ମଧ୍ୟପ୍ରଦେଶ ଓ ଛତିଶଗଡ଼ରେ କୃଷି ଋଣ ଛାଡ଼ ପରେ ଓଡ଼ିଶାରେ ପ୍ରତିଯୋଗିତା : କ୍ଷମତାକୁ ଆସିଲେ ଋଣ ଛାଡ ପାଇଁ ବିଜେପିର ଘୋଷଣା, କଂଗ୍ରେସ ଦୋହରାଇଲା ପ୍ରତିଶ୍ରୁତି
କନକ ବ୍ୟୁରୋ : କୃଷି ଋଣ ଛାଡ ଘୋଷଣା କଂଗ୍ରେସକୁ ସଫଳତା ଆଣିଦେବା ପରେ, ଚାଷ ଓ ଚାଷୀ ପ୍ରସଙ୍ଗକୁ ନେଇ ରାଜନୈତିକ ଦଳ ମଧ୍ୟରେ ଆରମ୍ଭ ହୋଇଯାଇଛି ପ୍ରତିଯୋଗିତା । ମଧ୍ୟପ୍ରଦେଶ ଓ ଛିତିଶଗଡରେ ନୂଆ ସରକାର ଋଣ ଛାଡ କରିବା ପରେ ଓଡିଶା ସରକାରଙ୍କ ଉପରେ ଚାପ ବଢୁଥିବା ନେଇ ଚର୍ଚ୍ଚା ହେଉଛି । ସେପଟେ ଉଭୟ ବିଜେପି ଓ କଂଗ୍ରେସ ମଧ୍ୟ ରାଜ୍ୟରେ କ୍ଷମତାକୁ ଆସିଲେ ଋଣ ଛାଡ କରିବାକୁ ଘୋଷଣା କରିସାରିଲେଣି । ତେଣୁ ନିର୍ବାଚନୀ ବର୍ଷରେ ଏହି ବଡ ଭୋଟ୍ ବ୍ୟାଙ୍କକୁ ହତଛଡା କରିବାକୁ ଚାହିଁବନି ବିଜେଡି । ଚାଷ ଓ ଚାଷୀ ପ୍ରସଙ୍ଗକୁ ନେଇ ମନ୍ତ୍ରୀସ୍ତରୀୟ କମିଟିର ବୈଠକ ଦୁଇଥର ବସିସାରିଲାଣି । ସେପଟେ ଏମଏସପି ବୃଦ୍ଧି ଦାବିରେ ଦିଲ୍ଲୀ ଦରବାରରେ ବିରୋଧ ପାଇଁ ସଜବାଜ ଚାଲିଛି । ସମାନ ଢଙ୍ଗରେ ରାଜ୍ୟ ସରକାରଙ୍କ ଅବହେଳାକୁ ମୁଦ୍ଦା କରି ଆନ୍ଦୋଳନ କରିବେ ବିଜେପି ଓ କଂଗ୍ରେସ ।
Kanak News is now on WhatsApp
Join and get latest news updates delivered to you via WhatsApp
କମଲ ନାଥ, ଶପଥ ନେବାର ଦୁଇ ଘଂଟା ପରେ ମଧ୍ୟପ୍ରଦେଶର ଚାଷୀଙ୍କ ପାଇଁ ଯେଉଁ ନିଷ୍ପତି ନେଇଥିଲେ, ଭୂପେଶ ବାଘେଲ ମୁଖ୍ୟମନ୍ତ୍ରୀ ଆସନରେ ବସିବାର ପ୍ରଥମ ଦିନରେ ହିଁ ଛତିଶଗଡ଼ର ଚାଷୀଙ୍କ ପାଇଁ ସମାନ ନିଷ୍ପତି ନେଇଛନ୍ତି । ନିର୍ବାଚନୀ ଇସ୍ତାହାରରେ ଯେଉଁ କୃଷି ଋଣର ପ୍ରତିଶ୍ରୁତି ଦେଇଥିଲା କଂଗ୍ରେସ, କ୍ଷମତାକୁ ଆସିବା ପରେ ତୁରନ୍ତ ତାହାକୁ କାର୍ଯ୍ୟକାରୀ କରିଛି । ମଧ୍ୟପ୍ରଦେଶ ଏବଂ ଛତିଶଗଡ଼ ସରକାରଙ୍କ ଏହି ଘୋଷଣାର ଏକ ଜବରଦସ୍ତ ପ୍ରଭାବ ଓଡ଼ିଶାରେ ଦେଖିବାକୁ ମିଳିଛି । କ୍ଷମତାକୁ ଆସିଲେ ଓଡ଼ିଶାରେ ବି କୃଷି ଋଣ ଛାଡ଼ କରାଯିବ ବୋଲି ଘୋଷଣା କରିଛନ୍ତି ରାଜ୍ୟ ବିଜେପି ସଭାପତି ।
୨୦୧୯ ସାଧାରଣ ନିର୍ବାଚନରେ ଚାଷ ଓ ଚାଷୀ ପ୍ରସଙ୍ଗ କେତେ ଗୁରୁତ୍ୱ ରଖୁଛି, ରାଜନୈତିକ ଦଳ ଗୁଡ଼ିକର ଏହି ତତ୍ପରତାରୁ ସ୍ପଷ୍ଟ ବାରି ହୋଇପଡୁଛି । ବିଜେପିର ଏହି ଘୋଷଣାର ଖୁବ୍ ପୂର୍ବରୁ ଅର୍ଥାତ୍ ନିରଞ୍ଜନ ପଟ୍ଟନାୟକ ପିସିସି ସଭାପତି ଦାୟିତ୍ୱ ନେବା ଦିନଠାରୁ କୃଷି ଋଣ ଛାଡ ନେଇ ବାରମ୍ବାର କହି ଆସୁଛନ୍ତି । ଶାସକ ବିଜେଡି ବି ଅନୁରୁପ ଚିନ୍ତା କରୁଥିବା କୁହାଯାଉଛି ।
କିନ୍ତୁ ନିର୍ବାଚନୀ ବୈତରଣୀ ପାର ହେବା ପାଇଁ କୌଣସି ଦଳ ଦେଶର ସବୁଠୁ ବଡ ଭୋଟକୁ ହାତ ଛଡ଼ା କରିବାକୁ ଚାହିଁବେ ନାହିଁ । ତେଣୁ ନିର୍ବାଚନ ପୂର୍ବରୁ ସବୁ ଦଳ କୃଷି ଋଣ ଛାଡ଼ କଥାକୁ ବେଶ ଗୁରୁତ୍ୱ ଦେଉଛନ୍ତି । ଏପଟେ ଚାଷୀ ପ୍ରସଙ୍ଗରେ ବିଜେଡି, ବିଜେପି ଏବଂ କଂଗ୍ରେସ ମଧ୍ୟରେ ଚାଲିଥିବା ପ୍ରତିଦ୍ୱନ୍ଦିତା ଆଉ ଗୋଟିଏ ପାଦ ଆଗକୁ ଯାଇଛି । ଆସନ୍ତା ୮ ତାରିଖରେ ଦିଲ୍ଲୀରେ ବିଜେଡି ଚାଷ ଓ ଚାଷୀ ପ୍ରସଙ୍ଗରେ ସଂସଦ ଘେରାଉ କରିବାକୁ ଘୋଷଣା କରିଥିବା ବେଳେ ସେହି ୮ ତାରିଖରେ ରାଜ୍ୟ ସଚିବାଳୟ ଘେରାଉ କରିବାକୁ ଘୋଷଣା କରିଛି ରାଜ୍ୟ ବିଜେପି । ଆଉ ଏପଟେ ଶାସକ ବିଜେଡି ବିରୁଦ୍ଧରେ ଆନ୍ଦୋଳନ କରିବ କଂଗ୍ରେସ ।