କନକ ବ୍ୟୁରୋ : ବିଜୁ ଜନତା ଦଳରେ ଏବେ ବି ଥମିନି ଟ୍ୱିଟ ଓ ଆର୍ଟ୍ଟିକେଲ ଝଡ । ସାଂସଦ ବୈଜୟନ୍ତ ପଣ୍ଡା ଓ ତଥାଗତ ଶତପଥୀଙ୍କ ପରେ ଦଳୀୟ ପରିଚାଳନାକୁ ଦୁଇ ଦୁଇ ଥର ଗଣମାଧ୍ୟମରେ ଟାର୍ଗେଟ କଲେଣି ସାଂସଦ ଭର୍ତ୍ତୃହରି ମହତାବ । ବିଜେପି ଯେଉଁଠି ତୃଣମୂଳ ସ୍ତରକୁ ସଂଗଠିତ କଲାଣି, ସେଠାରେ ପଂଚାୟତ ସମୀକ୍ଷାରେ ଦଳୀୟ କନ୍ଦଳ ଦୂର ହେଉନି ବୋଲି ସେ କହିଛନ୍ତି । ସେପଟେ ଭର୍ତ୍ତୃହରିଙ୍କ ଆର୍ଟ୍ଟିକେଲ ପଢିବା ପରେ ନିଷ୍ପତ୍ତି ନେବେ ବୋଲି କହିଛନ୍ତି ମୁଖ୍ୟମନ୍ତ୍ରୀ ।
Kanak News is now on WhatsApp
Join and get latest news updates delivered to you via WhatsApp
ଏକ ଓଡିଆ ଖବରକାଗଜରେ ବିଜେଡି ଲୋକସଭା ନେତା ଭର୍ତ୍ତୃହରି ମହତାବଙ୍କ ବିଜୁ ଜନତା ଦଳକୁ ନେଇ ମତାମତର ଦୁଇଟି ସଂସ୍କରଣ ବାହାରିଥିଲା । ପ୍ରଥମ ସଂସ୍କରଣରେ ବିଜେପିର ବଢୁଥିବା ପତିଆରାକୁ ନେଇ ବିଜେଡିର ବୟାନବାଜି ଦଳର ଦୁର୍ବଳତାକୁ ପ୍ରମାଣିତ କରୁଥିବା ଉଲ୍ଲେଖ କରିଥିଲେ ।
ଦ୍ୱିତୀୟ ସଂସ୍କରଣରେ ତ ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କ ପଂଚାୟତ ସମୀକ୍ଷାକୁ ଟାର୍ଗେଟ କରିଛନ୍ତି । ଏହା ଦ୍ୱାରା ଦଳ ଭିତରେ ଥିବା କନ୍ଦଳର ଅବସାନ ଘଟୁ ନଥିବା ଦିଗକୁ ସେ ଇସାରା କରିଛନ୍ତି । ବିଜେପି ୩୬୦୦୦ ବୁଥରେ ପିତିଆରା ଜାହିର କରିବା ଯୋଜନା କରୁଛି । ହେଲେ ବିଜେଡି ଓ କଂଗ୍ରେସଙ୍କ ଯୋଜନାକୁ ସନ୍ଦେହ ଦୃଷ୍ଟିରେ ଦେଖିଛନ୍ତି ଭର୍ତ୍ତୃହରି । ସ୍ଥିତି ସଜାଡିବା ବଦଳରେ ଭୁବନେଶ୍ୱରରେ ବିଜେଡି ନେତା କେବଳ ବୟାନବାଜି କରୁଥିବା ଭର୍ତ୍ତୃହରି ଏହି ଆର୍ଟ୍ଟିକେଲ ଜରିଆରେ ଅଭିଯୋଗ କରିଛନ୍ତି ।
ସେପଟେ ଦିଲ୍ଲୀ ଗସ୍ତରୁ ଫେରିଥିବା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏ ଯାଏ ଭର୍ତ୍ତୃହରିଙ୍କ ଆର୍ଟ୍ଟିକଲ ପଢି ନାହାନ୍ତି । ତେବେ ଦଳ ଭିତରେ ଥିବା ଯେଉଁ କନ୍ଦଳକୁ ଭର୍ତ୍ତୃହରି ଟାର୍ଗେଟ କରିଛନ୍ତି, ତାକୁ ଖଣ୍ଡନ୍ତ କରିଛନ୍ତି ନବୀନ । ବରଂ ଦଳ ଶକ୍ତିଶାଳୀ ଥିବା ଦୃଢୋକ୍ତି ପ୍ରକାଶ କରିଛନ୍ତି । ଭର୍ତ୍ତୃହରିଙ୍କ ଏପରି ଆର୍ଟ୍ଟିକେଲ ପରେ ବିଜେଡିରେ ଝଡ ସୃଷ୍ଟି ହୋଇଛି । ଯେଉଁଠି ବିଜେପି ଏହାକୁ ବିଜେଡିର ଭୟ ବୋଲି କହିଛି, ବିଜେଡି ନେତାଙ୍କ ଟାର୍ଗେଟରେ ଭର୍ତ୍ତୃହରିଙ୍କ ସାଂଗଠନିକ କ୍ଷମତା ।
ଦେଶରେ ମୋଦି ଲହରକୁ ନେଇ କିଛି ଦିନ ତଳେ ତଥାଗତ ସଂଦସୀୟ ଦଳ ଭାଙ୍ଗିବା ନେଇ ଟ୍ୱିଟ ଜରିଆରେ ବିଜେଡି ସାଂସଦଙ୍କୁ ଟାର୍ଗେଟ କରିଥିଲେ । ସେହିପରି ବୈଜୟନ୍ତ ଆର୍ଟ୍ଟିକେଲ ଜରିଆରେ ନବୀନଙ୍କୁ ସମୀକ୍ଷା କରିବା ପାଇଁ ଆହ୍ୱାନ ଦେଲେ । ପୂର୍ବରୁ ମୋଦି ଝଡ ଅଟକାଇବା ପାଇଁ କଂଗ୍ରେସ ସହ ମେଂଟ କଥା କହିଥିଲେ ଭର୍ତ୍ତୃହରି । ଏପରି ସ୍ଥଳେ, ଦଳୀୟ କନ୍ଦଳ ଓ ଦୁର୍ବଳତା ପଦାରେ ପଡୁଛି । ନବୀନ ବାରମ୍ବାର ଏହାକୁ ଖଣ୍ଡନ କରୁଥିଲେ ସୁଦ୍ଧା, ଛାମୁଆ ନେତାଙ୍କ ବୟାନବାଜି ଦଳୀୟ ଅନୁଶାସନକୁ ବିପଦରେ ପକାଉଥିବା ନେଇ ଚର୍ଚ୍ଚା ହେଉଛି ।