ମୋଦି ଦେଶକୁ ବରବାଦ କରିଦେବେ । ଗରିବ, ଦଳିତ ଓ ପଛୁଆ ବର୍ଗ ଲୋକଙ୍କ ପାଇଁ ମୋଦି କିଛି ମଧ୍ୟ କରିବେ ନାହିଁ । ଆପଣ ଆମକୁ ଭୋଟ ଦିଅନ୍ତୁ । ଏଭଳି କଥା କୌଣସି ବିରୋଧୀ ନୁହେଁ ବରଂ ବିଜେପି ସାଂସଦଙ୍କ ମୁହଁରୁ ଏଭଳି କଥା ଶୁଣିବାକୁ ମିଳିଛି । ବିଜେପି ସାଂସଦ ହୋଇ କିପରି ଜଣେ ମୋଦିଙ୍କ ବିରୋଧରେ ଏଭଳି କହିଲେ ତାହା ଆପଣଙ୍କୁ ଆଶ୍ଚଯ୍ୟ କରିବ ନିଶ୍ଚୟ । କିନ୍ତୁ କଥାଟା ସତ । ଖୋଦ ବିଜେପିର ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହଙ୍କ ଉପସ୍ଥିତିରେ ହିଁ ଏଭଳି କହିଛନ୍ତି ବିଜେପି ସାଂସଦ ପ୍ରହ୍ଲାଦ ଯୋଶୀ । ଆଉ ଏହାକୁ ନେଇ ଏବେ ଆରମ୍ଭ ହୋଇଛି ଚର୍ଚ୍ଚା ।
Kanak News is now on WhatsApp
Join and get latest news updates delivered to you via WhatsApp
କର୍ଣ୍ଣାଟକ ବିଧାନସଭା ନିର୍ବାଚନ ପାଇଁ ବିଗୁଲ ବାଜିବା ପରେ ବିଜେପି ପାଇଁ ଗୋଟିଏ ପରେ ଗୋଟିଏ ଅସୁବିଧା ଦେଖାଦେଉଛି । କଂଗ୍ରେସ ଖେଳିଥିବା ଲିଙ୍ଗାୟତ କାର୍ଡ ବିଜେପିକୁ ଅଡୁଆରେ ପକାଉଥିବା ବେଳେ ଏବେ ବିଜେପି ନେତାଙ୍କ ହିନ୍ଦି ଭାଷଣକୁ କନ୍ନଡରେ ଅନୁବାଦ କରୁଥିବା ନେତା ମୁଣ୍ଡବିନ୍ଧାର କାରଣ ପାଲଟିଛନ୍ତି । ସୂଚନା ଅନୁଯାୟୀ, କର୍ଣ୍ଣାଟକ ବିଧାନସଭା ନିର୍ବାଚନ ପାଇଁ ବିଜେପି ଅଧ୍ୟକ୍ଷ ଅମିତ ଶାହ ଦବାନାଗରୀରେ ପ୍ରଚାର କରୁଥିବା ବେଳେ ଏକ ଅଭାବନୀୟ ଘଟଣା ଦେଖିବାକୁ ମିଳିଛି । ପ୍ରଚାର ସମୟରେ ଅମିତ ଶାହ ହିନ୍ଦିରେ କଂଗ୍ରେସ ସରକାର ତଥା ସିଦ୍ଦରମେୟା ସରକାର ଉପରେ ଖୁବ ବର୍ଷିଥିଲେ । ଏହାସହ ସିଦ୍ଦାରମେୟା ସରକାର କର୍ଣ୍ଣାଟକର ବିକାଶ କରି ପାରିବ ନାହିଁ । ମୋଦିଙ୍କ ଉପରେ ବିଶ୍ୱାସ ରଖି ୟେଦୁରପ୍ପାଙ୍କୁ ଭୋଟ ଦିଅନ୍ତୁ । କର୍ଣ୍ଣାଟକକୁ ଦେଶର ଏକ ନମ୍ବର ରାଜ୍ୟ କରିବା ଆମର ଦାୟିତ୍ୱ ।
କିନ୍ତୁ ଏହାପରର ଘଟଣା ଥିଲା ବେଶ ରୋଚକ । ଯେତେବେଳେ ଅମିତ ଶାହଙ୍କ ଭାଷଣକୁ କନ୍ନଡରେ ଅନୁବାଦ କରିଥିଲେ ଦଳୀୟ ସାଂସଦ ପ୍ରହ୍ଲାଦ ଯୋଶୀ । ଅମିତଙ୍କ ଭାଷଣର ସମ୍ପୂର୍ଣ୍ଣ ଓଲଟା କହିଥିଲେ ପ୍ରହ୍ଲାଦ । ଅମିତ ଭାଷଣକୁ ଅନୁବାଦ କରିବାକୁ ଯାଇ ପ୍ରହ୍ଲାଦ କହିଥିଲେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଗରିବ, ଦଳିତ ଓ ପଛୁଆ ବର୍ଗ ଲୋକଙ୍କ ପାଇଁ କିଛି କରିବେ ନାହିଁ । ଏହାସହ ଦେଶକୁ ପୂରା ବରବାଦ କରିଦେବେ । ତେଣୁ ଆମକୁ ଭୋଟ ଦିଅନ୍ତୁ । ଏକଥା ଶୁଣିବା ପରେ କିଛି ସମୟ ସମସ୍ତେ ଆଶ୍ଚଯ୍ୟ ହୋଇଥିଲେ ।
ଚଳିତ ନିର୍ବାଚନ ପ୍ରଚାରରେ ଏହି ଘଟଣା ପ୍ରଥମଥର ଦେଖିବାକୁ ମିଳିନାହିଁ । ଏହାପୂର୍ବରୁ ଚିତ୍ରଦୁର୍ଗରେ ଅମିତ ପ୍ରଚାର କରୁଥିବା ବେଳେ ହିନ୍ଦୀରେ ଭାଷଣ ଦେଇ ହରଡଘଣାରେ ପଡିଥିଲେ । ଯେତେବେଳେ ୟେଦୁରପ୍ପାଙ୍କୁ ମୁଖ୍ୟମନ୍ତ୍ରୀ କରିବା ପାଇଁ ଲୋକମାନେ ଚାହୁଁଛନ୍ତି କି ନାହିଁ ହିନ୍ଦୀରେ ପଚାରିଥିଲେ ସେତେବେଳେ ଲୋକଙ୍କର ଉତ୍ତରରେ ଆଶ୍ଚଯ୍ୟ ହୋଇଯାଇଥିଲେ । କାରଣ ହିନ୍ଦୀ ବୁଝୁନଥିବା ଲୋକ ୟେଦୁରପ୍ପାଙ୍କୁ ମୁଖ୍ୟମନ୍ତ୍ରୀ କରିବାକୁ ମନା କରିଥିଲେ । ଏହା ପୂର୍ବରୁ ଅମିତ ଶାହ ମଧ୍ୟ ଚଳିତ ନିର୍ବାଚନ ପ୍ରଚାରରେ ୟେଦୁରପ୍ପାଙ୍କ ସରକାରକୁ ସବୁଠୁ ଦୁର୍ନୀତିଗ୍ରସ୍ତ ସରକାର ବୋଲି କହିଥିଲେ । ଏହାକୁ ନେଇ କଂଗ୍ରେସ କହିଥିଲା ଅମିତଙ୍କ ପାଟିରୁ ସତ କଥା ବାହାରିଛି । ଏହାକୁ ନେଇ ମଧ୍ୟ ଚର୍ଚ୍ଚା ଜୋର ଧରିଥିଲା ।
News Courtesy- AajTak