୨୦୨୪ ପାଇଁ ବିଜେଡିର ସମରସଜ୍ଜା, ଘୋଷଣା ହେଲା ଜିଲ୍ଲା ପର୍ଯ୍ୟବେକ୍ଷକ ତାଲିକା
କନକ ବ୍ୟୁରୋ: ଆସନ୍ତା ୨୦୨୪ ନିର୍ବାଚନ ଉପରେ ଫୋକସ କରିଛି ବିଜୁ ଜନତା ଦଳ । ବରିଷ୍ଠ ପର୍ଯ୍ୟବେକ୍ଷକ ପରେ ଘୋଷଣା ହେଲା ଜିଲ୍ଲା ପର୍ଯ୍ୟବେକ୍ଷକ ତାଲିକା । ୩୦ ସାଂଗଠନିକ ଜିଲ୍ଲା ପାଇଁ ୨୫ ଜଣ ନେତାଙ୍କୁ ଦାୟିତ୍ୱ ମିଳିଛି । ହେଲେ ବିଜେଡିର ଜିଲ୍ଲା ପର୍ଯ୍ୟବେକ୍ଷକ ତାଲିକାରୁ ବାଦ ପଡିଛନ୍ତି ପୂର୍ବରୁ ଜଗତସିଂହପୁର ଜିଲ୍ଲା ପର୍ଯ୍ୟବେକ୍ଷକ ଥିବା ମନ୍ତ୍ରୀ ସମୀର ରଂଜନ ଦାଶ । ଜିଲ୍ଲାପରିଷଦ ସଭ୍ୟ ଧର୍ମେନ୍ଦ୍ର ସାହୁ ଆତ୍ମହତ୍ୟା ମାମଲାରେ ମନ୍ତ୍ରୀ ବିବାଦ ଘେରକୁ ଆସିବା ପରେ ତାଙ୍କୁ ଦାୟିତ୍ୱ ଦିଆଯାଇନଥିବା ଚର୍ଚ୍ଚା ହେଉଛି । ଏହାରି ଭିତରେ ଅକ୍ଷୟ ନାୟକ ମନ୍ତ୍ରୀଙ୍କ ଆଡୁ ତାଙ୍କ ଜୀବନ ପ୍ରତି ବିପଦ ଥିବା ଅଭିଯୋଗ ଆଣିଛନ୍ତି । ଏକ ଭିଡିଓ ମାଧ୍ୟମରେ ତାଙ୍କୁ ଧମକଚମକ ଦିଆଯାଉଥିବା କହିଛନ୍ତି ଅକ୍ଷୟ ।
Kanak News is now on WhatsApp
Join and get latest news updates delivered to you via WhatsApp
ବିଜେଡିର ଜିଲ୍ଲା ପର୍ଯ୍ୟବେକ୍ଷକ ତାଲିକାରୁ ବିଜେଡିର ହେଭିୱେଟ ନେତା ସଂଜୟ ଦାସବର୍ମାଙ୍କୁ ପୁଣି ଥରେ ନିରାଶ ହେବାକୁ ପଡିଛି । ସେହିପରି ଯୁବ ବ୍ୟାପାର ଓ ଗୃହରାଷ୍ଟ୍ରମନ୍ତ୍ରୀ ତୁଷାରକାନ୍ତି ବେହେରା, କଟକ ମେୟର ସୁବାସ ସିଂ, ପୂର୍ବତନ ବିଧାୟକ ଦେବାଶିଷ ସାମନ୍ତରାୟ ଜିଲ୍ଲା ପର୍ଯ୍ୟବେକ୍ଷକ ତାଲିକାରୁ ବାଦ ପଡିଛନ୍ତି । ପୂର୍ବରୁ ବିଜୁ ଜନତା ଦଳ ପକ୍ଷରୁ ଯୁବ, ମହିଳା ଓ ଛାତ୍ର ସଂଗଠନର ପୁର୍ନବିନ୍ୟାସ ପରେ ଏବେ ହେଭିୱେଟ ନେତାଙ୍କୁ ଜିଲ୍ଲା ପର୍ଯ୍ୟବେକ୍ଷକ ଦାୟିତ୍ୱ ଦିଆଯାଇଛି । ଏବେ ଘୋଷଣା ହୋଇନଥିବା ନିଗମ ଲଡୁକୁ ବହୁ ଆଶାୟୀ ଚାହିଁ ରହିଛନ୍ତି ।