କନକ ବ୍ୟୁରୋ : ବିଧାନସଭାରେ ‘ମାହାଙ୍ଗା ମର୍ଡର’ତାତି । ଏହି ଘଟଣାରେ ମନ୍ତ୍ରୀ ପ୍ରତାପ ଜେନାଙ୍କ ନାଁ ଏଫଆଇଆରେ ଉଲ୍ଲେଖ ଥିଲେ ମଧ୍ୟ କାହିଁକି ଏଯାଏଁ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଗଲା ନାହିଁ ଏବଂ ତାଙ୍କୁ ମନ୍ତ୍ରୀମଣ୍ଡଳରୁ ବାଦ୍ ଦିଆଗଲା ନାହିଁ ତାହାକୁ ନେଇ ବିଧାନସଭାରେ ହଟ୍ଟଗୋଳ କରିଛନ୍ତି ବିରୋଧୀ ବିଜେପି । ଏପରିକି ମାହାଙ୍ଗା ଡବଲ ମର୍ଡର ଘଟଣାରେ ହୋଇଥିବା ଏତଲାରେ ଆଇନ ମନ୍ତ୍ରୀଙ୍କୁ ୧୩ ନମ୍ବର ଅଭିଯୁକ୍ତ ଦର୍ଶାଯାଇଥିଲେ ମଧ୍ୟ ଏଯାଏଁ କାହିଁକି ସରକାର ପ୍ରତାପଙ୍କୁ ଘଣ୍ଟ ଘୋଡାଉଛନ୍ତି ତାହାକୁ ନେଇ ପ୍ରଶ୍ନ ଉଠାଇଛନ୍ତି ବିରୋଧୀ । ଏପରିକି ପୂର୍ବତନ ଆଇନ ମନ୍ତ୍ରୀ ରଘୁନାଥ ମହାନ୍ତିଙ୍କ ନାଁରେ ଅଭିଯୋଗ ଆସିବା ପରେ ତାଙ୍କୁ ମନ୍ତ୍ରୀ ମଣ୍ଡଳରୁ ବହିଷ୍କୃତ କରାଯାଇଥିଲା । ଏବେ ପ୍ରତାପଙ୍କ କ୍ଷେତ୍ରରେ ରେ ସରକାର ଚୁପ କାହିଁକି ବୋଲି ପ୍ରଶ୍ନ କଲା ବଜେପି । ଏହାସହ ଏହି ପ୍ରସଙ୍ଗରେ ମୁଖ୍ୟମନ୍ତ୍ରୀ ବିବୃତି ରଖନ୍ତୁ ବୋଲି ଦାବି କରିଛି ବିଜେପି ।
Kanak News is now on WhatsApp
Join and get latest news updates delivered to you via WhatsApp
ଶୂନ୍ୟକାଳରେ ବିରୋଧୀ ଦଳ ନେତା ପ୍ରଦୀପ୍ତ ନାଏକ ଗୃହରେ କହିଛନ୍ତି ଯେ, ସଙ୍ଗୀନ ଅଭିଯୋଗ ଥିବା ଜଣେ ମନ୍ତ୍ରୀ ପବିତ୍ର ଗୃହରେ କେମିତି ବସିବେ ? ଆଇନ ମନ୍ତ୍ରୀଙ୍କୁ ବହିଷ୍କାର କରନ୍ତୁ ତାଙ୍କ ବିରୁଦ୍ଧରେ ଆସିଥିବା ଅଭିଯୋଗର ତଦନ୍ତ କରାଯାଉ । ଏଥିପାଇଁ ବାଚସ୍ପତିଙ୍କ ରୁଲିଂ ଦାବି କରିଛନ୍ତି ବିରୋଧୀ ଦଳ ନେତା ପ୍ରଦୀପ୍ତ ନାଏକ । ଏହାସହ ଗୃହରେ ବିଜେପି ସଦସ୍ୟ ନାରାବାଜି କରିବା ସହ ବ୍ୟାନର ଦେଖାଇ ପୋଡିୟମ ତଳେ ପ୍ରତିବାଦ କରିଥିଲେ । ଆଉ ବାରମ୍ବାର ହଟ୍ଟଗୋଳ ଫଳରେ ଗୃହକୁ ଅପରାହ୍ନ ୪ଟା ଯାଏଁ ମୁଲତବି କରିଛନ୍ତି ବାଚସ୍ପତି ।