ଋଷି ସୁନକଙ୍କ କୋର ଟିମରେ ସ୍ଥାନ ପାଇଲେ ବିହାର ଯୁବକ ପ୍ରଜ୍ୱଳ, ୧୬ ବର୍ଷ ବୟସରେ କଞ୍ଜରଭେଟିବ ପାର୍ଟିର ନେଇଥିଲେ ସଦସ୍ୟତା

କନକ ବ୍ୟୁରୋ : ଋଷି ସୁନକ ବ୍ରିଟେନର ପ୍ରଧାନମନ୍ତ୍ରୀ ହେବା ପରେ ବ୍ରିଟେନବାସୀଙ୍କ ଠାରୁ ଭାରତୀୟମାନେ ଅଧିକ ଖୁସି ହେଉଛନ୍ତି । ଏହାର କାରଣ ଋଷି ସୁନକ ଜଣେ ଭାରତୀୟ ବଂଶୋଦ୍ଭବ । ଏହା ମଧ୍ୟରେ ବି ପୁଣି ଏକ ଖୁସି ଖବର ହେଉଛି ବିହାରର ଜଣେ ଯୁବକ ଏବେ ସୁନକଙ୍କ କୋର ଟିମରେ ସ୍ଥାନ ପାଇଛନ୍ତି । ୧୬ ବର୍ଷ ବୟସରେ କଞ୍ଜରଭେଟିବ୍ ପାର୍ଟିର ସଦସ୍ୟତା ନେଇଥିବା ପ୍ରଜ୍ୱଳ ପାଣ୍ଡ୍ୟା ଏବେ ସୁନକଙ୍କ କୋର ଟିମରେ ସାମିଲ ହେବାର ସୌଭାଗ୍ୟ ଅର୍ଜନ କରିଛନ୍ତି । ପ୍ରଜ୍ୱଳ ପ୍ରାୟ ୧୦ ବର୍ଷ ହେବ ବ୍ରିଟେନରେ ରହୁଛନ୍ତି ।

୨୦୧୯ ରେ ୧୬ ବର୍ଷ ବୟସରେ ପ୍ରଜ୍ୱଳ ପ୍ରଥମଥର କଞ୍ଜରଭେଟିବ୍ ପାର୍ଟିର ସଦସ୍ୟତା ଗ୍ରହଣ କରିଥିଲେ । ଏହାପରେ ଦଳ ତରଫରୁ ତାଙ୍କୁ ଅଭିଯାନ ଟିମରେ ସାମିଲ କରାଯାଇଥିଲା । ଅଗଷ୍ଟ ୨୦୨୨ ରେ ଯେତେବେଳେ ପ୍ରଧାନମନ୍ତ୍ରୀ ପଦ ପାଇଁ ନିର୍ବାଚନ ହେଲା ସେତେବେଳେ ପାର୍ଟି ତରଫରୁ ପ୍ରଜ୍ୱଳଙ୍କୁ ମୁଖ୍ୟ ଅଭିଯାନ ଟିମରେ ସାମିଲ କରାଗଲା । ଏବେ ସୁନକ ପ୍ରଧାନମନ୍ତ୍ରୀ ହେବା ପରେ ତାଙ୍କୁ କୋର କମିଟିରେ ସାମିଲ କରାଯାଇଛି ।

ପ୍ରଜ୍ୱଳ ପାଣ୍ଡ୍ୟାଙ୍କ ପିତା ବ୍ରିଟେନ ସେନାରେ କାର୍ଯ୍ୟରତ ଅଛନ୍ତି । ତାଙ୍କ ମା ବି ବ୍ରିଟେନରେ ଜଣେ ଶିକ୍ଷୟତ୍ରୀ ଭାବେ କାର୍ଯ୍ୟ କରୁଛନ୍ତି । ଏହାସହ ପ୍ରଜ୍ୱଳଙ୍କ ଭଉଣୀ ପ୍ରାଞ୍ଜଲ ପାଣ୍ଡ୍ୟା କେମ୍ବ୍ରିଜ ବିଶ୍ୱବିଦ୍ୟାଳୟରେ ପଢୁଛନ୍ତି ।