ପୁରୀରେ ବିଜେପିର ୨ ଦିନିଆ ରାଷ୍ଟ୍ରୀୟ ଜନଜାତି ଅଧିବେଶନ । ସରକାରଙ୍କୁ ସମାଲୋଚନା କଲେ ବିଜେପି ନେତା, କାଲି ଶାହା ଦେବେ ଉଦବୋଧନ ।
କନକ ବ୍ୟୁରୋ: ପୁରୀରେ ଉଦଘାଟିତ ହେଲା ବିଜେପିର ଦୁଇ ଦିନିଆ ରାଷ୍ଟ୍ରୀୟ ଜନଜାତି ମୋର୍ଚ୍ଚା ମହାଅଧିବେସନ । ଏହାକୁ ଉଦଘାଟନ କରିଛନ୍ତି ଆସାମ ମୁଖ୍ୟମନ୍ତ୍ରୀ ସର୍ବାନନ୍ଦ ସୋନୱାଲ । ଏହି ଅବସରରେ ସୋନୱାଲ କହିଛନ୍ତି ଯେ, କେନ୍ଦ୍ରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କର ସରକାର ଦେଶର ଅନୂସୁଚିତ ଜନଜାତିମାନଙ୍କର ବିକାଶ ପାଇଁ ଅହରହ ପ୍ରୟାସ କରୁଛନ୍ତି । ସବକା ସାଥ ସବକା ବିକାଶର ଆହ୍ନାନ ଦେଇଥିବା ନରେନ୍ଦ୍ର ମୋଦି ଅନୂସୁଚିତ ଜନଜାତି ଲୋକମାନଙ୍କର ବିକାଶ ହେବ ସେଥିପାଇଁ କେନ୍ଦ୍ର ସରକାର ସମସ୍ତ ପ୍ରକାର ଯୋଜନାର ପେଡି ଖୋଲିଛନ୍ତି । ଜନଜାତି ବର୍ଗର ବିକାଶ ପାଇଁ ଆଗାମି ନିର୍ବାଚନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ହାତ ମୁଠାକୁ ଟାଣକରିବାକୁ ହେବ ବୋଲି ଆଜି ପୁରୀଠାରେ ଅନୁଷ୍ଠିତ ୨ ଦିନିଆ ଜନଜାତି ଅଧିବେଶନରେ କହିଛନ୍ତି ସୋନୱାଲ ।
Kanak News is now on WhatsApp
Join and get latest news updates delivered to you via WhatsApp
ସେହିଭଳି ରାଜ୍ୟ ବିଜେପି ସଭାପତି ବସନ୍ତ ପଣ୍ଡା କହିଛନ୍ତି ଯେ, କେନ୍ଦ୍ରରେ ମୋଦି ସରକାର ଆସିବା ପରେ ଜନଜାତିଙ୍କର କଲ୍ୟାଣ ପାଇଁ ଅନେକ ଯୋଜନା ହୋଇଛି । ଆମ ଦେଶର ସାଂସ୍କୃତିକ ଏବଂ ଅର୍ଥନୈତିକ ବିକାଶ ପାଇଁ ଆମର ଜନଜାତିଭାଇମାନଙ୍କର ଅବଦାନ ଅତୁଳନୀୟ । ସେମାନଙ୍କର ବିକାଶ ପାଇଁ ଆମ ଦଳ ସବୁବେଳେ ପ୍ରୟାସ କରୁଛି । ୯୨ ଟି ଏକଲବ୍ୟ ବିଦ୍ୟାଳୟ ଓଡିଶାକୁ ମିଳିଥିବାବେଳେ ରାଜ୍ୟସରକାରଙ୍କ ଆଗ୍ରହ ନଥିବା କାରଣରୁ ହଜାର ହଜାର ଜନଜାତି ଛାତ୍ରଛାତ୍ରୀ ଉନ୍ନତମାନର ଶିକ୍ଷାରୁ ବଂଚିତ ରହୁଛନ୍ତି ବୋଲି ବସନ୍ତ କହିଛନ୍ତି ।
ସେପଟେ ଜନଜାତି ରାଷ୍ଟ୍ରୀୟ ମୋର୍ଚ୍ଚାର ଜାତୀୟ ସଭାପତି ରାମବିଚାର ନେତମ ମଧ୍ୟ ସରକାରଙ୍କୁ ନିଶାନା କରିଛନ୍ତି । ଲୋକମାନେ ଭାରତୀୟ ଜନତା ପାର୍ଟି ସହ ଚଟାଣ ଭଳି ଲାଗିକରି ଅଛନ୍ତି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କର ନେତୃତ୍ୱ ପ୍ରତି ଦେଶର ୮ କୋଟି ଜନଜାତି ଭାଇଭଉଣୀ ମାନେ ଆସ୍ଥା ପ୍ରକଟ କରିଛନ୍ତି । ପ୍ରଧାନମନ୍ତ୍ରୀ ମଧ୍ୟ ଆମମାନଙ୍କର ବିଶ୍ୱାସକୁ ଆଗେଇ ନେବା ସହ ଅନେକ ଜନକଲ୍ୟାଣକାରି ଯୋଜନା କରିଛନ୍ତି । ହେଲେ ଓଡିଶାରେ ରାଜ୍ୟ ସରକାର ଏହାକୁ ଲାଗୁ କରୁନାହାନ୍ତି ଯାହା ଅତ୍ୟନ୍ତ ଦୁର୍ଭାଗ୍ୟଜନକ ।