ରାଜନୀତିକୁ ‘ଗୁଡବାଏ’ କହିଲେ ବିଜେପି ନେତା ବାବୁଲ ସୁପ୍ରିୟୋ । ପଢନ୍ତୁ, କଣ୍ଠଶିଳ୍ପୀରୁ କେମିତି ବନିଥିଲେ କେନ୍ଦ୍ରମନ୍ତ୍ରୀ।
କନକ ବ୍ୟୁରୋ: ଜଣେ ସାଧାରଣ କଣ୍ଠଶିଳ୍ପୀରୁ ରାଜନେତା ଆଉ ତା ପରେ ସାଂସଦରୁ କେନ୍ଦ୍ରମନ୍ତ୍ରୀ । ବାବୁଲ ସୁପ୍ରିୟୋଙ୍କ ରାଜନୈତିକ କ୍ୟାରିୟର ଥିଲା ବେଶ ରୋମାଞ୍ଚକର । ଦିନେ ସେ ବଲିଉଡ୍, ବେଙ୍ଗଲୀ ଆଉ ଓଡିଆ ଫିଲ୍ମ ଓ ଆଲବମରେ ଗୀତ ଗାଇ ଦର୍ଶକଙ୍କ ମନୋରଞ୍ଜନ କରୁଥିଲେ । ହେଲେ ତାପରେ ରାଜନୀତି ତାଙ୍କ କ୍ୟାରିୟରର ମୋଡ ଦେଇଥିଲା । ପଶ୍ଚିମବଙ୍ଗରୁ ସେ ଯାଇଥିଲେ ସଂସଦ ଆଉ ବନିଥିଲେ ମୋଦୀ ସରକାରରେ କେନ୍ଦ୍ରମନ୍ତ୍ରୀ । ହେଲେ ଆଜି ସେ ସବୁ କୁ ଗୁଡବାଏ କହି ରାଜନୀତିରୁ ସନ୍ୟାସ ନେଇଛନ୍ତି ବିଜେପି ନେତା ତଥା ପୂର୍ବତନ କେନ୍ଦ୍ରମନ୍ତ୍ରୀ ବାବୁଲ ସୁପ୍ରିୟୋ ।
Kanak News is now on WhatsApp
Join and get latest news updates delivered to you via WhatsApp
ନିଜ ଫେସବୁକ ପେଜରେ ଏକ ବାର୍ତ୍ତା ଲେଖି ପଶ୍ଚିମବଙ୍ଗର ନେତା, ତଥା ଆସନସୋଲର ବିଜେପି ସାଂସଦ ରାଜନୀତିରୁ ସନ୍ୟାସ ଘୋଷଣା କରିଛନ୍ତି । ଫେସବୁକ ପେଜରେ ସେ ଲେଖିଛନ୍ତି, ଲୋକଙ୍କ ସେବା କରିବାକୁ ରାଜନୀତିରେ ରହିବା ଜରୁରୀ ନୁହେଁ । ରାଜନୀତିରୁ ଅଲଗା ହୋଇ ମଧ୍ୟ ସେ ଲୋକଙ୍କ ସେବା କରିପାରିବେ । ସେ ସବୁବେଳେ ବିଜେପି ସହ ଅଛନ୍ତି ଏବଂ ରହିବେ ବୋଲି ନିଜ ଫେସବୁକ୍ ପେଜରେ ଲେଖିଛନ୍ତି ।
