ଆଉ ମଂଚକୁ ଆସିବେନି ମାନୀ ! ବିଦ୍ୟୁତ ଆଘାତରେ ବାଘାଯତୀନ ଯାତ୍ରା ପାର୍ଟି ଅଭିନେତ୍ରୀଙ୍କ ମୃତ୍ୟୁ
କନକ ବ୍ୟୁରୋ : ବିଦ୍ୟୁତ ଆଘାତରେ ଯାତ୍ରା କଳାକାରଙ୍କ ମୃତ୍ୟୁ । ବାଘାଯତୀନ ଗଣନାଟ୍ୟର ଜଣେ ପ୍ରମୁଖ ଅଭିନେତ୍ରୀ, ସସ୍ମିତା ଖଟୁଆ ଓରଫ ମାନୀଙ୍କର ଗତ ରାତିରେ ବିଦ୍ୟୁତ ଆଘାତରେ ମୃତ୍ୟୁ ହୋଇଛି । ଯାଜପୁର ଜିଲ୍ଲା ଡୁବୁରୀଠାରେ ବାଘାଯତୀନ ଗଣନାଟ୍ୟ ଯାତ୍ରା ପରିବେଷଣ କରିବା ଲାଗି ପହଂଚିଥିବାବେଳେ ଗତକାଲି ରାତିରେ ମଂଚସ୍ଥ ହୋଇଥାନ୍ତା ନାଟକ- କାହାଣୀ କାନ୍ଦୁଛି ଆଖି ଲୁଚାଇ । ଏହି ନାଟକରେ ଲିଡ ରୋଲରେ ନଜର ଆସିଥାନ୍ତେ ।
Kanak News is now on WhatsApp
Join and get latest news updates delivered to you via WhatsApp
ତେବେ ଯାତ୍ରା କଳାକାର ମାନଙ୍କୁ ଏଠାରେ କେତେକ ଅସ୍ଥାୟୀ ଭଡାଘରେ ରଖାଯାଇଥିବାବେଳେ, ମାନୀ ରହୁଥିଲେ ସ୍ଥାନୀୟ ଅଂଚଳର ଗଣେଷ ଦାସ ନାମକ ଜଣେ ବ୍ୟକ୍ତିଙ୍କ ଘରେ । ହେଲେ ଏହି ଭଡାଘର ଲୁହା କବାଟ ବିଦ୍ୟୁତ ସଂସ୍ପର୍ଷରେ ଆସି ଚାର୍ଜ ହୋଇ ରହିଥିବାବେଳେ ଏହାକୁ ଛୁଇଁବା ମାତ୍ରେ ଲାଖି ରହିଥିଲେ ମାନୀ । ତାଙ୍କୁ ତୁରନ୍ତ ଉଦ୍ଧାର କରି ହସ୍ପିଟାଲ ନେଇଥିବାବେଳେ ସେଠାରେ ତାଙ୍କୁ ମୃତ ଘୋଷଣା କରିଥିଲେ ଡାକ୍ତର । କଳିଙ୍ଗନଗର ପୋଲସ ଏ ସଂକ୍ରାନ୍ତରେ ଏକ ଅପମୃତ୍ୟୁ ମାମଲା ରୁଜୁ କରିଛି ।
ମାନୀଙ୍କ ବିଷୟରେ ଦୁଇ ପଦ –
ସସ୍ମିତା ଖଟୁଆ ଓରଫ ମାନୀ । ଯାତ୍ରା ଜଗତରେ ସେ ମିନାକ୍ଷୀ ନାଁରେ ବେଶ ପରିଚିତ । ବାଘାଯତୀନ ଯାତ୍ରା ପାର୍ଟିରେ ସେ ଅନେକ ନାଟକରେ ଅଭିନୟ କରିଛନ୍ତି । ତେବେ ପାର୍ଶ୍ୱ ଅଭିନେତ୍ରୀ ଭାବେ ନଜର ଆସୁଥିବା ମିନାକ୍ଷୀ ଓରଫ ମାନୀ ଗତକାଲି ଡୁବୁରୀରେ ମଂଚସ୍ଥ ହେବାକୁ ଥିବା ନାଟକ ‘କାହାଣୀ କାନ୍ଦୁଛି ଆଖି ଲୁଚାଇ’ ରେ ମୁଖ୍ୟ ଅଭିନେତ୍ରୀ ଭୂମିକାରେ ନଜର ଆସିଥାନ୍ତେ । ତାଙ୍କ ସ୍ୱାମୀ ବିଶ୍ୱଜିତ ଖଟୁଆ ସେହି ବାଘାଯତୀନ ଯାତ୍ରାପାର୍ଟିର ଅପେରା ପରିଚାଳନା ସଦସ୍ୟ ଭାବେ କାମ କରୁଛନ୍ତି । ହେଲେ ମାନୀଙ୍କ ଦୁଃଖଦ ମୃତ୍ୟୁ ପରେ ନାଟକ ବନ୍ଦ ରହିଥିବା ଜଣାପଡିଛି । ଜଣେ ଭଲ କଳାକାରଙ୍କ ଏଭଳି ଆକସ୍ମିକ ମୃତ୍ୟୁକୁ ନେଇ ସ୍ତବ୍ଧ ହୋଇପଡିଛି ଯାତ୍ରା ଜଗତ ।