ଚାଷ ନଷ୍ଟ କରୁଛି ଚକଡ଼ା ପୋକ ! ହତାସ ଚାଷୀ ପରିବାର, ସରକାରୀ ସହାୟତାକୁ ଭରୋଷା ।
ଚକଡା ପୋକ ଏବଂ ପାଣି ଅଭାବରୁ ବିଭିନ୍ନ ଜିଲ୍ଲାରେ ଧାନ ଚାଷ ନଷ୍ଟ ହୋଇଛି ।
କନକ ବ୍ୟୁରୋ: ଚକଡା ପୋକ ଏବଂ ପାଣି ଅଭାବରୁ ବିଭିନ୍ନ ଜିଲ୍ଲାରେ ଧାନ ଚାଷ ନଷ୍ଟ ହୋଇଛି । କିଛି ଜିଲ୍ଲାରେ ପାଣି ଅଭାବରୁ ବିଲ ଫାଟି ଆଁ କରିଥିବା ବେଳେ ଆଉ କିଛି ଜିଲ୍ଲାରେ ଚାଷ ଜମିରେ ଚକଡା ପୋକ ଲାଗିବା କାରଣରୁ ବ୍ୟାପକ କ୍ଷୟ କ୍ଷତି ହୋଇଛି । ଏବେ ଲୋକଙ୍କ ମୁଣ୍ଡରେ ଋଣ ସୁଜିବାର ଚିନ୍ତା ମାଡି ବସିଛି । ମୟୁରଭଞ୍ଜ ଜିଲ୍ଲା ଜୟବିଲ୍ଲ ଗାଁର ଜଣେ ଚାଷୀ ଚଳିତବର୍ଷ ୨ ମାଣ ଜମିରେ ଧାନ ଚାଷ କରିଥିଲେ । ଧାନ କେଣ୍ଡାରେ ଠିକ୍ କ୍ଷୀର ବି ଧରିଲା । ହେଲେ ଠିକ୍ ଅମଳ ସମୟ ପାଖେଇ ଆସିଲା ବେଳକୁ ଧାନରେ ଲାଗିଛି ପୋକ । ଯାହା ଏବେ ଜଗେଶ୍ୱରଙ୍କ ପାଇଁ ଚିନ୍ତାର କାରଣ ପାଲଟିଛି । କେବଳ ଜଗେଶ୍ୱର ନୁହଁନ୍ତି ମୟୁରଭଞ୍ଜ ଜିଲ୍ଲାର ୨୬ଟି ବ୍ଲକରେ ଏବେ ଚକଡ଼ା ଚାଷୀଙ୍କ ମୁଣ୍ଡରେ ଚଡ଼କ ଭଳି ଲାଗିଛି ।
Kanak News is now on WhatsApp
Join and get latest news updates delivered to you via WhatsApp
ସୂଚନା ଅନୁଯାୟୀ, ମୟୁରଭଞ୍ଜ ଜିଲ୍ଲାର ଉଦଳା, କପ୍ତିପଦା, ଗୋପବନ୍ଧୁନଗର, ଖୁଂଟା, ମୋରଡ଼ା, ବଡ଼ସାହି ଆଦି ବ୍ଲକରେ ଏହି ଚକଡ଼ା ପୋକ ଯୋଗୁଁ ବ୍ୟାପକ ଭାବରେ ଚାଷ କ୍ଷତିଗ୍ରସ୍ତ ହୋଇଛି । ସରକାରୀ ରିପୋର୍ଟ କହୁଛି ମୋଟ୍ ୫୭୪ ହେକ୍ଟର ଜମିରେ ଏଭଳି ପୋକ ଲାଗିଛି । ଜଗତସିଂହପୁର ଜିଲ୍ଲାରେ ବି ଦେଖିବାକୁ ମିଳିଛି ସମାନ ଚିତ୍ର । ପାଣି ଅଭାବରୁ ଚାଷ ବେଶ ପ୍ରଭାବିତ ହୋଇଥିବା ବେଳେ ଏବେ ଚିନ୍ତା ବଢ଼ାଇ ଦେଇଛି-ଚକଡ଼ା ପୋକ । ଜିଲ୍ଲାର କୁମ୍ଭାରୀ, ନାଳିଓ, ହାଡିଆପଡ଼ା, ଓଗୋଳପୁର ଓ କାଳିଓ ପଂଚାୟତରେ ପାଣି ଅଭାବ ଯୋଗୁଁ ଧାନକ୍ଷେତ ସବୁ ଫାଟି ଆଁ କରିଛି । ଆଉ ଚାଷୀଙ୍କ ପାଖରେ ଜଳ ଯୋଗାଣ ପାଇଁ ଅନ୍ୟ ବିକଳ୍ପ ବି କିଛି ନାହିଁ । ଏପଟେ ମୁଣ୍ଡରୁ ଦୋଷ ଛଡ଼ାଇବାକୁ ଯାଇ, ଜଳ ସମ୍ପଦ ବିଭାଗର ନିର୍ବାହୀ ଯନ୍ତ୍ରୀ କହୁଛନ୍ତି, ଚାଷୀଙ୍କ ପାଇଁ ଖୁବ୍ ଶୀଘ୍ର ଜଳ ଯୋଗାଣର ବ୍ୟବସ୍ଥା କରାଯିବ ।