ବାବୁଲ ସୁପ୍ରିୟୋଙ୍କ ଜନ୍ମ ୧୯୭୦ ମସିହାରେ ବେଙ୍ଗଲର ଏକ ସମ୍ଭ୍ରାନ୍ତ ପରିବାରରେ ହୋଇଥିଲା । ସେ ତାଙ୍କ ଜେଜେ ମା’ଙ୍କ ଦ୍ୱାରା ବେଶ ପ୍ରଭାବିତ ହୋଇଥିଲେ । ଯିଏ କି ଜଣା ଜଣାଶୁଣା ବେଙ୍ଗଲୀ କମ୍ପୋଜର ଥିଲେ । ଗ୍ରାଜୁଏସନ ଶେଷ କରିବା ପରେ ବାବୁଲ ସୁପ୍ରିୟୋ ଜଣେ ବ୍ୟାଙ୍କ କର୍ମଚାରୀ ଭାବେ କାମ ଆରମ୍ଭ କରିଥିଲେ ହେଲେ ୧୯୯୨ ମସିହାରେ ସେ ନିଜ କାମ ଛାଡି ମୁମ୍ବାଇ ଚାଲିଆସିଥିଲେ । ସେଠାରେ ସେ ସଙ୍ଗୀତରେ ନିଜ କ୍ୟାରିୟର କରିବାକୁ ଲଢିଥିବାବେଳେ ନାନାଦି ଷ୍ଟେଜ୍ ସୋ ଓ ବିଭିନ୍ନ ବଲିଉଡ୍ ଫିଲ୍ମରେ ଗୀତ ଗାଇବାକୁ ଲାଗିଥିଲେ । କହୋ ନା ପ୍ୟାର ହେ, ଦିଲ ନେ ଦିଲ କୋ ପୁକାରା ଭଳି ଫିଲ୍ମରେ ତାଙ୍କର କଣ୍ଠର ଜଲୱା ଦେଖିବାକୁ ମିଳିଥିଲା ।
ଏହାରି ଭିତରେ ୨୦୧୪ ମସିହାରେ ସେ ରାଜନୀତିରେ ପ୍ରବେଶ କରିଥିଲେ । ବିଜେପି ଟିକେଟରୁ ସେ ଲୋକସଭା ନିର୍ବାଚନ ଲଢିଥିବାବେଳେ ଆସନସୋଲରୁ ବିଜେପି ସାଂସଦ ଭାବେ ପହଞ୍ଚିଥିଲେ ପାର୍ଲିଆମେଣ୍ଟ । ଏହାପରେ ତାଙ୍କୁ ମୋଦୀ କ୍ୟାବିନେଟରେ ମନ୍ତ୍ରୀପଦ ମଧ୍ୟ ମିଳିଥିଲା । ୨୦୧୯ରେ ମଧ୍ୟ ସେ ବିଜେପି ଟିକେଟରୁ ପୁଣି ସଂସଦକୁ ନିର୍ବାଚିତ ହୋଇଥିଲେ ଆଉ କେନ୍ଦ୍ରମନ୍ତ୍ରୀ ଭାବେ ଦାୟିତ୍ୱ ତୁଲାଇଥିଲେ । ହେଲେ ଗତ ମୋଦୀ କ୍ୟାବିନେଟ ସମ୍ପ୍ରସାରଣରେ ତାଙ୍କୁ ମନ୍ତ୍ରୀପଦ ମିଳିନଥିଲା ।
ଏହାକୁ ନେଇ ଗତ କିଛି ଦିନ ହେଲା ସେ ଖୁସି ନଥିବା ସୂଚନା ମିଳୁଥିଲା । ଏପରିକି ବିଜେପିରୁ ତାଙ୍କ ଭୂମିକା କମ ହେଉଥିବା ନେଇ ଅନେକ ରାଜନୈତିକ ପଣ୍ଡିତମାନେ ଆକଳନ କରିଥିଲେ । କୁହାଯାଉଥିଲା, ବାବୁଲ ସୁପ୍ରିୟୋ ଖୁବଶୀଘ୍ର କିଛି ବଡ ନିଷ୍ପତ୍ତି ନେଇପାରନ୍ତି ଏବଂ ତୃଣମୂଳ କଂଗ୍ରେସରେ ସାମିଲ ହୋଇପାରନ୍ତି । ହେଲେ ସେ ସବୁ କଳ୍ପନାଜଳ୍ପନାରେ ପୂର୍ଣ୍ଣଚ୍ଛେଦ ପକାଇ ଆଜି ସେ ରାଜନୀତିରୁ ସନ୍ୟାସ ଘୋଷଣା କରିଛନ୍ତି ।