ଯେତେବେଳେ ସେ କିଛି ବି ନଥିଲେ, ସେତେବେଳେ ମୁଁ ଆଇଏଏସ୍ ଥିଲି । ବିହାର ମୁଖ୍ୟମନ୍ତ୍ରୀ ନୀତିଶ କୁମାରଙ୍କ ଉପରେ ବର୍ଷିଲେ ଆରସିପି ସିଂହ । ପଢନ୍ତୁ, କଣ କହିଲେ…
କନକ ବ୍ୟୁରୋ: ବିହାର ମୁଖ୍ୟମନ୍ତ୍ରୀ ନୀତିଶ କୁମାର ଓ ପୂୂୂର୍ବତନ କେନ୍ଦ୍ରମନ୍ତ୍ରୀ ଆରସିପି ସିଂହଙ୍କ ଭିତରେ କଥା କଟାକଟି ଜାରି ରହିଛି । ଆଉ ଏହାରି ଭିତରେ ଆରସିପି ସିଂହ ନୀତିଶଙ୍କ ଉପରେ ବର୍ଷିବା ସହିତ ତାଙ୍କୁ ଜୋରଦାର ଟାର୍ଗେଟ କରିଛନ୍ତି । ଆରସିପି କହିଛନ୍ତି ଯେ, ଯେତେବେଳେ ବିହାରରେ ନୀତିଶଙ୍କ ଔକାତ୍ କିଛି ନଥିଲା, ସେତେବେଳେ ତାଙ୍କ ଔକାତ୍ ଢେର ଗୁଣ ଅଧିକ ଥିଲା ଆଉ ଏବେ ମଧ୍ୟ ରହିଛି ।
Kanak News is now on WhatsApp
Join and get latest news updates delivered to you via WhatsApp
ନୀତିଶ କୁମାର ଯେତେବେଳେ କିଛି ନଥିଲେ, ଟିକେଟ୍ ପାଇଁ ବିହାରରେ ବୁଲୁଥିଲେ, ସେତେବେଳେ ୧୯୮୨ ମସିହାରେ ମୁଁ ଆଇଏଏସ ହେଇସାରିଥିଲି । ସେ ମୋର କଣ ପରିଚୟ ଦେବେ? ସେ ନିଜେ ଯେତେବେଳେ ନୌସେନାର ପରୀକ୍ଷାରେ ଫେଲ୍ ହେଇଯାଇଥିଲେ, ସେତେବେଳେ ମୁଁ ଆଇଏଏସ୍ ପରୀକ୍ଷାରେ ପୂରା ଭାରତରେ ୧୩ ନମ୍ବର ରାଙ୍କ୍ ପାଇଥିଲି ବୋଲି ନୀତିଶଙ୍କୁ ଟାର୍ଗେଟ୍ କରି କହିଛନ୍ତି ଆରସିପି ସିଂହ ।
ତେବେ ଏହି ପୂର୍ବତନ ଜେଡିୟୁ ନେତା କହିଛନ୍ତି ଯେ, କେହି କାହାକୁ ପରିଚୟ ଦିଅନ୍ତି ନାହିଁ । ଗଣତନ୍ତ୍ରରେ ସମସ୍ତ ନାଗରିକ ସମାନ । ତେବେ ସେ ବିଜେପିରେ ସାମିଲ ହେବା କଥାରେ ଉତ୍ତର ରଖି କହିଥିଲେ ଯେ, ତାଙ୍କ ପାଇଁ ସବୁ ଦ୍ୱାର ଖୋଲା ରହିଛି । ସେ ତାଙ୍କ କାର୍ଯ୍ୟକର୍ତ୍ତାଙ୍କ ସହିତ କଥାବାର୍ତ୍ତା ଜାରି ରଖିଛନ୍ତି । ଆଗାମୀ ଦିନରେ କଣ ହେବ ସେନେଇ ସେ ନିଜେ ବି ଜାଣିନାହାଁନ୍ତି ବୋଲି କହିଛନ୍ତି ।
କିଛି ଦିନ ତଳେ ବିହାର ମୁଖ୍ୟମନ୍ତ୍ରୀ ନୀତିଶ କୁମାରଙ୍କୁ ଆରସିପି ସିଂହଙ୍କ ବାବଦରେ ପ୍ରଶ୍ନ କରାଯାଇଥିଲା । ଏହାପରେ ହଠାତ୍ ରାଗିଯାଇଥିଲେ ବିହାର ମୁଖ୍ୟମନ୍ତ୍ରୀ । ଆଉ କହିଥିଲେ, ଆରସିପି ସିଂହଙ୍କୁ ସେ ରାଜନୀତି ଶିଖାଇଥିଲେ । ପାର୍ଟିରେ ପଦ ମଧ୍ୟ ଦେଇଥିଲେ । ହେଲେ ସେ ବିଜେପି ସାଙ୍ଗରେ ମିଶି ଷଡଯନ୍ତ୍ର କରୁଥିଲେ । ଆଉ ଏହାପରେ ଆଜି ନୀତିଶଙ୍କ ଉପରେ ବର୍ଷିଛନ୍ତି ଆରସିପି ସିଂହ ।