ଏଣିକି ଅସ୍ତ୍ରୋପଚାର କରିବେ ଆୟୁର୍ବେଦିକ ଡାକ୍ତର । ଅସ୍ତ୍ରୋପଚାର ପାଇଁ ସ୍ନାତକୋତର ଆୟୁର୍ବେଦିକ ଛାତ୍ରଙ୍କୁ ଦିଆଯିବ ସ୍ୱତନ୍ତ୍ର ତାଲିମ୍ । କାନ, ନାକ, ଆଖି, ଦାନ୍ତ, ଆଦି ଅସ୍ତ୍ରୋପଚାର କରିବା ପାଇଁ ଆଇନସମ୍ମତ ଅନୁମତି ।
କନକ ବ୍ୟୁରୋ : ଏଣିକି ଆୟୁର୍ବେଦିକ ଡାକ୍ତର କରିପାରିବେ ଅସ୍ତ୍ରୋପଚାର । ଆଖି, କାନ, ନାକ ପେଟ ଭଳି ଜଟିଳ ରୋଗ ପାଇଁ ଆବଶ୍ୟକ ହେଉଥିବା ଅସ୍ତ୍ରୋପଚାର ବି କରିପାରିବେ ଆୟୁର୍ବେଦିକ ଡାକ୍ତର । ଏନେଇ ଅନୁମତି ଦିଆଯିବା ସହ ବିଧିବଦ୍ଧ ଭାବେ ବିଜ୍ଞପ୍ତି ପ୍ରକାଶ ପାଇଛି । ଆୟୁର୍ବେଦିକ ଡାକ୍ତରୀ ପାଠ ପଢ଼ୁଥିବା ସ୍ନାତକୋତର ଛାତ୍ରଛାତ୍ରୀଙ୍କୁ ଏନେଇ ସ୍ୱତନ୍ତ୍ର ପ୍ରଶିକ୍ଷଣ ଦିଆଯିବା ନେଇ ଏଥିରେ କୁହାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ପାରମ୍ପରିକ ଚିକିତ୍ସା ପ୍ରଣାଳୀକୁ ମୋଦି ସରକାର ପ୍ରାଧାନ୍ୟ ଦେଉଥିବା ବେଳେ ଏଭଳି ଏକ ନିଷ୍ପତି ନିଆଯାଇଛି, ଯାହା ଆୟୁର୍ବେଦିକ ଡାକ୍ତର ଚିକିତ୍ସା ପରିସରକୁ ଆହୁରି ବ୍ୟାପକ କରିବ ।
ଆଧୁନିକ ଚିକିତ୍ସା ବିଜ୍ଞାନ ଏବଂ ଭାରତୀୟ ପାରମ୍ପରିକ ଚିକିତ୍ସା ପ୍ରଣାଳୀ ଭିତରେ ଏକ ଅଦ୍ଭୁତ ସଂଯୋଗ ସ୍ଥାପନ ହେବାକୁ ଯାଉଛି । କାରଣ, ଏଣିକି ଏଲୋପେଥିକ୍ ଡାକ୍ତରଙ୍କ ଭଳି, ଆୟୁର୍ବେଦିକ ଡାକ୍ତର ମଧ୍ୟ ଅସ୍ତ୍ରୋପଚାର କରିପାରିବେ । କେନ୍ଦ୍ର ସରକାରଙ୍କ ପକ୍ଷରୁ ଜାରି ହୋଇଥିବା ବିଜ୍ଞାପନ ଅନୁସାରେ,
– ଆୟୁର୍ବେଦିକ ଡାକ୍ତରୀ ପାଠ ପଢୁଥିବା ଛାତ୍ରଛାତ୍ରୀଙ୍କ ଏଥିପାଇଁ ସ୍ୱତନ୍ତ୍ର ପ୍ରଶିକ୍ଷଣ ଦିଆଯିବ
-ସ୍ନାତକୋତ୍ତର ପାଠ୍ୟକ୍ରମରେ ଶଲ୍ୟତନ୍ତ୍ର ଓ ଶାଲକ୍ୟତନ୍ତ୍ର ଦୁଇ ପ୍ରକାର ପ୍ରଶିକ୍ଷଣ ଦିଆଯିବ
-ଶଲ୍ୟତନ୍ତ୍ରରେ ଶରୀରର ଅଂଶ କାଟିବା, ଚର୍ମ ସ୍ଥାନାନ୍ତର ଆଦିର ତାଲିମ ମିଳିବ
-ଶାଲକ୍ୟତନ୍ତ୍ରରେ ଆଖି, ନାକ, ଗଳା, ମୁଣ୍ଡ ଆଦି ଅସ୍ତ୍ରୋପଚାର ତାଲିମ ଦିଆଯିବ
ଭାରତୀୟ କେନ୍ଦ୍ରୀୟ ଭେଷଜ ପରିଷଦ ଅଧିନିୟମର ସଂଶୋଧନ ପରେ ଏଭଳି ଏକ ନିଷ୍ପତି ହେବା ସଂଭବ ହୋଇଛି । ତେବେ ଭାରତୀୟ କେନ୍ଦ୍ରୀୟ ଭେଷଜ ପରିଷଦର ଅଧ୍ୟକ୍ଷ କହିଛନ୍ତି, ଆୟୁର୍ବେଦିକ୍ ଚିକିତ୍ସାରେ ଅସ୍ତ୍ରୋପଚାର ହେଉଥିଲା, ଯାହାକୁ କେବଳ ଆଇନସମ୍ମତ କରାଗଲା । ଏପଟେ ଆୟୁର୍ବେଦିକ ଡାକ୍ତର ଏହାକୁ ସ୍ୱାଗତ କରିଥିବା ବେଳେ ଡାକ୍ତର ସଂଘ କହିଛି, ଏଥିପାଇଁ ତାଲିମ ଆବଶ୍ୟକ ।
ବଡ଼ କଥା ହେଉଛି, ଆଜି ଯେତେବେଳେ ସାରା ବିଶ୍ୱ କରୋନା ମହାମାରୀ ଦେଇ ଗତି କରୁଛି ଏବଂ ଡାକ୍ତରଙ୍କ ଅଭାବକୁ ସମସ୍ତେ ଅନୁଭବ କରୁଛନ୍ତି ଠିକ୍ ଏତିକି ବେଳେ ସରକାର ନେଇଥିବା ଏହି ନିଷ୍ପତି ହୁଏତ ଆଗକୁ ଫଳପ୍ରଦ ହେବ ।