ଖଜୁରୀ ପତ୍ରରେ ସୁନ୍ଦର ସୁନ୍ଦର କଳାକୃତୀ। ଘରସଜା ଜିନିଷ ତିଆରି କରୁଛନ୍ତି କୁଚିଣ୍ଡା ଡିମିରିମୁଣ୍ଡାର ୭୩ ବର୍ଷୀୟ ମହିଳା।
କନକ ବ୍ୟୁରୋ: ଖଜୁରୀପତ୍ରରେ ସୂକ୍ଷ୍ମ କାରିଗରୀ । ଫୁଲଦାନୀ, ଫୁଲତୋଡା, ମୁକୁଟ ଓ ବ୍ୟାଚ୍ ଭଳି ସୁନ୍ଦର ସୁନ୍ଦର ଘରସଜା ଜିନିଷ ନିଜ ହାତରେ ତିଆରି କରୁଛନ୍ତି ମହିଳା । ଖଜୁରୀ ପତ୍ରକୁ ଫୁଲର ରୂପ ଦେଉଛନ୍ତି ଏମାନେ । ସବୁଠାରୁ ବଡ଼ କଥା ହେଉଛି ଏଭଳି ଚମକ୍ରାର କାରିଗରୀ କରୁଛନ୍ତି ସମ୍ବଲପୁର ଜିଲ୍ଲା କୁଚିଣ୍ଡା ଡିମିରିମୁଣ୍ଡା ଗାଁର ୭୩ ବର୍ଷିୟା ମହିଳା କୁସୁମ ମହାକୁଳ । ସୁନ୍ଦର ସୁନ୍ଦର ପୁଷ୍ପଗୁଛ ତିଆରି କରିବା ସହିତ ଗାଁ ମହିଳାଙ୍କୁ ଏକାଠି କରି ଏକ ସ୍ୱୟଂ ସହାୟିକା ଗୋଷ୍ଠି ଗଢିବା ସହ ତାଲିମ ଦେଉଛନ୍ତି କୁସୁମ । ପ୍ରଥମେ ଖଜୁରୀ ପତ୍ରକୁ ସଂଗ୍ରହ କରି ଏହାକୁ ସୁଖାଇ ରଖିବାକୁ ପଡ଼ିଥାଏ । ଏହି ପତ୍ରରେ ଫୁଲ ତିଆରି କରିବା ପୂର୍ବରୁ ଏହାକୁ ପାଣିରେ ଭିଜାଇବାକୁ ପଡ଼ିଥାଏ । ମହିଳାମାନେ ତିଆରି କରୁଥିବା ଫୁଲର ଚାହିଦା ଅଧିକ ରହୁଥିବାରୁ ଏହାକୁ ବିକ୍ରି କରି କିିଛି ସେମାନେ କିଛି ରୋଜଗାର କରିପାରୁଛନ୍ତି । ଯାହାଦ୍ୱାରା ସେମାନେ ଆତ୍ମନିର୍ଭର ହୋଇପାରୁଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସମ୍ବଲପୁର ଜିଲ୍ଲାପାଳ ଅନ୍ୟନ୍ୟା ଦାସ ଏହି ମହିଳାଙ୍କର ଉଦ୍ୟମକୁ ପ୍ରଶଂସା କରିବା ସହ ଏହାକୁ ବାମଣ୍ଡା କୁସୁମ ନାମରେ ନାମିତ କରିଛନ୍ତି । ଏବଂ ମହିଳାମାନଙ୍କ ଗୋଷ୍ଠିକୁ ମଧ୍ୟ ସେହି ନାମରେ ନାମିତ କରାଯାଇଛି । ସମ୍ବଲପୁରରେ ଆୟୋଜିତ ସମାବର୍ତନ ଉତ୍ସବରେ ମଧ୍ୟ ରାଜ୍ୟପାଳଙ୍କୁ ଏହି ପୁଷ୍ପ ଗୁଛରେ ସମ୍ମାନିତ କରାଯାଇଥିଲା । ସାଧାରଣ ରଙ୍ଗବେରଙ୍ଗର ଫୁଲତୋଡା ଅପେକ୍ଷା ଖଜୁରୀ ପତ୍ରରେ ତିଆରି ଫୁଲ ତୋଡା ଲୋକଙ୍କୁ ବେଶ ଆକୃଷ୍ଟ କରୁଛି । ପରିଶ୍ରମକୁ ଦେଖି ପାରିଶ୍ରମିକ ଅଧିକ ମିଳୁନଥିବାରୁ ସରକାରୀ ପ୍ରୋତ୍ସାହନ ଓ ତାଲିମର ଆବଶ୍ୟକତା ରହିଛି ବୋଲି କହିଛନ୍ତି ଗ୍ରାମବାସୀ ।
ମହିଳା ମାନେ ନିଜର ଘର କାମ ପରେ ଦିନକୁ ୨ଘଣ୍ଟା ପରିଶ୍ରମ କରି ଏଭଳି ସୁନ୍ଦର ସୁନ୍ଦର ଜିନିଷ ତିଆରି କରୁଛନ୍ତି । ଏଥିରେ କୌଣସି କେମିକାଲ ରଙ୍ଗର ବ୍ୟବହାର କରାଯାଉନଥିବା ବେଳେ ଏହାକୁ ଅଧିକ ଦିନ ପର୍ଯ୍ୟନ୍ତ ସାଇତି ରଖାଯାଇପାରିବ । ବିଭିନ୍ନ ମେଳା ମହୋତ୍ସବରେ ଏହାକୁ ପ୍ରଦର୍ଶନ କରିବା ସହ ସ୍ଥାନୀୟ ଅଞ୍ଚଳରେ ବିକ୍ରି କରି କିଛି ରୋଜଗାର କରୁଛନ୍ତି ଏସଏଚଜି ମହିଳା । ତେଣୁ ଏହାର ବିକ୍ରିବଟା ପାଇଁ ବଜାର ବ୍ୟବସ୍ଥା କରିବାକୁ ସାଧାରଣରେ ଦାବି ହୋଇଛି ।