କନକ ବ୍ୟୁରୋ: ବ୍ରଏଲର କୁକୁଡ଼ା ଅଣ୍ଡା ଉତ୍ପାଦନ କରି ଆତ୍ମନିର୍ଭର ହୋଇଛନ୍ତି ରାୟଗଡ଼ା ଭୁଲୁସୁଣ୍ଡା ଗାଁର ଯୁବ ଉଦ୍ୟୋଗୀ ସନ୍ତୋଷ ନାଲା । ୧ ହଜାର କ୍ଷମତା ବିଶିଷ୍ଟ ଏହି କୁକୁଡ଼ା ଫାର୍ମରେ ଧାଡ଼ି ଧାଡ଼ି ଜାଲି ଭିତରେ କୁକୁଡ଼ା ମାନଙ୍କୁ ରଖାଯାଇଛି । କୁକୁଡ଼ାଙ୍କୁ ଦାନା ଦେବା ଠାରୁ ଆରମ୍ଭ କରି ସମସ୍ତ ପ୍ରକାରର ଯତ୍ନ ନିଅନ୍ତି ସନ୍ତୋଷ । କୁକୁଡ଼ା ଅଣ୍ଡା ଦେବା ପାଇଁ ମଧ୍ୟ ସ୍ୱତନ୍ତ୍ର ବ୍ୟବସ୍ଥା ରହିଛି । ଫାର୍ମରେ ବାୟୁ ଚଳାଚଳ ଏବଂ ଆଲୋକିକରଣ ପାଇଁ ବ୍ୟବସ୍ଥା କରାଯାଇଛି । ପ୍ରତେକ ଦିନ ଏହି ଫାର୍ମରୁ ୧ ହଜାର କୁକୁଡ଼ା ଅଣ୍ଡା ଉତ୍ପାଦନ ହେଉଛି । ଏହାକୁ ସ୍ଥାନୀୟ ବଜାରରେ ବିକ୍ରି କରି ବେଶ ଲାଭବାନ ହେଉଛନ୍ତି ଯୁବ ଉଦ୍ୟୋଗୀ ସନ୍ତୋଷ ନାଲା ।
Kanak News is now on WhatsApp
Join and get latest news updates delivered to you via WhatsApp
କରୋନା ସମୟରେ କାମ ଧନ୍ଦା ହରାଇ ଘରେ ବସିଥିବା ବେଳେ ନୂଆ କିଛି କରିବା ପାଇଁ ଯୋଜନା କରିଥିଲେ ସନ୍ତୋଷ । ୟୁଟ୍ୟୁବ ସର୍ଚ୍ଚ କରି ଅଣ୍ଡା ଉତ୍ପାଦନ ଏବଂ କୁକୁଡ଼ା ଚାଷ ବିଷୟରେ ଜାଣିବା ପରେ ନିଜ ଗାଁରେ ଏକ କୁକୁଡ଼ା ଉତ୍ପାଦନ କେନ୍ଦ୍ର କରି ଏଥିରୁ ବେଶ ଲାଭ ପାଉଛନ୍ତି । ନିଜର ପରିବାର ପ୍ରତିପୋଷଣ କରିବା ସହ ଅନ୍ୟ ୨ଜଣଙ୍କୁ ନିଯୁକ୍ତି ଦେଇଛନ୍ତି । ସରକାରୀ ସହାୟତାରେ କୁକୁଡ଼ା ଫାର୍ମ ଆରମ୍ଭ କରିଛନ୍ତି ସନ୍ତୋଷ । ଆନ୍ଧ୍ରପ୍ରଦେଶରୁ କୁକୁଡ଼ା ଚିଆଁ ଆଣି ଅଣ୍ଡା ଉତ୍ପାଦନ ହେବା ପରେ ସ୍ଥାନୀୟ ଗୁଣୁପୁର ବଜାରରେ ବିକ୍ରି କରୁଛନ୍ତି ।
ରାୟଗଡ଼ା ଗୁଣୁପୁର ଅଂଚଳରେ ଅଧିକାଂଶ ଲୋକ କପା, ଧାନ ଓ ପନିପରିବା ଚାଷ କରି ପରିବାର ପ୍ରତିପୋଷଣ କରନ୍ତି । କୁକୁଡ଼ା ଅଣ୍ଡା ଉତ୍ପାଦନ ଭଳି ଏକ ଲାଭଦାୟକ ବ୍ୟବସାୟ କରି ସ୍ଥାନୀୟ ଅଂଚଳରେ ଅନ୍ୟମାନଙ୍କ ପାଇଁ ଉଦାହରଣ ପାଲଟିଛନ୍ତି ଯୁବ ଉଦ୍ୟୋଗୀ ସନ୍ତୋଷ ନାଲା ।