ଭାରତ ଯୋଡ ଯାତ୍ରା : ଲୋକଙ୍କ ମନ କିଣିଥିବା କିଛି ଘଟଣା । ଜାଣନ୍ତୁ, ରାହୁଲଙ୍କ ଟି-ସାର୍ଟ ପିନ୍ଧିବା ପଛର କାହାଣୀ
କନକ ବ୍ୟୁରୋ : ୧୩୬ ଦିନ ୩୫୭୦ କିଲୋମିଟର । କନ୍ୟାକୁମାରୀରୁ ଆରମ୍ଭ ହୋଇଥିବା କଂଗ୍ରେସର ଭାରତ ଯୋଡ ଯାତ୍ରା କାଶ୍ମୀରରେ ଆଜି ସମାପ୍ତ ହୋଇଛି । ଏହି ଯାତ୍ରାରେ କଂଗ୍ରେସର ପୁର୍ବତ୍ତନ ଅଧ୍ୟକ୍ଷ ୧୨ଟି ରାଜ୍ୟ ଏବଂ ୨ଟି କେନ୍ଦ୍ରଶାସିତ ଅଞ୍ଚଳ ଦେଇ ଯାତ୍ରା କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
କଂଗ୍ରେସ ସାଂସଦ ରାହୁଲ ଗାନ୍ଧି ଗତବର୍ଷ ସେପ୍ଟେମ୍ବର ୭ତାରିଖରେ ତାମିଲନାଡୁର କନ୍ୟାକୁମାରୀରୁ ଭାରତ ଯୋଡ ଯାତ୍ରା ଆରମ୍ଭ କରିଥିଲେ । ଏହା ପରେ ଏହି ଯାତ୍ରା ୧୨ଟି ରାଜ୍ୟ ଏବଂ ୨ଟି କେନ୍ଦ୍ରଶାସିତ ଅଞ୍ଚଳ ଦେଇ କାଶ୍ମୀରରେ ପହଞ୍ଚିଥିଲା । ଏହି ଯାତ୍ରାରେ ରାହୁଲ ଗାନ୍ଧୀ କହିଛନ୍ତି, ଏହି ଯାତ୍ରାରେ ମୁଁ ଅନେକ ଲୋକଙ୍କ ସହ ଭେଟିଛି । ସେମାନଙ୍କ ସହ କଥାବାର୍ତ୍ତା ମଧ୍ୟ ହୋଇଛି । ଆଉ ଲୋକଙ୍କ ସହ ମିଶିବାର ଯେଉଁ ଅନୁଭବ ରହିଛି, ତାହା ମୁଁ ଶବ୍ଦରେ ବୟାନ କରିପାରିବି ନାହିଁ । ଦେଶରୁ ହିଂସା ଏବଂ ଘୃଣାଭାବକୁ ହଟାଇବା ଏହି ଯାତ୍ରାର ମୂଖ୍ୟ ଉଦ୍ଦେଶ୍ୟ ଥିଲା ।
୧୩୬ ଦିନର ଏହି ଯାତ୍ରାରେ ରାହୁଲ ଗାନ୍ଧୀ ୧୨ଟି ସଭାକୁ ସମ୍ବୋଧୀତ କରିଛନ୍ତି । ଏହା ସହିତ ୧୦୦ରୁ ଅଧିକ କର୍ଣ୍ଣର ମିଟିଂ ଏବଂ ୧୩ଥର ପ୍ରେସ କନଫରେନ୍ସ କରିଛନ୍ତି ଏହା ବାଦ ୧୦୦ରୁ ଅଧିକ ସିଟିଂ ଇଣ୍ଟରାକ୍ସନ୍ କରିଛନ୍ତି । ଏହି ଭାରତ ଯୋଡ ଯାତ୍ରାରେ କଂଗ୍ରେସର ପୂର୍ବତ୍ତନ ଅଧ୍ୟକ୍ଷ ସୋନିଆ ଗାନ୍ଧୀ ଏବଂ ପ୍ରିୟଙ୍କା ଗାନ୍ଧୀ ମଧ୍ୟ ଯୋଗ ଦେଇଥିଲେ ।
