ଶହେ ଦିନରେ ଭାରତରେ କରୋନା ସଂକ୍ରମଣ ସୃଷ୍ଟି କଲା ନୂଆ ରେକର୍ଡ । ଦିନକରେ ୩୫ ହଜାରରୁ ଅଧିକ ଆକ୍ରାନ୍ତ ଚିହ୍ନଟ । ଓଡିଶାରୁ ଗୋଟିଏ ଦିନରେ ୮୪ ସଂକ୍ରମିତ ।

130

କନକ ବ୍ୟୁରୋ: ଦେଶରେ କରୋନା ସଂକ୍ରମଣର ତଥ୍ୟ ପୁଣିଥରେ ଭୟ ଓ ଆଶଙ୍କାର ବାତାବରଣ ସୃଷ୍ଟି କରିଛି । ଯେଉଁ ହାରରେ ଭାରତରେ କରୋନା ସଂକ୍ରମଣ ବଢିଛି, ତାହା ଗତ ୧୦୦ ଦିନର ରେକର୍ଡ ଭାଙ୍ଗିଛି । ଆଉ ଏହି ସଂକ୍ରମଣ ହାରରେ ସବୁଠୁ ଅଧିକ ପ୍ରଭାବିତ ହୋଇଛି ମହାରାଷ୍ଟ୍ର । ସାରା ଦେଶରେ ଗୋଟିଏ ଦିନରେ ଯେତିକି ସଂକ୍ରମଣ ହୋଇଛି, ତାର ୬୪ ପ୍ରତିଶତ ସଂକ୍ରମଣ କେବଳ ମହାରାଷ୍ଟ୍ରରେ ହୋଇଛି । ଏହାରି ଭିତରେ ଓଡିଶାରେ ୨୪ ଘଂଟା ମଧ୍ୟରେ ସଂକ୍ରମିତ ହୋଇଛନ୍ତି ୮୪ ଜଣ । ଆଉ ତା ଭିତରେ ଚିନ୍ତାଜନକ ପରିସ୍ଥିତି ସୃଷ୍ଟି କରିଛି କଟକର କରୋନା ଆକ୍ରାନ୍ତଙ୍କ ସଂଖ୍ୟା ।

୧୦୦ଦିନରେ କରୋନା କଲା ନୂଆ ରେକର୍ଡ । ଗତ ୨୪ ଘଂଟାରେ କରୋନା ସଂକ୍ରମଣକୁ ଦେଖିଲେ କେବଳ ଭାରତରେ ୩୫ ହଜାର ୮୮୬ ନୂଆ କରୋନା ସଂକ୍ରମିତ ହୋଇଛନ୍ତି । ଯାହାକି ୧୦୨ ଦିନ ଭିତରେ ସର୍ବାଧିକ । ମହାରାଷ୍ଟ୍ରରୁ ୨୩ ହଜାର ୧୭୯ ନୂଆ ସଂକ୍ରମିତ ଚିହ୍ନଟ ହୋଇଛନ୍ତି, ଯାହାକି ମୋଟ ସଂକ୍ରମଣର ୬୪ ପ୍ରତିଶତ । ଯଦି ଓଡିଶା କଥା ଦେଖିବା ତେବେ ୨୪ ଘଂଟା ମଧ୍ୟରେ …

-ରାଜ୍ୟରେ ୮୪ ଜଣ ନୂଆ ଆକ୍ରାନ୍ତ ଚିହ୍ନଟ ହୋଇଛନ୍ତି ।
-ସଂଗରୋଧରୁ ୪୯ ଜଣ ଟିହ୍ନଟ ହୋଇଛନ୍ତି
-ସ୍ଥାନୀୟ ଅଂଚଳରୁ ଚିହ୍ନଟ ହୋଇଛନ୍ତି ୩୫ ଆକ୍ରାନ୍ତ
-କଟକ ଜିଲ୍ଲାରେ ବଢିଛି କରୋନା ସଂଖ୍ୟା
-କଟକ ଜିଲ୍ଲାରୁ ଚିହ୍ନଟ ହୋଇଛନ୍ତି ୨୫ ଆକ୍ରାନ୍ତ

ରାଜ୍ୟରେ ହଠାତ ସଂକ୍ରମଣ ସଂଖ୍ୟା ବଢିବା ଏବଂ କଟକରେ ସଂକ୍ରମିତଙ୍କ ସଂଖ୍ୟା କୋଉଠି ନା କୋଉଠି ପୁଣି ଥରେ କରୋନାକୁ ନେଇ ଭୟ ସୃଷ୍ଟି କରିଛି । ବଡ କଥା ହେଲା, କଟକର ଏକ ଘରୋଇ କଲେଜରେ ୧୨ଜଣ କୋଭିଡ ପଡିଟିଭ ବାହାରିବା ପରେ ଚିନ୍ତା ବଢିଛି । ଏହି ୧୨ ଜଣଙ୍କ ମଧ୍ୟରେ ଛାତ୍ରଛାତ୍ରୀ, ଶିକ୍ଷକ, ଆଡମିନ କର୍ମଚାରୀ । ସମସ୍ତ ପଜିଟିଭଙ୍କୁ ଏବେ କରୋନା ଗାଇଡଲାଇନ ଅନୁସାରେ ସଂଗରୋଧରେ ରଖାଯାଇଛି । ଆଜି କଲେଜରେ ଥିବା ଅନ୍ୟ ସମସ୍ତ ଛାତ୍ରଛାତ୍ରୀ ଏବଂ କର୍ମଚାରୀଙ୍କ କରୋନା ପରୀକ୍ଷା କରାଯାଉଛି । ଯାହାଙ୍କର ରିପୋର୍ଟ ପଜିଟିଭ୍ ଆସିବ ସେମାନଙ୍କୁ ସଂଗରୋଧରେ ରଖାଯିବ, ଅନ୍ୟମାନଙ୍କୁ ଘରକୁ ଯିବାକୁ ଦିଆଯିବ ବୋଲି କୁହାଯାଇଛି । ଗୋଟିଏ ପଟେ ଟିକାକରଣ ପ୍ରକ୍ରିୟା ଆଗେଇ ଚାଲିଥିବା ବେଳେ ଅନ୍ୟପଟେ ସଂକ୍ରମଣ ସଂଖ୍ୟା ବଢିବା କରୋନା ଲେଉଟାଣିର ନୂଆ ଧାରା ସୃଷ୍ଟି କରିଥିବା ଅନୁମାନ କରାଯାଉଛି ।