ପ୍ରଫେଟ ମହମ୍ମଦଙ୍କ ଉପରେ ଟିପ୍ପଣୀ, ନିଲମ୍ବିତ ହେଲେ ବିଜେପି ମୁଖପାତ୍ର । ପାକିସ୍ତାନ ପ୍ରଧାନମନ୍ତ୍ରୀଙ୍କ ବିବୃତ୍ତିକୁ ନିନ୍ଦା କଲା ଭାରତ ।

କନକ ବ୍ୟୁରୋ: ବୟାନକୁ ନେଇ ବିବାଦ। ସମାଲୋଚନା ଘେରରେ ଏବେ ଭାରତ ସରକାର । ସେପଟେ କ୍ଷମତାସୀନ ବିଜେପିକୁ ମିଳୁଛି ନିନ୍ଦା, ଅପବାଦ । ପ୍ରଫେଟ ମହମ୍ମଦଙ୍କ ଉପରେ ବିଜେପି ରାଷ୍ଟ୍ରୀୟ ମୁଖପାତ୍ର ନୂପୁର ଶର୍ମା ଦେଇଥିବା ବୟାନ ବିରୋଧରେ କେବଳ ଦେଶରେ ନୁହେଁ ବିଦେଶରେ ମଧ୍ୟ ଜୋରଦାର ବିରୋଧ କରାଯାଉଛି । ଗଲଫ ଦେଶଠୁ ନେଇ ମୁସଲିମ ବହୁଳ ଦେଶ ଭାରତଠୁ ଜବାବ ମାଗୁଛନ୍ତି । ସେପଟେ ବିଜେପିକୁ ଘେରିଛି ବିରୋଧୀ । ଏହା ଭିତରେ ନୂପୁର ଶର୍ମା ଦଳରୁ ନିଲମ୍ବିତ ଓ ଦିଲ୍ଲୀ ପ୍ରଦେଶ ବିଜେପି ମିଡିଆସେଲ ମୁଖ୍ୟ ନବୀନ ଜିନ୍ଦଲଙ୍କୁ ବହିଷ୍କାର କରାଯାଇଛି କିନ୍ତୁ ମାମଲା ଥଣ୍ଡା ପଡିବା ବଦଳରେ ତେଜିବାରେ ଲାଗିଛି ।

ପ୍ରଫେଟ ମହମ୍ମଦଙ୍କ ବିରୋଧରେ ବିଜେପିର ଦୁଇ ନେତା ଯେଉଁ ଟିପ୍ପଣି ଦେଇଥିଲେ ତାହା ଏବେ ବଡଧରଣର ବିବାଦର ରୂପ ନେଲାଣି । ନିଲମ୍ବିତ ବିଜେପିର ରାଷ୍ଟ୍ରୀୟ ମୁଖପାତ୍ର ନୂପୁର ଶର୍ମାଙ୍କ ବୟାନ ଓ ଦିଲ୍ଲୀ ବିଜେପି ମିଡିଆ ସେଲ ମୁଖ୍ୟ ନବୀନ ଜିନ୍ଦଲଙ୍କ ସୋସିଆଲ ମିଡିଆ ପୋଷ୍ଟ କ୍ରମଶଃ ଅର୍ନ୍ତଜାତୀୟ ପ୍ରସଙ୍ଗ ପାଲଟିିଛି । ବିଭିନ୍ନ ଗଲଫ ଓ ମୁସଲିମ ବହୁଳ ଦେଶମାନେ ବୟାନ ବିରୋଧରେ ସ୍ୱର ଉତୋଳନ କରିବା ସହ ଭାରତ ସରକାରଙ୍କଠୁ କ୍ଷମା ପ୍ରାର୍ଥନା ଦାବିକରୁଛନ୍ତି । ଦୁଇ ନେତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିଛି ଦଳ ତଥାପି ମାମଲା ଥଣ୍ଡା ପଡିବା ପରିବର୍ତ୍ତେ ତେଜିବାରେ ଲାଗିଛି ।

ମୁସଲିମ ବହୁଳ ରାଷ୍ଟ୍ରମାନେ ବୟାନକୁ ନେଇ ଭାରତକୁ କଡ଼ାସମାଲୋଚନା କରିବା ସହ ଭାରତୀୟ ସାମଗ୍ରୀ ଓ ଚଳଚ୍ଚିତ୍ର ବର୍ଜନ ପାଇଁ ମଧ୍ୟ ସୋସିଆଲ ମିଡିଆରେ କ୍ୟାମ୍ପେନ ଆରମ୍ଭ କରିଛନ୍ତି । ଇସଲାମିକ ଦେଶ ବାହାରିନ, କତାର, ଓମାନ, କୁଏତ, ଇରାନ ସେମାନଙ୍କ ଦେଶରେ ଅବସ୍ଥାପିତ ଭାରତୀୟ ରାଷ୍ଟ୍ରଦୁତଙ୍କ ସମନ ଜାରି କରି ଅସନ୍ତୋଷ ବ୍ୟକ୍ତ କରିଛି ।

