ରାହୁଲଙ୍କ ‘ସର୍ବନିମ୍ନ ଆୟ’ ପ୍ରତିଶ୍ରୁତିକୁ ବିଜେପି ନେତାଙ୍କ କଟାକ୍ଷ ! କହିଲେ, କଂଗ୍ରେସର ପ୍ରତିଶ୍ରୁତି କେବଳ ଶୁଖିଲା ଘୋଷଣା ।
ଗତକାଲି କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧି ଘୋଷଣା କରିଥିବା ସର୍ବନିମ୍ନ ଆୟ ଯୋଜନା ଉପରେ ପ୍ରତିକ୍ରିୟା ରଖିଛନ୍ତି କେନ୍ଦ୍ରମନ୍ତ୍ରୀ ତଥା ବିଜେପିର ବରିଷ୍ଠ ନେତା ରବିଶଙ୍କର ପ୍ରସାଦ । ରବିଶଙ୍କର ପ୍ରସାଦ କହିଛନ୍ତି ଯେ, ଦେଶର ଲୋକମାନେ କଂଗ୍ରେସ ବାସ୍ତବିକତା ଜାଣିଛନ୍ତି । ଏବଂ କଂଗ୍ରେସର ଚତୁରତାକୁ ମଧ୍ୟ ଦେଶବାସୀ ଭଲ ଭାବେ ଜାଣିଛନ୍ତି । ସେ କହିଛନ୍ତି ରାହୁଲ ଗାନ୍ଧି ଯାହାବି ଘୋଷଣା କରୁଛନ୍ତି, ଯଦି କଂଗ୍ରେସ ସରକାରକୁ ଆସେ, ତେବେ ତାହା କେବେ ହେଲେ ଲାଗୁ ହେବ ନାହିଁ । ସେ ଆହୁରି ମଧ୍ୟ କହିଛନ୍ତି ଯେ, କଂଗ୍ରେସ ଆଗରୁ ମଧ୍ୟ ଅନେକ ଘୋଷଣା କରିଥିଲା, କିନ୍ତା ସରକାରରେ ଥିବା ସମୟରେ ସେଗୁଡିକ କିଛି ବି ପୂରଣ ହୋଇନଥିଲା । କଂଗ୍ରେସର ପ୍ରତିଶ୍ରୁତି କେବଳ ନିର୍ବାଚନ ପାଇଁ ତାହା କେବେ ହେଲେ ଲାଗୁ ହେବ ନାହିଁ ବୋଲି କେନ୍ଦ୍ରମନ୍ତ୍ରୀ ରବିଶଙ୍କର ପ୍ରସାଦ କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ତେବେ ଗତକାଲି ଛତିଶଗଡରେ ରାହଲ ଗାନ୍ଧି କହିଥିଲେ ଯେ, କଂଗ୍ରେସ କ୍ଷମତାକୁ ଆସିଲେ ସମସ୍ତଙ୍କ ପାଇଁ ସର୍ବନିମ୍ନ ଆୟ ସୁନିଶ୍ଚିତ କରିବ । ଏକ ଦଳୀୟ ସଭାରେ ଭାଷଣ ଦେଇ ରାହୁଲ ଗାନ୍ଧୀ କହିଥିଲେ, ଦାରିଦ୍ର୍ୟତା ଭିତରେ ନୂଆ ଭାରତର ସ୍ୱପ୍ନ ଦେଖିବା ସଂଭବ ନୁହେଁ । ତେଣୁ ଆମାଗୀ ନିର୍ବାଚନରେ କଂଗ୍ରେସ କ୍ଷମତାକୁ ଆସିଲେ, ସମସ୍ତ ଗରିବଙ୍କ ସର୍ବନିମ୍ନ ଆୟ ସୁନିଶ୍ଚିତ କରିବ । ଏହା କେବଳ ପ୍ରତିଶ୍ରୁତି ନୁହେଁ ବରଂ ଦେଶ ପାଇଁ କଂଗ୍ରେସର ଦୁରଦୃଷ୍ଟି ବୋଲି ରାହୁଲ କହିଥିଲେ ।
ଏହି ଯୋଜନାରେ ଗରିବଙ୍କ ଅକାଉଁଟକୁ ସିଧାସଳଖ ଟଙ୍କା ଆସିବ । ମୋଦି ସରକାର ଚାଷୀମାନଙ୍କ ପାଇଁ ଏକ ବଡ ଧରଣର ପ୍ୟାକେଜ ଘୋଷଣା କରିବାକୁ ଯୋଜନା କରୁଥିବାବେଳେ ରାହୁଲ ଏହା ପୂର୍ବରୁ ସର୍ବନିମ୍ନ ଆୟ ଗ୍ୟାରେଂଟି ଘୋଷଣା କରି ସମସ୍ତଙ୍କୁ ଚମକାଇ ଦେଇଛନ୍ତି । ସେ କହିଛନ୍ତି ଯେ ଦେଶରୁ ଦାରିଦ୍ର୍ୟ ଏବଂ କ୍ଷୁଧା ହଟାଇବା ପାଇଁ ଏହା ଏକ ଐତିହାସିକ ପଦକ୍ଷେପ ହେବ । ରାୟପୁରରେ ଅନୁଷ୍ଠିତ ଏକ କୃଷକ ସମାବେଶରେ ଉଦବୋଧନ ଦେବା ଅବସରରେ ଏହି ଘୋଷଣା କରିଛନ୍ତି । ଏହା ସହିତ ରାହୁଲ ପ୍ରଧାନମନ୍ତ୍ରୀ ମୋଦିଙ୍କୁ ସମାଲୋଚନା କରି କହିଛନ୍ତି ଦେଶରେ ଏବେ ଧନୀ ଓ ଗରିବ, ଦୁଇଟି ଭାରତ ପାଇଁ ବିଜେପି ସରକାର ପ୍ରୟାସ କରୁଛନ୍ତି । କିନ୍ତୁ କଂଗ୍ରେସ ଗୋଟିଏ ଭାରତକୁ ହିଁ ଦୃଷ୍ଟିରେ ରଖି କାର୍ଯ୍ୟ କରୁଛି । ତେବେ ପ୍ରଶ୍ନ ଉଠୁଛି କଂଗ୍ରେସର ଏହି ପ୍ଲାନ ଆଗାମି ନିର୍ବାଚନ ପାଇଁ ଗେମ ଚେଞ୍ଜର ସାବ୍ୟସ୍ତ ହେବ କି?