୧ରୁ ୬ରେ ଶେଷ ହୋଇଥିବ ଗାଡି ନମ୍ବର ସାବଧାନ: ଜାନୁଆରୀ ୧୫ ତାରିଖରୁ କଟିବ ଚାଲାଣ
କନକ ବ୍ୟୁରୋ: ରାଜ୍ୟ ପରିବହନ ବିଭାଗ ପକ୍ଷରୁ ହାଇ ସିକ୍ୟୁରିଟୀ ନମ୍ବର ପ୍ଲେଟ ଯାଂଚକୁ ନେଇ ପୁଣି ଥରେ ତାଗିଦ କରାଯାଇଛି । ଆସନ୍ତା ୧୫ତାରିଖରୁ ଯେଉଁ ଗାଡିରେ ହାଇସିକ୍ୟୁରିଟୀ ନମ୍ବର ପ୍ଳେଟ ଲାଗି ନଥିବ, ତାହାର ଯାଂଚ କରାଯାଇ ଆବଶ୍ୟକ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କୁହାଯାଇଛି । ଯେଉଁମାନେ ନିମୟ ଖିଲାପ କରିଥିବେ ସେମାନଙ୍କୁ ୫ରୁ ୧୦ହଜାର ଟଙ୍କାର ଇ-ଚାଲାଣ କଟାଯିବ । ପରିବହନ ବିଭାଗର ତାଗିଦ ପରେ ପୁଣି ଥରେ ଚର୍ଚ୍ଚାକୁ ଫେରିଛି ଏଚଏସଆରପି ନମ୍ବର ପ୍ରସଙ୍ଗ ।
Kanak News is now on WhatsApp
Join and get latest news updates delivered to you via WhatsApp
ହାଇ ସିକ୍ୟୁରିଟୀ ନମ୍ବର ପ୍ଲେଟ ଯାଂଚ ନେଇ ପରିବହନ ବିଭାଗର ତାଗିଦ ପରେ, ବିଭିନ୍ନ ସୋରୁମ ଆଗରେ ଦେଖିବାକୁ ମିଳିଛି ଏମିତି ଦୃଶ୍ୟ । ଏଚଏସଆରପି ନମ୍ବର ପ୍ଲେଟ ଲଗାଇବାକୁ ଗାଡି ମାଲିକମାନେ ସୋରୁମରେ ଭିଡ ଜମାଇଛନ୍ତି । ବିଶେଷ କରି ହିରୋ ସୋରୁମ ଗୁଡିକରେ ଦେଖିବାକୁ ମିଳିଛି ଅଧିକ ଭିଡ ।
ରାଜ୍ୟ ପରିବହନ ବିଭାଗ ପକ୍ଷରୁ କୁହାଯାଇଛି, ଯଉଁ ଗାଡିଗୁଡିକର ଶେଷ ନମ୍ବର ୧ରୁ ୬ରେ ଶେଷ ହୋଇଥିବ, ସେଗୁଡିର ହାଇସିକ୍ୟୁରିଟି ନମ୍ବର ପ୍ଲେଟ ଲାଗିନଥିଲେ ୧୫ ତାରିଖରୁ ଚାଲାଣ କଟିବ । ଏଥିପାଇଁ ୫ ହଜାରରୁ ୧୦ ହଜାର ଯାଏଁ କଟିବ ଚାଲାଣ । ଏହି ସବୁ ନମ୍ବର ପାଇଁ ହାଇସିକ୍ୟୁରିଟି ନମ୍ବର ପ୍ଲେଟ ଲଗାଇବାର ଧାର୍ଯ୍ୟ ସମୟ ଗତ ଡିସେମ୍ବର ୩୧ରୁ ଶେଷ ହୋଇଛି । ପରିବହନ ବିଭାଗର ତାଗିଦ ପରେ, ସମୟ ସରି ଯାଇଥିଲେ ବି, ଯେଉଁମାନେ ନମ୍ବର ପ୍ଲେଟ୍ ବଦଳାଇ ନାହାଁନ୍ତି ସେମାନେ ଏବେ ତତ୍ପର ହୋଇଛନ୍ତି ।
୨୦୧୯ ଏପ୍ରିଲ ୧ ପୂର୍ବରୁ ପଞ୍ଜିକୃତ ହୋଇଥିବା ଗାଡି, ଯାହାର ନମ୍ବରର ଶେଷ ଅଙ୍କ ୧ ରୁ ୬ ଭିତରେ , ସେହି ଗାଡିଗୁଡିକ ପାଇଁ ଏଚଏସଆରପି ନମ୍ବର ପ୍ଲେଟ ଲଗାଇବାର ଶେଷ ତାରିଖ ୩୧ଡିସେମ୍ବର ୨୦୨୨ ଧାର୍ଯ୍ୟ କରାଯାଇଥିଲା । ୭ ଓ ୮ ଶେଷ ଅଙ୍କ ଥିବା ଗାଡିଗୁଡିକ ପାଇଁ ସମୟସୀମା ୩୧ ଜାନୁଆରୀ ୨୦୨୩ ରହିଛି । ୯ ଓ ୦ ଶେଷ ଅଙ୍କ ଥିବା ଗାଡି ଗୁଡିକ ପାଇଁ ନୂଆ ନମ୍ବର ପ୍ଲେଟ ଲଗାଇବାର ଶେଷ ତାରିଖ ଫେବ୍ରୁଆରୀ ୨୮ ରହିଛି । ସମୟ ସୀମା ଭିତରେ ନମ୍ବର ପ୍ଲେଟ ନବଦଳାଇଲେ ଗାଡି ମାଲକଙ୍କଠାରୁ ଜରିମାନା ଆଦାୟ କରାଯିବାର ବ୍ୟବସ୍ଥା ରହିଛି । ହେଲେ, ସରକାରଙ୍କ ଏଚଏସଆରପି ନମ୍ବରପ୍ଲେଟକୁ ନେଇ ପ୍ରଶ୍ନ ଉଠାଇଛନ୍ତି ସଡକ ସୁରକ୍ଷା ବିଶେଷଜ୍ଞ ।
ତେବେ ରାଜ୍ୟ ପରିବହନ ବିଭାଗର ବରିଷ୍ଠ ଅଧିକାରୀଙ୍କ ସୂତ୍ରରୁ ମିଳିଥିବା ସୂଚନା ଅନୁସାରେ ହକି ପରେ ଯାଂଚ ହେବ ଏଚଏସଆରପି ନମ୍ବର । କଡାକଡି ଚେକିଂ କରାଯିବ । ଯେଉଁମାନେ ହାଇସିକ୍ୟୁରିଟି ନମ୍ବର ଲଗାଇନଥିବେ ସେମାନେ ଗଣିବେ ତଣ୍ଡ ।