ମ୍ୟାନେଜର ନିଖୋଜ ମାମଲାରୁ ହଟିଲା ପରଦା । ମାନସିକ ଚାପରୁ ହୋଇଯାଇଥିଲେ ନିଖୋଜ

କନକ ବ୍ୟୁରୋ : ପ୍ରାୟ ତିନି ଦିନର ଛକାପଂଝା, ଖୋଜାଖୋଜି ଓ ଆଶଙ୍କା ଭିତରେ, ଶେଷରେ ବ୍ୟାଙ୍କ ମ୍ୟାନେଜର ତପନ କୁମାର ସାହୁଙ୍କ ନିଖୋଜ ପଛର ରହସ୍ୟ ଉପରୁ ପରଦା ହଟିଛି । ତାଙ୍କୁ କେହି ଅପହରଣ କରି ନଥିଲେ, ବରଂ ମାନସିକ ଚାପ କାରଣରୁ ସେ ନିଜେ ଏଭଳି ନିଷ୍ପତି ନେଇଥିଲେ । ଏକଥା କ୍ୟାମେରା ଆଗକୁ ଆସି ନିଜେ ସ୍ୱୀକାର କରିଛନ୍ତି ବ୍ରାଂଚ ମ୍ୟାନଜର ତପନ କୁମାର ସାହୁ । ମାନସିକ ଚାପ କାରଣରୁ ଏଭଳି ଭୁଲ ହୋଇଗଲା ବୋଲି ସେ କହିଛନ୍ତି ।

ବୁଧବାର ରାତିରେ ବିଶାଖାପାଟଣାରୁ ଫେରୁଥିବା ବେଳେ ଗଞ୍ଜାମ ଗୋଳନ୍ଥରା ଥାନା ନିକଟ ଗିରିସୋଲା ଗେଟ୍ ନିକଟରୁ ପୋଲିସ ତାଙ୍କୁ ଠାବ କରିଥିଲା । ତପନଙ୍କୁ ଠାବ କରିବା ପରେ ଗୋଳନ୍ଥରା ପୋଲିସ ବୈଦେଶ୍ୱର ଥାନା ପୋଲିସକୁ ହସ୍ତାନ୍ତର କରିଥିଲା । ଏହାପରେ ତାଙ୍କୁ ବାଙ୍କୀ ଏସଡିଜେଏମ କୋର୍ଟରେ ହାଜର କରି ପରିବାର ଲୋକଙ୍କୁ ହସ୍ତାନ୍ତର କରାଯାଇଛି ।

ତପନକୁ ଫେରିପାଇ ଏବେ ତାଙ୍କ ପରିବାର ବେଶ୍ ଖୁସି ହୋଇଯାଇଛନ୍ତି । ହେଲେ ଜଣେ ବ୍ୟାଙ୍କ ମ୍ୟାନେଜର ୩ ଦିନ ନିଖୋଜ ରହିବା ପରେ ମିଳିବା ଘଟଣା ଅଂଚଳର ଚର୍ଚ୍ଚା ସୃ୍ଷ୍ଟି କରିଛି ।