ଆଫଗାନିସ୍ତାନରେ ପହଞ୍ଚିଲା ଭାରତୀୟ ବାୟୁସେନାର ବିମାନ । ଫଶି ରହିଥିବା ଭାରତୀୟଙ୍କୁ କରିବ ଏୟାରଲିଫ୍ଟ ।
କନକ ବ୍ୟୁରୋ : ଆଫଗାନିସ୍ତାନରେ ଫେରିଛି ତାଲିବାନ ଯୁଗ । ବନ୍ଧୁକ ମୁନରେ ଶାସନ କ୍ଷମତାକୁ ତାଲିବାନ ହାଇଜାକ କରିବା ପରେ ଦେଶ ଛାଡି ଅନ୍ୟଦେଶକୁ ଚାଲି ଯାଉଛନ୍ତି ଆଫଗାନିସ୍ତାନ ବାସିନ୍ଦା । ସେହିଭଳି ଆଫଗାନିସ୍ତାନରେ ମଧ୍ୟ ଅନେକ ଦେଶର ଲୋକ ଫଶିକି ରହିଛନ୍ତି । ଯେଉଁମାନଙ୍କୁ ଉଦ୍ଧାର ପାଇଁ ଜୋରଦାର ଉଦ୍ୟମ ଚାଲିଛି । ଆଉ ଫଶି ରହିଥିବା ଲୋକଙ୍କ ମଧ୍ୟରେ ଭାରତର ଅଧିକାଂଶ ଲୋକ ମଧ୍ୟ ରହିଛନ୍ତି । ଆଉ ଏହି ଭାରତୀୟଙ୍କୁ ଉଦ୍ଧାର ପାଇଁ ଭାରତୀୟ ବାୟୁସେନାର ସି-୧୭ ଗ୍ଲୋବମାଷ୍ଟର ବିମାନ ଆଫଗାନିସ୍ତାନର କାବୁଲରେ ପହଞ୍ଚିଛି ।
Kanak News is now on WhatsApp
Join and get latest news updates delivered to you via WhatsApp
ପୂର୍ବରୁ ଏୟାର ଇଣ୍ଡିଆ ପକ୍ଷରୁ କାବୁଲକୁ ଉଡାଣ ବନ୍ଦ ହୋଇଥିବା ବେଳେ ଅନେକ ଭାରତୀୟ କିଭଳି ଦେଶକୁ ଫେରିବେ ସେନେଇ ଆଶଙ୍କାରେ ପଡିଥିଲେ । ତେବେ ଉଡାଣ ବନ୍ଦ ହେବାର କିଛି ଘଣ୍ଟା ମଧ୍ୟରେ ଭାରତୀୟ ବାୟୁସେନାର ସି-୧୭ ଗ୍ଲୋବମାଷ୍ଟର ବିମାନ ସୋମବାର କାବୁଲରେ ପହଞ୍ଚିଛି । ଆଉ ଏହି ବିମାନ ଯୋଗେ ଆଫଗାନିସ୍ତାନରେ ଫଶିଥିବା ଭାରତୀୟଙ୍କୁ ଏୟାରଲିଫ୍ଟ କରାଯିବ । ଏବେ ଆଫଗାନିସ୍ତାନରେ ୫୦୦ରୁ ଅଧିକ ଭାରତୀୟ ଅଫିସର ଓ କର୍ମଚାରୀ ଫଶି ରହିଛନ୍ତି ।
ସି-୧୭ ଗ୍ଲୋବମାଷ୍ଟର ବିମାନ ଆଫଗାନିସ୍ତାନରେ ଲ୍ୟାଣ୍ଡ କରିବା ପୂର୍ବରୂ ଦିଲ୍ଲୀରେ ଏକ ଉଚ୍ଚସ୍ତରୀୟ ବୈଠକ ହୋଇଥିଲା । ଆଉ ଏହି ବୈଠକରେ ଆଫଗାନିସ୍ତାନରେ ଭାରତୀୟ ଦୂତାବାସରେ କାମ କରୁଥିବା କର୍ମଚାରୀଙ୍କୁ କିଭଳି ସୁରକ୍ଷିତ ଭାବେ ଉଦ୍ଧାର କରାଯିବ ସେନେଇ ଆଲୋଚନା ହୋଇଥିଲା । ତେବେ ସି-୧୭ ଗ୍ଲୋବମାଷ୍ଟର କାବୁଲରେ ଲ୍ୟାଣ୍ଡ କରିବା ପୂର୍ବରୁ ପ୍ରଥମେ ତାଜିକିସ୍ତାନରେ ଲ୍ୟାଣ୍ଡ କରିଥିଲା । ଆଉ କାବୁଲ ବିମାନବନ୍ଦରରେ ସ୍ଥିତିରେ ସୁଧାର ଆସିବା ପରେ ଆଫଗାନିସ୍ତାନ ଅଭିମୁଖେ ବାହାରିଥିଲା ଗ୍ଲୋବମାଷ୍ଟର ।
କେବଳ ଭାରତ ନୁହେଁ ଅନ୍ୟ ଦେଶ ମଧ୍ୟ ନିଜ ଲୋକଙ୍କୁ ଉଦ୍ଧାର ପାଇଁ କାବୁଲ ବିମାନବନ୍ଦରରେ ଡେରା ପକାଇଛନ୍ତି । ପ୍ରତି ଦେଶ ସେନା ସହାୟତାରେ ନିଜର ଲୋକଙ୍କୁ ଆଫଗାନିସ୍ତାନରୁ ଉଦ୍ଧାର କରୁଛନ୍ତି । ଏପରିକି ଆମେରିକା ନିଜ ଦେଶର ଲୋକଙ୍କୁ ଉଦ୍ଧାର ପାଇଁ ୫ ହଜାର ସୈନିକ ପଠାଇବାକୁ ନିଷ୍ପତ୍ତି ନେଇଛି । ତେବେ ଏସବୁ ଭିତରେ ଆଫଗାନିସ୍ତାନକୁ ତାଲିବାନ କବଜା କରିବା ପରେ ଭାରତ ଆଫଗାନିସ୍ତାନ ଉପର ଦେଇ କୌଣସି ଉଡାଣ ନ କରିବାକୁ ନିଷ୍ପତ୍ତି ନେଇଛି । ଅଥାର୍ତ ଆଫଗାନିସ୍ତାନ ଏୟାରସ୍ପେଶ ବ୍ୟବହାର ଉପରେ ରୋକ ଲଗାଇଛି ଭାରତ । ତେବେ ଆମେରିକା-ଭାରତ ମଧ୍ୟରେ ଯେଉଁ ବିମାନ ଉଡାଣ ଭରୁଛି ତାହା ଏବେ ଭିନ୍ନ ରୁଟ୍ ଦେଇ ଅଥାର୍ତ କତର ଓ ୟୁଏଇ ଦେଇ ଦିଲ୍ଲୀ ଆସିବା ନେଇ ନିଷ୍ପତ୍ତି ହୋଇଛି ।