ପିଲା ଚୋରି ଘଟଣା : ସ୍ପଷ୍ଟୀକରଣ ରଖିଲେ ଏସସିବିର ପ୍ରଶାସନିକ ଅଧିକାରୀ
କନକ ବ୍ୟୁରୋ : କଟକ ବଡ଼ ମେଡିକାଲରେ ପିଲା ଚୋରି ଘଟଣାରେ ସ୍ପଷ୍ଟୀକରଣ ରଖିଛନ୍ତି ଏସସିବିର ପ୍ରଶାସନିକ ଅଧିକାରୀ । ପିଲା ଅଦଳବଦଳ ବାହାନା କରୁଥିବା ଦମ୍ପତି ଏସସିବି ଆସିଥିଲେ । ତାଙ୍କର ପୁତ୍ର ସନ୍ତାନ୍ତ ନେବା ବଦଳରେ ଆଉ ଜଣଙ୍କର ଶିଶୁ କନ୍ୟାକୁ ନେଇଯାଇଥିବା କହିଥିଲେ । ଅଦଳବଦଳ ନାଟକ ରଚିଥିବା ମହିଳା ଓ ତାଙ୍କ ସ୍ୱାମୀ ସତ କଥା ସ୍ୱୀକାର କରିଛନ୍ତି । ଏହା ପୂର୍ବରୁ ସେ ଲଗାତର ୮ ଦିନ ଧରି ମେଡିକାଲର ସ୍ତ୍ରୀ ଓ ପ୍ରସୂତୀ ବିଭାଗକୁ ଆସୁଥିଲେ ।
Kanak News is now on WhatsApp
Join and get latest news updates delivered to you via WhatsApp
ହେଲେ ସେ କେବେ ଆଡମିଶନ୍ କରିନାହାନ୍ତି କି ସେଠାରେ ତାଙ୍କର ପୁତ୍ର ସନ୍ତାନ ହୋଇନାହିଁ ବୋଲି କହିଛନ୍ତି ଏସସିବିର ପ୍ରଶାସନିକ ଅଧିକାରୀ । ଘଟଣା ସମ୍ପର୍କରେ ତଦନ୍ତ କରାଯାଉଛି । ଏଥିରେ ଆଉ କିଛି ଲୋକଙ୍କ ସମ୍ପୃକ୍ତି ଥାଇପାରେ । ସେମାନଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ଏସସିବି କର୍ତ୍ତୃପକ୍ଷ ମଙ୍ଗଳାବାଗ ଥାନାରେ ମାମଲା ରୁଜୁ କରିଛନ୍ତି । କଟକ ପ୍ରତାପନଗରୀ ଅଞ୍ଚଳରେ ଏହି ଦମ୍ପତିଙ୍କୁ ଏବେ ପୋଲିସ ଅଟକ ରଖିଛି । ଘଟଣାରେ ମୋଟ୍ ତିନି ଜଣଙ୍କୁ ଅଟକ ରଖାଯାଇଛି ।
ବଡ଼ ଡାକ୍ତରଖାନାର ଆଇସିୟୁରେ ଭର୍ତ୍ତି ହେବାର ମାତ୍ର ଅଧ ଘଣ୍ଟା ଭିତରେ ଜଣେ ନବଜାତ ଶିଶୁ କନ୍ୟା ହଠାତ୍ ଗାଏବ ହୋଇଯାଇଥିଲେ । ପ୍ରତାପନଗରୀ ଅଞ୍ଚଳରେ ଜଣେ ବ୍ୟକ୍ତି ଶିଶୁଟିକୁ ନେଇ ଯାଇଥିଲେ । ଧରାପଡ଼ିବା ପରେ ସେ ଫେରସ୍ତ କରିଛନ୍ତି । ସିସିଟିଭି କ୍ୟାମେରା ଫୁଟେଜ ଯାଞ୍ଚ ପରେ ଶିଶୁ କନ୍ୟା ଚୋରି ହୋଇଥିବା ଜଣାପଡ଼ିଥିଲା । ପୋଲିସ ତାଙ୍କୁ ଠାବ କରି ଶିଶୁ କନ୍ୟାକୁ ଉଦ୍ଧାର କରିଛି ।
ଶିଶୁ କନ୍ୟାର ଏବେ ଚିକିତ୍ସା ଚାଲିଛି ଓ ସେ ଏବେ ସୁସ୍ଥ ଅଛି । ଗତ ୨୨ ତାରିଖରେ ପୁରୀ ବାସେଳୀସାହିର ତିଳୋତମା ଯାଆଁଳା ଶିଶୁକନ୍ୟାକୁ ଜନ୍ମ ଦେଇଥିଲେ । ସେହିଦିନ ଗୋଟିଏ ଶିଶୁ କନ୍ୟା ଗାଏବ୍ ହୋଇଯାଇଥିବା ଅଭିଯୋଗ ହୋଇଥିଲା । ତାଙ୍କ ଶିଶୁ କନ୍ୟା ଚୋରି ହୋଇଥିବା ନେଇ ତିଳୋତମାଙ୍କ ସ୍ୱାମୀ ମଙ୍ଗଳାବାଗ୍ ଥାନାରେ ଏତଲା ଦେଇଥିଲେ । ପୋଲିସ ସିସିଟିଭି ଫୁଟେଜ୍ ଯାଞ୍ଚ କରି ଜଣେ ବ୍ୟକ୍ତି ପିଲାଟିକୁ ନେଇଯାଇଥିବା ଜାଣିବାକୁ ପାଇଥିଲା । ପରେ ଶିଶୁକନ୍ୟାଟିକୁ ଉଦ୍ଧାର କରିଛି ପୋଲିସ ।