ତେବେ ଏହି ଭାରତ ଯୋଡ ଯାତ୍ରାରେ ଅନେକ ଘଟଣା ଏପରି ଘଟିଥିଲା ଯାହା ଲୋକଙ୍କ ମନକୁ ଛୁଇଁଥିଲା । ଭାରତ ଯୋଡ ଯାତ୍ରାରେ ଯେତେବେଳେ ସୋନିଆ ଗାନ୍ଧୀ ସାମିଲ ହୋଇଥିଲେ ସେତେବେଳେ ଯାତ୍ରାରେ ସୋନିଆଙ୍କ ଜୋତାର ଲେସ୍ ଖୋଲିଯାଇଥିଲା । ରାହୁଲ ଗାନ୍ଧୀ ତଳେ ବସି ମାଆଙ୍କ ସୁ-ଲେସ୍ ବାନ୍ଧି ଦେଇଥିଲେ । ଯାହାର ଏକ ଫଟୋ ସୋସିଆଲ୍ ମିଡିଆରେ ବେସ୍ ଭାଇରାଲ ହୋଇଥିଲା । ଏହା ସହିତ ମଧ୍ୟପ୍ରଦେଶ ଇଂଦୋରରେ ଯାତ୍ରା ଆଗକୁ ବଢୁଥିବା ବେଳେ କିଛି ଲୋକ ‘ମୋଦି ମୋଦି’ ନାରା ଦେଇଥିଲେ । ସେଠାରେ ରାହୁଲ ଗାନ୍ଧୀ ମୋଦି ନାରା ଦେଉଥିବା ଲୋକଙ୍କ ଆଡକୁ ଏକ ଫ୍ଲାଇଂ କିସ୍ ଦେଇଥିଲେ । ଯାହାର ଭିଡିଓ ସୋସିଆଲ୍ ମିଡିଆରେ ମଧ୍ୟ ଭାଇରାଲ ହୋଇଥିଲା । ପଞ୍ଜାବରେ ଭାରତ ଯୋଡ ଯାତ୍ରା ଚାଲିଥିବା ବେଳେ ଯାତ୍ରାରେ ସିଦ୍ଧୁ ମୁସେୱାଲାଙ୍କ ବାପା ସାମିଲ ହୋଇଥିଲେ ଏହାର ଏକ ଫଟୋ ମଧ୍ୟ ସୋସିଆଲ ମିଡିଆରେ ଭାଇରାଲ ହୋଇଥିଲା ।
ଭାରତ ଯୋଡ ଯାତ୍ରାରେ ରାହୁଲ ପିନ୍ଧିଥିବା ଟି-ସାର୍ଟକୁ ନେଇ ମଧ୍ୟ ଚର୍ଚ୍ଚା ଜୋର ଧରିଥିଲା । ହାଡ ଭଙ୍ଗା ସିତରେ ରାହୁଲ ଗାନ୍ଧୀ କେମିତି ଗୋଟିଏ ଟି-ସାର୍ଟ ପିନ୍ଧି ଯାତ୍ରା କରୁଛନ୍ତି ବୋଲି ପ୍ରଶ୍ନ ମଧ୍ୟ ଉଠିଥିଲା । ଯାହାର ଯବାବରେ ରାହୁଲ କହିଥିଲେ, ଗୋଟେ ଦିନ ୩ଜଣ ପିଲା ମୋ ପାଖକୁ ଫଟୋ ଉଠାଇବା ପାଇଁ ଆସିଥିଲେ । ଜେତେବେଳେ ମୁଁ ତାଙ୍କ ସହ ଫଟୋ ଉଠାଇଲି ସେତେବେଳେ ସେମାନେ ଶୀତରେ ଥରୁଥିବାର ଦେଖିଲି । ସେବେଠାରୁ ନିସ୍ପତ୍ତି ନେଲି ଯେପର୍ଯ୍ୟନ୍ତ କୁନି କୁନି ଛୁଆ ସ୍ୱେଟର୍ ପିନ୍ଧିବା ପାଇଁ ସକ୍ଷମ ନହୋଇଛନ୍ତି ସେପର୍ଯ୍ୟନ୍ତ ମୁଁ ସୋଏଟର୍ ପିନ୍ଧିବି ନାହିଁ । ଆଉ ଠିକ୍ ଏହା ହିଁ ହୋଇଥିଲା । ଯାତ୍ରା ଶେଷ ପର୍ଯ୍ୟନ୍ତ ବି ରାହୁଲ ଗାନ୍ଧୀ ଶୀତବସ୍ତ୍ର ପରିଧାନ କରିନଥିଲେ ।
କେବଳ ଏତିକି ନୁହେଁ ରାହୁଲ ଗାନ୍ଧୀ ଏହି ଯାତ୍ରା ସମୟରେ ଜଣେ କୃଷକଙ୍କ ଘରେ କୃଷକଙ୍କ ସହ ମିଶି ଘାସ କାଟିଥିଲେ, ବଳଦ ଗାଡିରେ ବସି ଯାତ୍ରା କରିଥିଲେ । ଏହିପରି ଅନେକ ଘଟଣା ସାମ୍ନାକୁ ଆସିଛି ଯାହା ଲୋକଙ୍କ ମନକୁ ଛୁଇଁଛି ।