କୋଟିଆରେ ଆନ୍ଧ୍ରର ନିର୍ବାଚନ ପରେ ଧର୍ମେନ୍ଦ୍ରଙ୍କ ଟ୍ୱିଟର କଟାକ୍ଷ । କହିଲେ ବେଳ ଥାଉଥାଉ ପଦକ୍ଷେପ ନିଅନ୍ତୁ ରାଜ୍ୟ ସରକାର । ବିଜେଡି କହିଲା ନ୍ୟାୟାଳୟରେ ରହିଛି ମାମଲା ।
କନକ ବ୍ୟୁରୋ: ସଂଘୀୟ ବ୍ୟବସ୍ଥାରେ ଥାଇ ଓଡିଶାର ସ୍ୱାଭିମାନ ଓ ଅସ୍ମିତାକୁ ଚ୍ୟାଲେଞ୍ଜ କରି କୋରାପୁଟ କୋଟିଆରେ ନିର୍ବାଚନ କରିଛି ଆନ୍ଧ୍ରପ୍ରଦେଶ । ହେଲେ, ହଠାତ ଆସି ଆନ୍ଧ୍ର ପ୍ରଶାସନ ଏହି ନିର୍ବାଚନ କରିନାହିଁ । ଏଥିପାଇଁ ଦୀର୍ଘଦିନ ହେବ ସେଠାରେ ବିଭିନ୍ନ ବିକାଶ ମୂଳକ କାର୍ଯ୍ୟ ଜାରି ରଖିଥିଲା ଆନ୍ଧ୍ର ସରକାର । ଏପରିକି ନିର୍ବାଚନ ପାଇଁ ବିଜ୍ଞପ୍ତିି ଜାରି ପରେ ଏହି ଖବର ଗଣମାଧ୍ୟମରେ ବାରମ୍ବାର ପ୍ରସାରିତ ହୋଇଛି । ହେଲେ ନିର୍ବାଚନ ରୋକିବା ପାଇଁ ଯେଉଁଭଳି ତତ୍ପରତା ପ୍ରକାଶ ପାଇବା କଥା କୌଣସି ସ୍ତରରେ ସେଭଳି ପଦକ୍ଷେପ ନିଆଯାଇନଥିବା ଅଭିଯୋଗ କରିଛନ୍ତି ବିରୋଧୀ ।
Kanak News is now on WhatsApp
Join and get latest news updates delivered to you via WhatsApp
କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଟୁଇଟ୍ କରି ଲେଖିଛନ୍ତି, ଆନ୍ଧ୍ର ଓଡିଶାର ଭୌଗଳିକ ସୀମାରେ ପଶି କୋରାପୁଟ, ଗଂଜାମ, ଗଜପତି ଜିଲ୍ଲାରେ ଓଡିଶାର ଗାଁକୁ ପଂଚାୟତ ନିର୍ବାଚନରେ ସାମିଲ କରିବା ପାଇଁ ଉଦ୍ୟମ କରିବା ଖବର ଚିନ୍ତାଜନକ । ଆନ୍ଧ୍ର ହେଉ ବା ଅନ୍ୟ ପଡୋଶୀ ରାଜ୍ୟମାନଙ୍କ ସହ ସୀମା ବିବାଦ ଅନେକ ସମୟରେ ତିକ୍ତତା ସୃଷ୍ଟି କରୁଛି । ସମୟ ଥାଉ ଥାଉ ପଦକ୍ଷେପ ନନେଲେ ଆଗକୁ ଆହୁରି ଖରାପ ସମୟକୁ ସାମ୍ନା କରିବାକୁ ପଡିପାରେ ।
ସେହିପରି ବିରୋଧୀ ଦଳ ନେତା ପ୍ରଦୀପ୍ତ ନାୟକ ଏହି ପ୍ରସଙ୍ଗରେ ରାଜ୍ୟ ସରକାରଙ୍କୁ ଘେରିଛନ୍ତି । ସେ ଟୁଇଟ୍ କରି ଲେଖିଛନ୍ତିି, ଆମ ସୀମାକୁ ସୁରକ୍ଷିତ ରଖିବାରେ ସରକାର ବିଫଳ ହୋଇଛନ୍ତି । ସାଢେ ୪ କୋଟି ଓଡିଆଙ୍କ ଭାବାବେଗକୁ ଆଘାତ କରିବାର ନୈତିକ ଦାୟିତ୍ୱ ମୁଖ୍ୟମନ୍ତ୍ରୀ ନିଅନ୍ତୁ । ସେହିପରି ଏଥିପାଇଁ ସରକାରଙ୍କ ଅପରାଗତକୁ ଦାୟୀ କରିଛି କଂଗ୍ରେସ ।
ଅନ୍ୟପଟେ ଆନ୍ଧ୍ରର ନିର୍ବାଚନ ନେଇ ବିଜେପିର ଆଭିମୁଖ୍ୟକୁ ନିନ୍ଦା କରିଛନ୍ତି ବିଜେଡି ନେତା ଶଶିଭୂଷଣ ବେହେରା । କହିଛନ୍ତି, ସୁପ୍ରିମକୋର୍ଟ ଦୁଇ ଦୁଇ ଥର ଆନ୍ଧ୍ର-ଓଡିଶା ସୀମା ଉପରେ ସ୍ଥିତାବସ୍ଥା ବଜାୟ ରଖିବାକୁ ନିର୍ଦ୍ଦେଶ ଦେଇଛନ୍ତି । ଏପରି ସମୟରେ ସବୁ ଓଡିଆ ଏକଜୁଟ ଏହାର ସମାଧାନ ପାଇଁ ଯତ୍ନବାନ ହେବା ଆବଶ୍ୟକ ବୋଲି ଶଶି ବେହେରା କହିଛନ୍ତି । ଏହାକୁ ନେଇ ମୁହାଁମୁହିଁ ହୋଇଛନ୍ତି ବିଜେଡି- ବିଜେପି । ସୁତରାଂ ଷଢ଼େଇକଳା ଓ ଖରସୁଆଁ ଦୁଃଖ ଓଡିଶାବାସୀଙ୍କ ମନରୁ ଯାଇନଥିବାବେଳେ କୋଟିଆ ହାତରୁ ଖସିଯିବା ଆଶଙ୍କା ପୁଣି ଦେଖାଦେଇଛି । ତେଣୁ ଆନ୍ଧ୍ରର ଏହି ଷଡଯନ୍ତ୍ରକୁ ପଣ୍ଡ କରିବା ପାଇଁ ସମସ୍ତେ ଏକଜୁଟ ହୋଇ ସ୍ୱର ଉତ୍ତୋଳନ କରିବା ଜରୁରୀ ।