କନକ ବ୍ୟୁରୋ : ନୂଆବର୍ଷରେ ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ କୃଷକମାନଙ୍କୁ ବଡ ଉପହାର ଦେଇଛନ୍ତି । ଚଳିତ ମାସ ଗ୍ରାମୀଣ କ୍ଷେତ୍ରରେ ଚାଷୀମାନେ ଚାଷ କ୍ଷେତରେ ବ୍ୟବହାର କରୁଥିବା ବିଜୁଳି ଓ ସହରୀ ଅଞ୍ଚଳରେ ନଳକୂପରେ ବ୍ୟବହାର ହେଉଥିବା ବିଜୁଳିର ବିଲ ଅଧା ହୋଇଯିବ ବୋଲି ମୁଖ୍ୟମନ୍ତ୍ରୀ ଘୋଷଣା କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ବିଜୁଳି ବିଲ ଛାଡ ନେଇ ରାଜ୍ୟ ସରକାର ଘୋଷଣା କରିଥିବା ଏହି ନୂଆ ବ୍ୟବସ୍ଥା ପାଇଁ ଉତ୍ତର ପ୍ରଦେଶ ପାୱାର କର୍ପୋରେସନକୁ ବର୍ଷକୁ ପାଖା ପାଖି ୧ ହଜାର କୋଟି ଟଙ୍କାର ଅତିରିକ୍ତ ବୋଝ ସହିବାକୁ ପଡିବ । ଏନେଇ ରାଜ୍ୟ ସରକାର ୟୁପିପିସିଏଲକୁ ଅନୁଦାନ ଦେବାକୁ ନିଷ୍ପତ୍ତି ନେଇଛନ୍ତି । ଏନେଇ ଗୁରୁବାର ଦିନ ମୁଖ୍ୟମନ୍ତ୍ରୀ ଟ୍ୱିଟର ଯୋଗେ ସୂଚନା ଦେଇଛନ୍ତି ।
କହିରଖୁ କି ସରକାରୀ ଅନୁଦାନ ମିଳିବା ପରେ ବିଜୁଳି ଦରର ପରିବର୍ତ୍ତନ ହେବ । ପ୍ରତିବର୍ଷ ନୂଆଦର ମୁତାବକ ଗ୍ରାମୀଣ କ୍ଷେତ୍ରରେ ଚାଷୀମାନଙ୍କୁ ବିଜୁଳି ବିଲର ଅଧା ଦେବାକୁ ପଡି ବ । ବର୍ତମାନ ଚାଷୀମାନେ ୟୁନିଟ ପ୍ରତି ୨ ଟଙ୍କା ଦେଉଥିବା ବେଳେ ଏବେ ତାଙ୍କୁ ସମାନ ପରିମାଣର ବିଜୁଳି ପାଇଁ ୟୁନିଟ ପ୍ରତି ୧ ଟଙ୍କା ଦେବାକୁ ପଡିବ ।
ସେହିଭଳି ବିଦ୍ୟୁତ୍ ଚାଳିତ ପମ୍ପଗୁଡିକ ଯାହା ୧.୬୫ ଟଙ୍କା ପ୍ରତି ୟୁନିଟ ଦର ଚାର୍ଜ ଲାଗୁଥିଲା ଏବେ କୃଷକମାନେ ୟୁନିଟ ପ୍ରତି ୦.୮୩ ଟଙ୍କା ଦେବେ । ସେହିଭଳି ସହରାଞ୍ଚଳରେ ବିଦ୍ୟୁତ ଚାଳିତ ନଳକୂପ କନେକସନ ପାଇଁ ଗ୍ରାହକଙ୍କୁ ୟୁନିଟ ପ୍ରତି ୬ ଟଙ୍କା ଦେବାକୁ ପଡୁ୍ଥିବା ବେଳେ ଏବେ ସେମାନଙ୍କୁ ପ୍ରତି ୟୁନିଟକୁ ୩ ଟଙ୍କା ଦେବାକୁ ପଡିବ । ମୁଖ୍ୟମନ୍ତ୍ରୀଙ୍କର ଏଭଳି ଘୋଷଣା ଦ୍ୱାରା ରାଜ୍ୟରେ ପ୍ରାୟ ୧୩ ଲକ୍ଷ ଉପଭୋକ୍ତା ଲାଭବାନ ହେବେ ।
ଏହାକୁ ନେଇ ବିଜେପିର ଉତ୍ତର ପ୍ରଦେଶ ଅଧ୍ୟକ୍ଷ ସ୍ୱତନ୍ତ୍ରଦେବ ସିଂ ଟ୍ୱିଟ୍ କରି କହିଛନ୍ତି କି ମୁଖ୍ୟମନ୍ତ୍ରୀଙ୍କର ଏହା ଏକ ଐତିହାସିକ ନିଷ୍ପତ୍ତି । ଏହାଦ୍ୱାରା ରାଜ୍ୟର ଚାଷୀମାନେ ନିଶ୍ଚିତ ଭାବେ ଉପକୃତ ହେବେ ।