କନକ ବ୍ୟୁରୋ: ଅନିଶ୍ଚିତତାରେ ପଡିଯାଇଛି ୟୁକ୍ରେନ ଫେରନ୍ତା ଡାକ୍ତରୀ ଛାତ୍ରଛାତ୍ରୀଙ୍କ ଭବିଷ୍ୟତ । ନିଜର ଭବିଷ୍ୟତ ପାଇଁ ରାଜଧାନୀ ରାଜରାସ୍ତାରେ ଆନ୍ଦୋଳନ କରୁଛନ୍ତି । ଏପରିକି ସୁପ୍ରିମକୋର୍ଟ ଯାଏଁ ବି ଯାଇଛି ମାମଲା । ଦେଶରେ ମେଡିକାଲ କଲେଜରେ ପାଠ ପଢିବାର ସୁଯୋଗ ଦେବାକୁ ଗୁହାରୀ କରୁଛନ୍ତି ହଜାର ହଜାର ଛାତ୍ରଛାତ୍ରୀ । ସୁପ୍ରିମକୋର୍ଟରେ ଏହି ମାମଲା ଚାଲିଥିବାବେଳେ ଜାତୀୟ ମେଡିକାଲ କମିଶନ ନୋଟିସ ଅନେକଙ୍କୁ ଚିନ୍ତାରେ ପକାଇଛି । ଏନଏମସିର ନୋଟିସକୁ ବହୁ ଡାକ୍ତରୀ ଛାତ୍ରଛାତ୍ରୀ ନାପସନ୍ଦ କରୁଥିବାବେଳେ ଆସନ୍ତା ୧୫ ତାରିଖରେ ହେବାକୁ ଥିବା ସୁପ୍ରିମକୋର୍ଟଙ୍କ ନିର୍ଦେଶକୁ ଅପେକ୍ଷା କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଜାତୀୟ ମେଡିକାଲ କମିଶନ ନୋଟିସ ମୁତାବକ
ୟୁକ୍ରେନର ଡାକ୍ତରୀ କଲେଜ ଯେଉଁ ଦେଶରେ ଚାହିଁବେ ସେହି ଦେଶର ମେଡିକାଲ କଲେଜରେ ଅସ୍ଥାୟୀ ଭାବେ ଛାତ୍ରଛାତ୍ରୀମାନେ ପଢିବାକୁ ବାଧ୍ୟ ।
ବିଶ୍ୱବିଦ୍ୟାଳୟ ଧାର୍ଯ୍ୟ କରିଥିବା ପାଠ ପଢା ଖର୍ଚ ଛାତ୍ରଛାତ୍ରୀଙ୍କୁୁ ଦେବାକୁ ପଡିବ
ବର୍ତମାନ ସମୟରେ ଜର୍ଜିଆ ଦେଶର ଦୁଇଟି ବିଶ୍ୱବିଦ୍ୟାଳୟରେ ଛାତ୍ରଛାତ୍ରୀ ପାଠ ପଢିପାରିବେ ବୋଲି ସ୍ପଷ୍ଟ ହୋଇଛି । କିନ୍ତୁ ଜର୍ଜିଆରେ ଅନେକ ଯିବାକୁ ଚାହୁଁ ନାହାନ୍ତି । ଏଭଳି ସ୍ଥିତିରେ ୟୁକ୍ରେନର ଡାକ୍ତରୀ କଲେଜରୁ ଛାତ୍ରଛାତ୍ରୀମାନେ ଟ୍ରାନ୍ସଫର ନେଇ ଅନ୍ୟ ଦେଶରେ ନାମ ଲେଖାଇବା ପାଇଁ ପ୍ରକ୍ରିୟା ଆରମ୍ଭ କଲେଣି ।
ଭାରତରୁ ଜର୍ଜିଆ ଯିବା ପାଇଁ ହେଲେ ଏବେ ଭିସା ପାଇଁ ୩ ମାସରୁ ଅଧିକ ସମୟ ଲାଗୁଛି । ମେଡିକାଲର ଶେଷ ବର୍ଷ ଛାତ୍ରଛାତ୍ରୀ ଜର୍ଜିଆ ଯିବା ପାଇଁ ଏବେଠାରୁ ପ୍ରସ୍ତୁତ ହେଲେ ବି ପାଠ ପଢାର ୩ ମାସ ହରାଇବେ । ତେବେ ଏଭଳି ପରିସ୍ଥିତିରେ ସେମାନେ ନିଜର ପେଶାଗତ ଜୀବନରେ ଅନେକ ସମସ୍ୟା ଭୋଗିପାରନ୍ତି ।