହୋଇଛି ଛନ୍ଦାଛନ୍ଦି । ଆଉ ଭଲପାଇବାର ଭରସା ଆଗରେ ହାର ମାନିଛି ଭୂତାଣୁ । ସଂକ୍ରମଣର ସୂତା ଛିଡାଇ ଯୋଡି ଯାଇଛି ନୂଆ ଜୀବନ, ଆରମ୍ଭ ହୋଇଛି ନୂଆ ସମ୍ପର୍କ…
Kanak News is now on WhatsApp
Join and get latest news updates delivered to you via WhatsApp
ରାଜସ୍ଥାନ ବାରା ସାହାବାଦ କୋଭିଡ ସେଣ୍ଟରେ ରବିବାର ଏମିତି ଏକ ବିବାହ ହୋଇଛି ଯାହା ସାରା ଦେଶରେ ଚର୍ଚ୍ଚାରେ ରହିଛି । ଏବେ ବିବାହ ଋତୁ ଚାଲିଥିବାରୁ ଅନେକ ଯୁବକ ଯୁବତୀ ବିବାହ କରୁଛନ୍ତି । ରବିବାର ଦିନ ଏ ପ୍ରେମୀ ଯୋଡିଙ୍କ ବିବାହ ହେବାର ଥିଲା । ମାତ୍ର ଦୁର୍ଭାଗ୍ୟର କଥା ବାହାଘର ଦିନ କନ୍ୟା କରୋନା ପଜିଟିଭ୍ ହୋଇଗଲା । ଟେଷ୍ଟ ରିପୋର୍ଟ ପଜିଟିଭ୍ ଆସିବା ପରେ ସମସ୍ତଙ୍କ ମୁଣ୍ଡରେ ଚଡକ ପଡିଲା । କେମିତି ହେବ ବାହାଘର, ଶୁଭ କାମ ଘୁଞ୍ଚିଗଲେ କଣ ହେବ ପରିସ୍ଥତି ? ଏ ସବୁ ଭାଳେଣୀ ଭିତରେ ଭୂତାଣୁର ଚକ୍ରବ୍ୟୁହ୍ ଭେଦି ଭରସା ଦେଇଥିଲା ବର । ପଜିଟିଭ ପରେ ବି ହାତ ଛାଡ଼ି ନଥିଲା ବର । ସଂକ୍ରମଣ ସତ୍ୱେ ବି ସାତ ଜନମର ସାଥୀ କରିବାକୁ ଦେଇଥିଲା ଦୃଢ ପ୍ରତିଶ୍ରୁତି ।
ବାସ୍ ତାପରେ ଦେଶ ଦେଖିଥିଲା ଏଭଳି ଏକ ନିଆରା ଦୃଶ୍ୟ । କନ୍ୟା ସଂକ୍ରମିତ ଥିବାରୁ ତାଙ୍କୁ କୋଭିଡ ସେଣ୍ଟର ପଠାଇ ଦିଆଗଲା । ତାଙ୍କ ସହ ବରଙ୍କୁ ବି । ଉଭୟ କୋଭିଡ ସେଣ୍ଟରରେ ପହଞ୍ଚିବା ପରେ ସରକାରଙ୍କ କୋଭିଡ୍ ଗାଇଡଲାଇନ ଅନୁସାରେ ଉଭୟଙ୍କ ବିବାହ ହୋଇଛି । ବର-କନ୍ୟାଙ୍କ ସହ ପୂଜକ ଓ ପରିବାର ସଦସ୍ୟ ପିପିଇ କିଟ୍ ପିନ୍ଧି ବିବାହ କରିଥିଲେ । ଆଉ ସଂକ୍ରମଣ ଭିତରେ ସବୁଦିନ ପାଇଁ ସାକ୍ଷୀ ହୋଇ ରହିଗଲା କୋଭିଡ୍ ସେଣ୍ଟର । ମହାମାରୀ ବେଳେ ମରୁଭୂମି ରାଇଜରୁ ଆସିଥିବା ନୂଆ ଜୀବନ ଆରମ୍ଭର ନିଆରା କାହାଣୀ ଏବେ ସବୁଠି ଚର୍ଚ୍ଚାରେ ରହିଛି ।