ଟେଲମା-୪୦ ଓ ଟେଲମା-ଏମଏମ ଖାଉଥିଲେ ସାବଧାନ। ଦାମୀ ବ୍ରାଣ୍ଡର ଖୋଳ ଭିତରେ ଥାଇପାରେ ନକଲି ଔଷଧ!
କନକ ବ୍ୟୁରୋ: ଉଚ୍ଚ ରକ୍ତଚାପ ଔଷଧ ଟେଲମା-୪୦ ଓ ଟେଲମା ଏମଏମକୁ ନେଇ ଔଷଧ ବଜାରରେ ହଇଚଇ । ଏହି ଦୁଇଟି ଔଷଧର ଠିକ୍ ଅବିକଳ ଦେଖାଯାଉଥିବା ନକଲି ଔଷଧ ବଜାରରେ ବିକ୍ରି ହେଉଥିବା ଅଭିଯୋଗ ଆସିବା ପରେ ତତ୍ପର ହୋଇଛି ଡ୍ରଗ୍ସ କଣ୍ଟ୍ରୋଲର ଟିମ୍ । ରାଜ୍ୟର ୭ଟି ଜିଲ୍ଲାର ବିଭିନ୍ନ ଔଷଧ ଦୋକାନରେ ଚଢାଉ କରିଛି ଡ୍ରଗ୍ସ କଣ୍ଟ୍ରୋଲ ଟିମ । ଔଷଧର ପରୀକ୍ଷା ନସରିବା ଯାଏଁ ବଜାରରେ ଯେପରି ଏହି ଔଷଧ ବିକ୍ରି ନହେବ ସେଥିପାଇଁ ନିର୍ଦ୍ଦେଶନାମା ଜାରି କରାଯାଇଛି । ଏଥିସହ ସମସ୍ତ ଔଷଧ ଦୋକାନରୁ ଡିପୋକୁ ଅଣାଯାଇଛି ଔଷଧ । ଚଢାଉ ସମୟରେ ଜବତ ହୋଇଥିବା ଔଷଧକୁ ତିଆରି କରିଥିବା ସଂସ୍ଥା ଓ ଲ୍ୟାବକୁ ପଠାଯିବ ବୋଲି ଡ୍ରଗ୍ସ କଣ୍ଟ୍ରୋଲର କହିଛନ୍ତି । ତେବେ ଏହା ଅସଲି କି ନକଲି ତାହା ଜାଣିବା ପାଇଁ ଅତି କମରେ ୭ ଦିନ ଲାଗିବ ବୋଲି ସେ କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଦାମୀ ବ୍ରାଣ୍ଡର ମେଡିସିନ୍ଙ୍କୁ ନକଲ କରାଯାଇ ବଜାରକୁ ଛଡାଯାଉଥିବା ଅଭିଯୋଗ ହେବା ପରେ କଟକର ମାଣିକଘୋଷ ବଜାର, ବାଦାମବାଡି, ବାଙ୍କାବଜାର, ମଙ୍ଗଳବାଗ ସମେତ ୧୨ଟି ସ୍ଥାନରେ ଡ୍ରଗ୍ସ କଣ୍ଟ୍ରୋଲର ବିଭାଗ ପକ୍ଷରୁ ଚଢାଉ କରାଯାଇଛି । ତେବେ ଏହି ଔଷଧ ପାଟଣା, ବିହାର, ବେଙ୍ଗାଲୁରୁରୁ କଟକ ଓ ଭୁବନେଶ୍ୱର ବଜାରକୁ ଆସିଥିବା ଜଣାପଡିଛି । କଟକ, ଭୁବନେଶ୍ୱର, ବାଲେଶ୍ୱର ସମେତ, ରାଜ୍ୟର ପ୍ରାୟ ୭ଟି ଅଂଚଳକୁ ଏହି ଔଷଧ ଯାଇଥିବା ଜଣାପଡ଼ିଛି । ପାଖାପାଖି ହଜାରେ ଦୋକାନକୁ ଏହି ମେଡିସିନ୍ ଯାଇଥିବା ଆଶଙ୍କା କରାଯାଉଛି । ଡ୍ରଗ୍ସ କଣ୍ଟ୍ରୋଲର ବିଭାଗ ଏଯାଏ ଏଭଳି ୩୦ ଲକ୍ଷ ଟଙ୍କାର ଔଷଧ ଜବତ କରି ସାରିଲାଣି । ତେବେ ଏହା ନକଲି ହୋଇଥିଲେ ତାହା ସମସ୍ୟାରେ ପକାଇପାରେ ବୋଲି ବିଶେଷଜ୍ଞ କହିଛନ୍ତି ।
କରୋନା ସମୟରେ କଟକରୁ ପେଟି ପେଟି ନକଲି ଔଷଧ ଜବତ ଘଟଣା ସାରା ରାଜ୍ୟରେ ଚହଳ ସୃଷ୍ଟି କରିଥିଲା । ଏହି ଘଟଣାରେ ବ୍ୟବସାୟୀଙ୍କ ସମେତ ତାଙ୍କ ପତ୍ନୀ ଓ କର୍ମଚାରୀଙ୍କୁ ଗିରଫ ବି କରାଯାଇଥିଲା । ଏହି ମାମଲା ଏବେ ବି ବିଚାରାଧିନ ରହିଛି । ଆଉ ଏହା ଭିତରେ ପୁଣି ରକ୍ତଚାପ ଔଷଧ ନକଲ କରାଯାଇ ବଜାରକୁ ଛଡାଯିବା ଉଦବେଗର ବିଷୟ ହୋଇଛି ।