କନକ ବ୍ୟୁରୋ : ରାଜ୍ୟସଭା ଉପାଧ୍ୟକ୍ଷ ନିର୍ବାଚନରେ ଏନଡିଏ ପ୍ରାର୍ଥୀଙ୍କୁ ବିଜେଡିର ସମର୍ଥନ ପ୍ରସଙ୍ଗକୁ ନେଇ ରାଜନୀତି ଧମିବାର ନାଁ ନେଉନି । ପ୍ରତିଦିନ ଆସୁଛି ନୂଆ ନୂଆ ବୟାନ୍ । ଆଉ ଆଜି ଖୋଦ୍ ବରିଷ୍ଠ ବିଜେପି ନେତା ବିଜୟ ମହାପାତ୍ର ଦେଇଛନ୍ତି ବଡ ବୟାନ୍ । କହିଛନ୍ତି- ଗୋଟିଏ ପଟେ ପ୍ରେସମିଟ୍ କରି ବିଜେଡି ବିରୋଧରେ ବିଶୋଦଗାର କରୁଛି ଦଳ, ଅନ୍ୟପଟେ ବିଜେପିର ସମର୍ଥନ ଲୋଡୁଛି । ଏହା ଲୋକଙ୍କ ବିଶ୍ୱାସ ହରାଇବ । ଏହି ବୟାନର ଜବାବ୍ରେ ସମୀର ମହାନ୍ତି ପାଲଟା ଆକ୍ରମଣ କରି କହିଛନ୍ତି-ବିଜେଡି ସହ ରହିଛି ବିଜୟଙ୍କ ସମ୍ପର୍କ । ଏସବୁ ଭିତରେ ପିସିସି ସଭାପତି ନିରଞ୍ଜନ ପଟ୍ଟାନୟକ, କଂଗ୍ରେସରେ ଯୋଗ ଦେବାକୁ ଦେଇଛନ୍ତି ନିମନ୍ତ୍ରଣ ।
Kanak News is now on WhatsApp
Join and get latest news updates delivered to you via WhatsApp
ରାଜ୍ୟସଭା ଉପାଧ୍ୟକ୍ଷ ନିର୍ବାଚନରେ ଏନଡିଏ ପ୍ରାର୍ଥୀଙ୍କୁ ବିଜେଡିର ସମର୍ଥନ ପ୍ରସଙ୍ଗକୁ ଗ୍ରହଣ କରିପାରିନାହାନ୍ତି ବିଜେପିର ବରିଷ୍ଠ ନେତା ବିଜୟ ମହାପାତ୍ର । ସେ କହିଛନ୍ତି, ବିଜେଡିକୁ ସମର୍ଥନ ମାଗି ବିଜେପି ନିଜର କ୍ଷତି କରିଛି । ଗୋଟିଏ ପଟେ ସମର୍ଥନ ମାଗୁଛନ୍ତି ଅନ୍ୟପଟେ ପ୍ରେସମିଟ କରି ଗର୍ଜୁଛନ୍ତି । ଏମିତି ହେଲେ ଲୋକେ ବିଜେପିକୁ ବିଶ୍ୱାସ କରିବେନି । ଉଭୟ ଦଳ ସ୍ପଷ୍ଟୀକରଣ ନଦେଲେ ଲୋକେ ଦ୍ୱନ୍ଦ୍ୱରେ ରହିବେ ବୋଲି ମତ ଦେଇଛନ୍ତି ବିଜୟ । ତେବେ ବିଜୟଙ୍କ ଲପରି ଅଭିଯୋଗର ଜବାବ ଦେଇଛନ୍ତି ବିଜେପି ରାଜ୍ୟ ଉପସଭାପତି ସମୀର ମହାନ୍ତି । ବିଜେଡି ନେତାଙ୍କ ସହ ବିଜୟଙ୍କ ସଂପର୍କ ବଢୁଛି ବୋଲି କଟାକ୍ଷ କରିଛନ୍ତି ସମୀର ।
ରାଜ୍ୟସଭା ଉପାଧ୍ୟକ୍ଷ ନିର୍ବାଚନ ପରେ ବିଜେଡି-ବିଜେପିର ସଂପର୍କକୁ ନେଇ ଚର୍ଚ୍ଚା ତେଜୁଥିବା ବେଳେ ଏହା ଉପରେ ମନ୍ତବ୍ୟ ଦେଇଛନ୍ତି ପିସିସି ସଭାପତି । ସେ କହିଛନ୍ତି ବିଜେଡି-ବିଜେପି ଏକକାର ହୋଇ ଯାଇଛନ୍ତି, ଏଠି ବିରୋଧୀ ଦଳର ଭୂମିକାରେ ରହିଛି କେବଳ କଂଗ୍ରେସ । ଯେଉଁ ନେତାମାନେ ରାଜ୍ୟର ବିକାଶ ଚାହୁଁଛନ୍ତି କଂଗ୍ରେସରେ ଯୋଗ ଦେବାକୁ ଆହ୍ୱାନ ଦେଇଛନ୍ତି ନିରଂଜନ । ୨୦୧୯ ନିର୍ବାଚନ ଯେତିକି ପାଖେଇ ଆସୁଛି, ରାଜନୈତିକ ଆକ୍ଷେପ ପ୍ରତି-ଆକ୍ଷେପ ବଢିବାରେ ଲାଗିଛି । ତେବେ ରାଜ୍ୟସଭା ଉପାଧ୍ୟକ୍ଷ ପାଇଁ ଏନଡିଏ ପ୍ରାର୍ଥୀକୁ ବିଜେଡି ସମର୍ଥନ କରିବା ପରେ ଯେତିକି ଦ୍ୱନ୍ଦ୍ୱ କର୍ମୀଙ୍କ ମହଲରେ ରହିଛି, ସେତିକି ଦ୍ୱନ୍ଦ୍ୱ ରହିଛି ନେତାଙ୍କ ଭିତରେ ।