ଚିନ୍ତା ବଢାଉଛି କରୋନା ସଂକ୍ରମଣ । କେରଳ ଓ ମହାରାଷ୍ଟ୍ରରେ ପୁଣି ଉପର ମୁହାଁ କରୋନା ଗ୍ରାଫ । ଦେଶରେ ଗତ ୨୪ ଘଣ୍ଟାରେ ୪୨, ୭୬୬ ଜଣ ଆକ୍ରାନ୍ତ ଚିହ୍ନଟ ।
କନକ ବ୍ୟୁରୋ: କରୋନା ମହାମାରୀର ଦ୍ୱିତୀୟ ଲହର ଶେଷ ବି ହୋଇନି ଏବେ ତୃତୀୟ ଲହରକୁ ନେଇ ଚିନ୍ତା ଦେଖା ଦେଲାଣି । କେରଳ ଓ ମହାରାଷ୍ଟ୍ରରେ ସଂକ୍ରମଣ ସଂଖ୍ୟା କମିବା ପରେ ହଠାତ ପୁଣି ଉପର ମୁହାଁ ହେବା ଦେଶରେ ତୃତୀୟ ଲହରର ଆଶଙ୍କାକୁ ବଢାଇ ଦେଇଛି । ଗତ ୨୪ ଘଣ୍ଟାରେ ଦେଶରେ ମୋଟ ୪୨, ୭୬୬ ଜଣ ଆକ୍ରାନ୍ତ ଚିହ୍ନଟ ହୋଇଛନ୍ତି । ଏଥିରୁ ୧୩, ୫୬୩ ଆକ୍ରାନ୍ତ କେରଳର ହୋଇଥିବାବେଳେ ୮,୯୯୨ ଆକ୍ରାନ୍ତ ମହାରାଷ୍ଟ୍ରର ରହିଛନ୍ତି । ଯାହାକୁ ନେଇ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟ ଚିନ୍ତା ପ୍ରକଟ କରିଛି ।
Kanak News is now on WhatsApp
Join and get latest news updates delivered to you via WhatsApp
ସେପଟେ ଗତ ୨୪ ଘଣ୍ଟାରେ ରେକର୍ଡ ହୋଇଥିବା କରୋନା ମିଟରରେ ମୃତକଙ୍କ ସଂଖ୍ୟା ବୃଦ୍ଧି ପାଇଥିବା ଦେଖିବାକୁ ମିଳିଛି । ଶୁକ୍ରବାର ଦେଶରେ ୧,୨୦୬ଜଣ କରୋନା ମହାମାରୀରେ ମୃତ୍ୟୁ ବରଣ କରିଛନ୍ତି । ଏହାରି ସହିତ ଦେଶରେ ମୋଟ ମୃତ୍ୟୁ ସଂଖ୍ୟା ୪,୦୭,୧୪୫ରେ ପହଁଚିଛି । କରୋନା ମହାମାରୀରେ ମୋଟ ଆକ୍ରାନ୍ତ ସଂଖ୍ୟା ୩,୦୭,୯୫,୭୧୬ରେ ପହଁଚିଛି ।
ଗୋଟିଏ ପଟେ ଦେଶରେ କରୋନା ସଂକ୍ରମଣ ଆୟତ୍ତକୁ ଆସୁନାହିଁ ସେପଟେ ପର୍ଯ୍ୟଟନ ସ୍ଥଳୀରେ ଲୋକ ଭିଡ ଜମାଇବା ଆରମ୍ଭ କଲେଣି । ନା ଅଛି ମାସ୍କ, ନା ସାମାଜିକ ଦୂରତା । ଲୋକଙ୍କ ଏଭଳି ବେଖାତିର ମନୋଭାବ ଦେଶରେ କରୋନାର ତୃତୀୟ ଲହରର ଆଶଙ୍କାକୁ ବଢାଇ ପାରେ ବୋଲି କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟ ସତର୍କ କରାଇଛି ।
କେରଳ ଓ ମହାରାଷ୍ଟ୍ରରେ କରୋନା ସଂକ୍ରମଣ ଉପରମୁହାଁ ହେଉଥିବାବେଳେ, ଦେଶର ଅନ୍ୟ ସ୍ଥାନରେ ଲୋକଙ୍କ ଗହଳି ସରକାରଙ୍କ ପାଇଁ ଚିନ୍ତାର ବିଷୟ ପାଲଟିଛି । ଉତ୍ତରପ୍ରଦେଶରେ ଲକଡାଉନ କଟକଣା କୋହଳ ହେବା ପରେ ହରିଦ୍ୱାର ଘାଟରେ ଲୋକଙ୍କ ଗହଳି ଦେଖିବାକୁ ମିଳିଛି । ଗଙ୍ଗାରେ ବୁଡ ପକାଇବା ପାଇଁ ଲୋକଙ୍କ ଏପରି ଗହଳି କୋଭିଡ୍ର ସବୁ ଗାଇଡଲାଇନକୁ ଭାଙ୍ଗି ଦେଇଛି । ସେହିପରି ସିମଲାରେ ପର୍ଯ୍ୟଟକଙ୍କ ଭିଡ କୋଭିଡ୍ ନିୟମାବଳୀକୁ ଖୋଲାଖୋଲି ଚ୍ୟାଲେଞ୍ଜ କରିଛି । ପର୍ଯ୍ୟଟନ ସ୍ଥାନରେ ଜମୁଥିବା ଲୋକଙ୍କ ଏଭଳି ଭିଡକୁ ନେଇ ଚିନ୍ତା ପ୍ରକାଶ କରିଛି କେନ୍ଦ୍ର ସ୍ୱାସ୍ଥ୍ୟମନ୍ତ୍ରାଳୟ । ପର୍ଯ୍ୟଟନ କ୍ଷେତ୍ରରେ ଲୋକଙ୍କ ଗହଳିକୁ ନେଇ କେନ୍ଦ୍ରର ତାଗିଦ୍ ପରେ ଉତ୍ତରାଖଣ୍ଡ ଓ ହିମାଚଳରେ କୋଭିଡ୍ ନିୟମାବଳୀକୁ ଗୁରୁତ୍ୱ ଦିଆଯାଇଛି । ଯାହାକୁ ଉଲ୍ଲଂଘନ କଲେ ଜରିମାନା ସହ ଜେଲଦଣ୍ଡ ପାଇଁ ଉଭୟ ରାଜ୍ୟ ସରକାର ଘୋଷଣା କରିଛନ୍ତି ।