ବିପଦରେ ବିଶ୍ୱ ଐତିହ୍ୟ କୋଣାର୍କର କାରୁକାର୍ଯ୍ୟ : ହଟୁଛି ସୂକ୍ଷ୍ମ କାରୁକାର୍ଯ୍ୟ, ଲାଗୁଛି ସାଧା ପଥର
କନକ ବ୍ୟୁରୋ : କୋଣାର୍କ ମନ୍ଦିରରେ ଶୋଭା ପାଉଥିବା କାରୁକାର୍ଯ୍ୟପୂର୍ଣ୍ଣ ମୂର୍ତ୍ତି ସଂଖ୍ୟା ଦିନକୁ ଦିନ କମିବାରେ ଲାଗିଛି । ସୂକ୍ଷ୍ମ କାରୁକାର୍ଯ୍ୟ ହଜିଯାଇ ସେ ସ୍ଥାନରେ ଶୋଭା ପାଇଲାଣି ସାଧା ପଥର । ଲୁହା ରଡ ଭାରାରେ ଘୋଡ଼େଇ ରଖି ବର୍ଷ ବର୍ଷ ଧରି କି ମରାମତି କରାଯାଉଛି କେଜାଣି, ବିଶ୍ୱ ଐତିହ୍ୟସ୍ଥଳୀ ଯେକୌଣସି ମୁହୂର୍ତରେ ପଥରସ୍ତୂପରେ ପରିଣତ ହୋଇଯାଇପାରେ, ଏଭଳି ଆଶଙ୍କା ସୃଷ୍ଟି ହେଲାଣି ହେଲାଣି । ବାର ଶହ ବଢ଼େଇଙ୍କ ନିହାଣ ମୁନରୁ ସୃଷ୍ଟି ବିଶ୍ୱ ଐତିହ୍ୟ କୋଣାର୍କ ସୂର୍ଯ୍ୟମନ୍ଦିରକୁ ବରବାଦ କରିଦେବା ଲାଗି ଏମିତି ଢଙ୍ଗରେ ବଡ଼ ଧରଣର ଷଡ଼ଯନ୍ତ୍ର ମୁଣ୍ଡ ଟେକିଛି ।
Kanak News is now on WhatsApp
Join and get latest news updates delivered to you via WhatsApp
ଗୋଟିଏ କି ଦୁଇଟି ନୁହେଁ, ମୁଖଶାଳାର ୪୦ ପ୍ରତିଶତ କାରୁକାର୍ଯ୍ୟ ହଜିଯାଇ ତା ସ୍ଥାନରେ ସାଧା ପଥରଖଣ୍ଡ ଲଗାଇ ଦିଆଯାଇଛି । ସ୍ଥିତି ଅତ୍ୟନ୍ତ ଗମ୍ଭୀର ଆଡ଼କୁ ଗତି କରୁଥିଲେ ହେଁ କେନ୍ଦ୍ର ଓ ରାଜ୍ୟ ସରକାର ବେଫିକର । ବିଶ୍ୱବାସୀ ଥରୁଟିଏ କୋଣାର୍କ ମନ୍ଦିର ଦେଖିବାର ଆବଶ୍ୟକତା ରହିଛି ବୋଲି ମତ ରଖିଥିବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଓ ତାଙ୍କ ସରକାର କୋଣାର୍କର ଦୁଃସ୍ଥିତି ନେଇ ଥରୁଟିଏ ବି ସମୀକ୍ଷା କରିନାହାନ୍ତି । ଏଏସ୍ଆଇର ମନମାନି, ଦାୟିତ୍ୱହୀନତା ଏବେ ଐତିହ୍ୟକୁ ଇତିହାସ କରିଦେବା ଲାଗି ଯେମିତି ଅଣ୍ଟା ଭିଡ଼ିଛି । ଏଠି ସଂସ୍କୃତିପ୍ରିୟ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ ତାଙ୍କ ସରକାର ବି ଏଭଳି ଐତିହ୍ୟ କୀର୍ତିରାଜି ନଷ୍ଟଭ୍ରଷ୍ଟ ହେଉଥିବା ଜାଣିଛନ୍ତି। ହେଲେ ନିର୍ବିକାର । କାହାର ଏଥିପ୍ରତି ଖାତିର ନାହିଁ । ଆଉ କିଛି ବର୍ଷ ପରେ କୋଣାର୍କ କେବଳ ପୁସ୍ତକର ଛବି ହୋଇରହିଯିବ ।
ଯେଉଁ ଓଡ଼ିଶାରୁ ଦ୍ୱିତୀୟ କୋଣାର୍କର ସ୍ବର ଉଠୁଛି, ଆଜି ବି ଗାଁ ଗଣ୍ଡାରେ ହଜାର ହଜାର ଶିଳ୍ପୀ ପଥରରେ ଆକର୍ଷଣୀୟ କଳାକୃତୀ କରିବାର କ୍ଷମତା ରଖିଛନ୍ତି, ସେଠାରେ କୋଣାର୍କରଏଭଳି ଦୁଃସ୍ଥିତି କାହିଁକି ? ଏଏସଆଇ କର୍ତୃପକ୍ଷ କାହା ହାତରେ ବିଶ୍ୱ ପ୍ରସିଦ୍ଧ କୋଣାର୍କର ଐତିହ୍ୟ କୀର୍ତିରାଜି ସୁରକ୍ଷା ଦାୟିତ୍ୱ ଛାଡିଛନ୍ତି ? କେନ୍ଦ୍ର ସଂସ୍କୃତି ଓ ପର୍ୟ୍ୟଟନ ବିଭାଗ, ରାଜ୍ୟ ସରକାରଙ୍କ ପର୍ୟ୍ୟଟନ ବିଭାଗ, ସର୍ବୋପରି ଉଭୟ ପ୍ରତ୍ନତତ୍ୱ ସଂସ୍ଥା କୋଣାର୍କ ପ୍ରତି ଏତେ ବିମୁଖ ହୋଇଇପଡିଛନ୍ତି କାହିଁକି ?
କୋଣାକ ସୁରକ୍ଷା ସମିତି ଅଭିଯୋଗ କରିଛି, ବିଶ୍ୱ ଐତିହ୍ୟ ତାଲିକାରୁ କୋଣାର୍କକୁ ବାଦ ଦେବା ଲାଗି ବିଧିବଦ୍ଧ ଷଡ଼ଯନ୍ତ୍ର ଆରମ୍ଭ ହୋଇଛି । ଏଏସଆଇର ଅଣଓଡ଼ିଆ ଅଧିକାରୀମାନେ ଓଡ଼ିଆଜାତିର ଏହି କୀର୍ତିରାଜି ପ୍ରତି ବୈମାତୃକ ମନୋଭାବ ପୋଷଣ କରିଚାଲିଛନ୍ତି । ସୂର୍ଯ୍ୟମନ୍ଦିରର ମୁଖଶାଳା ଦିନକୁ ଦିନ ବିପଦସ˚କୁଳ ଅବସ୍ଥାକୁ ଚାଲିଯାଉଛି । ଅବକ୍ଷୟ ଦ୍ରୁତ ଗତିରେ ହେଉଛି ।