ଘଟଣାକୁ ନେଇ ବିଜେପି କହିଛି ଉଭୟ ଦେଶ ଓ ବିଜେପି ସବୁ ଧର୍ମକୁ ସମାନ ସମ୍ମାନ ପ୍ରଦାନ କରନ୍ତି । ଯେଉଁମାନେ ଅପମାନ ଟିପ୍ପଣୀ ଦେଇଛନ୍ତି ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି । ସେପଟେ ପ୍ରଫେଟ ମହମ୍ମଦଙ୍କ ବିରୋଧରେ ଆପତ୍ତିିଜନକ ଟିପ୍ପଣୀ ପାଇଁ ବିଜେପି ସରକାରଙ୍କୁ ଘେରିଲେଣି ବିରୋଧୀ । କଂଗ୍ରେସଠୁ ନେଇ ବିିଭିନ୍ନ ରାଜ୍ୟର ଆଞ୍ଚଳିକ ଦଳ ଘଟଣାକୁ ନେଇ ବିଜେପିଠୁ ଜବାବ ମାଗୁଛନ୍ତି

ସାଉଦି ଆରବ ରାଷ୍ଟ୍ରସମୂହଙ୍କ ସହ ଏକ ସ୍ୱର ମିଶାଇଛି ପାକିସ୍ତାନ । ପାକିସ୍ତାନ ପ୍ରଧାନମନ୍ତ୍ରୀ ସେହେବାଜ ସରିଫ ଟୁଇଟ କରି ନୂପୁର ଶର୍ମାଙ୍କ ବୟାନକୁ ନିନ୍ଦା କରି କହିଛନ୍ତି ବିଶ୍ୱ ଏହି ଘଟଣାକୁ ଗୁରୁତର ସହ ଗ୍ରହଣ କରୁ ଓ ଭାରତ ସରକାର ଜବାବ ରଖନ୍ତୁ । ନୂପୁର ଶର୍ମାଙ୍କ ନାଁରେ ମୁମ୍ବାଇ, ଦିଲ୍ଲୀ, ହାଇଦ୍ରାବାଦରେ ୩ଟି ମାମଲା ରୁଜୁ ହେବା ସହ ତାଙ୍କୁ ହତ୍ୟା ଦୁଷ୍ମର୍ମ ଧମକ ଦିଆଯାଇଥିବା ସୂଚନା ରହିଛି ।

ନୂପୁରଙ୍କ ବୟାନକୁ ନେଇ ମିଳିତ ଜାତିସଂଘର ମାନାବାଧିକାର ସଂଗଠନକୁ ଓଆଇସି ଅଭିଯୋଗ କରିଛି । ଓଆଇସିର କହିଛି କି ଭାରତରେ ମୁସଲିମାନଙ୍କୁ ଟାର୍ଗେଟ କରାଯାଉଛି ଓ ମୁସଲିମମାନଙ୍କ ବିରୋଧରେ ହିଂସା ବୃଦ୍ଧି ପାଉଛି । ବିଭିନ୍ନ ଶିକ୍ଷାନୁଷ୍ଠାନରେ କଟକଣା ଲଗାଯାଉଛି । ଭାରତ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ । ସେପଟେ ଓଆଇସିକୁ କଡା ଜବାବ ଦେଇଛି ଭାରତ । ଓଆଇସିର ଏଭଳି ବୟାନ ସଂକୀର୍ଣ୍ଣ ମନୋଭାବ ଓ ଛୋଟ ବିଚାରଧାରାକୁ ଦର୍ଶାଉଥିବା କହିଛି ଭାରତୀୟ ବୈଦେଶିକ ମନ୍ତ୍ରାଳୟ ।

ଏକ ଟିଭି ବିର୍ତକ କାର୍ଯ୍ୟକ୍ରମରେ ନୂପୁର ଶର୍ମା ଜ୍ଞାନବାପି ମସଜିଦ ମାମଲାରେ ନିଜର ମତ ଦେଇଥିଲେ । ଏହି ସମୟରେ ପ୍ରଫେଟ ମହମ୍ମଦଙ୍କ ବିଷୟରେ ଏକ ବିବୃତି ରଖିଥିଲେ । ଏହି ବିବୃତିକୁ ନେଇ ବିବାଦ ଆରମ୍ଭ ହେବା ସହ ଧାର୍ମିକ ଭାବନାକୁ ଆଘାତ, ଘୃଣା ବିସ୍ତାର ଓ ଅନ୍ୟ ଧର୍ମ ବିରୁଦ୍ଧରେ ମନ୍ତବ୍ୟ ଦେଇଥିବା ଅଭିଯୋଗ ହୋଇଛି । ମେ ୬ ତାରିଖରେ ଏହି ଘଟଣା ଘଟିବା ସହ ନୂପୁରଙ୍କ ବୟାନ ଭିଡିଓ ଭାଇରାଲ ହେଉଛି ।