ଜୀବନ ନେଇଗଲା ଜନ୍ମଦାତ୍ରୀ : ସାନ ପୁଅକୁ ମାରି ଶୋଇବା ଘରେ ପୋତି ଦେଇଥିଲା ମାଆ; ହତ୍ୟାକାଣ୍ଡର ୧୧ ଦିନ ପରେ ପଦାରେ ପଡିଲା ଖବର
ବାଲେଶ୍ୱରରେ ଚାଂଚଲ୍ୟ, ଅଭିଯୁକ୍ତ ମାଆ ଓ ବଡ ପୁଅକୁ ବାନ୍ଧିଲା ପୁଲିସ
କନକ ବ୍ୟୁରୋ : ପୁଅକୁ ହତ୍ୟା କରି ଘର ଭିତରେ ପୋତିଦେଇଥିଲା ମାଆ । ବିଶ୍ୱାସ ଲାଗୁନଥିଲେ ମଧ୍ୟ ବାଲେଶ୍ୱର ଜିଲ୍ଲା ସୋର ଥାନା ଅନ୍ତର୍ଗତ ଇଚ୍ଛାପୁର ପୋଖରୀ ଗାଁରେ ଘଟିଛି ଏହି ଘଟଣା । ଜନ୍ମକଲା ପୁଅକୁ ନିର୍ମମ ଭାବେ ମାଆ ନିଜ ବଡ ପୁଅ ସହ ମିଶି ହତ୍ୟା କରି ଶୋଇବା ଘରେ ଲୁଣି ଦେଇ ପୋତି ଦେଇଥିଲେ । ହତ୍ୟାକାଣ୍ଡର ୧୧ଦିନ ପରେ ଏହି ଘଟଣା ପଦାକୁ ଆସିଛି । ଖବର ପାଇ ସୋର ଥାନା ପୁଲିସ ଗାଁରେ ପହଂଚି ଅଭିଯୁକ୍ତ ମାଆ ଶୁକୁରୀ ଜେନା ଓ ବଡ ପୁଅ ଜଗବନ୍ଧୁ ଜେନାକୁ ଗିରଫ କରିଛି ।
Kanak News is now on WhatsApp
Join and get latest news updates delivered to you via WhatsApp
ସୂଚନା ଅନୁସାରେ, ଗତ ୧୨ ତାରିଖ ରାତି ୧୧ଟାରେ ଶୁକୁରୀ ଜେନାଙ୍କ ସାନ ପୁଅ ବଳରାମ ମଦ ପିଇ ଘରକୁ ଫେରିଥିଲା । ଘରେ କୌଣସି କଥାକୁ ନେଇ ଉଭୟ ମାଆ ଓ ପୁଅଙ୍କ ମଧ୍ୟରେ ଝଗଡା ହୋଇଥିଲା । ଏଥିରେ ରାଗିଯାଇ ଶୁକୁରୀ ଜେନା ଓ ବଡ ପୁଅ ମିଶି ସାନ ପୁଅ ବଳରାମ ଜେନାକୁ ଶାବଳରେ ଆକ୍ରମଣ କରିଥିଲେ । ଶାବଳ ମାଡରେ ଘଟଣାସ୍ଥଳରେ ଟଳି ପଡିଥିଲା ବଳରାମ । ଏହି ଘଟଣାକୁ ଚପେଇ ଦେବାକୁ ଯାଇ ମାଆ ଓ ବଡ ପୁଅ ମିଶି ସାନ ପୁଅର ମୃତଦେହକୁ ଶୋଇବା ଘରେ ଗାତ ଖୋଳି ଲୁଣ ଦେଇ ପୋତି ଦେଇଥିଲେ । ଏହାରି ଭିତରେ ୧୧ ଦିନ ବିତିଗଲା, ସାନ ଭାଇର ପିଣ୍ଡ ଶ୍ରାଦ୍ଧ କରି ବଡ ଭାଇ ଜଗବନ୍ଧୁ ଜେନା ଫେରିବା ପରେ ପୁରା ଘଟଣା ଜଣାପଡିଛି ।