କପି ଫିଲ୍ମକୁ ପୁରସ୍କାର! ତାଲିକାକୁ ରଦ୍ଦ କଲେ ହାଇକୋର୍ଟ, ନୂଆ ତାଲିକା ଘୋଷଣା ପାଇଁ ନିର୍ଦ୍ଦେଶ।
କନକ ବ୍ୟୁରୋ: ଦକ୍ଷିଣ କୋରିଆର ବହୁଚର୍ଚ୍ଚିତ ଚଳଚିତ୍ର ‘ହୋପ’, ଯାହାର ରିମେକ୍ ହେଉଛି ଓଡ଼ିଆ ଫିଲ୍ମ ‘ଖୁସି’ । ସେହିପରି ପଞ୍ଜାବୀ ଫିଲ୍ମ ‘କ୍ୟାରି ଅନ୍ ଜଟ୍ଟା’, ଯାହାର ଓଡ଼ିଆ ରିମେକ୍ ହେଉଛି ‘ଗୋଲମାଲ ଲଭ୍’ । ନାଁ ଅଲଗା, ଭାଷା ଅଲଗା, କିନ୍ତୁ ବିଷୟବସ୍ତୁ ଓ ଚିତ୍ରନାଟ୍ୟ ସମାନ । ୩୧ ତମ ରାଜ୍ୟ ଚଳଚିତ୍ର ପୁରସ୍କାର ପାଇଁ ଏହି ଦୁଇଟି କପି ଫିଲ୍ମକୁ ଚୟନ କରାଯାଇଥିଲା । ଫିଲ୍ମ ନିର୍ମାଣ ପାଇଁ କୌଣସି ପରିଶ୍ରମ ପଡିଲା ନାହିଁ, ଏପଟେ ମର୍ଯ୍ୟାଦାଜନକ ଚଳଚିତ୍ର ପୁରସ୍କାର ପାଇବା ପାଇଁ ଯୋଗ୍ୟ ହୋଇଗଲେ । ମାମଲାକୁ ଗୁରୁତର ସହ ନେଇ ରାୟ ଦେଇଛନ୍ତି ଉଚ୍ଚ ନ୍ୟାୟାଳୟ ।
Kanak News is now on WhatsApp
Join and get latest news updates delivered to you via WhatsApp
ହାଇକୋର୍ଟଙ୍କ ରାୟ
୩୧ତମ ରାଜ୍ୟ ଚଳଚିତ୍ର ପୁରସ୍କାର ପାଇଁ ଘୋଷଣା କରାଯାଇଥିବା ତାଲିକାକୁ ରଦ୍ଦ କରି ଦେଇଛନ୍ତି ହାଇକୋର୍ଟ
୧ ମାସ ଭିତରେ ନିୟମ ଅନୁସାରେ ସାନି ମନୋନୟନ ତାଲିକା ପ୍ରକାଶ କରିବାକୁ ନିର୍ଦ୍ଦେଶ
ଅନ୍ୟ ଭାଷାର ଚଳଚ୍ଚିତ୍ରରୁ ରିମେକ୍ ହୋଇଥିବା ଦୁଇ ଓଡ଼ିଆ ଫିଲ୍ମ ‘ଖୁସି’ ଓ ‘ଗୋଲ୍ମାଲ୍ ଲଭ୍’କୁ କୌଣସି ବର୍ଗରେ ପୁରସ୍କାର ପାଇଁ ବିଚାରକୁ ନିଆଯିବ ନାହିଁ
ରାଜ୍ୟ ଚଳଚ୍ଚିତ୍ର ପୁରସ୍କାର ଘୋଷଣା ପରେ ଏହାକୁ ନେଇ ବିବାଦ ସୃଷ୍ଟି ହୋଇଥିଲା । ମୌଳିକ କାହାଣୀକୁ ନେଇ ନିର୍ମାଣ ହୋଇଥିବା ‘ଛବିରାଣୀ’ ଚଳଚ୍ଚିତ୍ର ପୁରସ୍କାରରୁ ବାଦ ପଡ଼ିବା ପରେ ନିର୍ଦ୍ଦେଶକ ବବି ଇସଲାମ୍ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ । ଜଷ୍ଟିସ୍ ଡକ୍ଟର ସଂଜୀବ କୁମାର ପାଣିଗ୍ରାହୀଙ୍କ ଖଣ୍ଡପୀଠ ମାମଲାର ଶୁଣାଣି କରି ଚୟନ ପ୍ରକ୍ରିିୟା ଉପରେ ବର୍ଷିଛନ୍ତି । କହିଛନ୍ତି –
ଏପରି ଚୟନ ଅତ୍ୟନ୍ତ ଲଜ୍ଜାର ବିଷୟ
ଓଡ଼ିଆ ସିନେ ସଂସ୍କୃତିରେ ମୌଳିକତା ଉପରେ ଗୁରୁତ୍ୱ ଦିଆଯିବା ଆବଶ୍ୟକ
ଜୁରିମାନେ ଅଧିକ ସତର୍କ ଓ ସଚେତନ ଥିଲେ ଅନିୟମିତତାକୁ ଏଡ଼ାଇ ଦିଆଯାଇ ପାରିଥାନ୍ତା
‘ଚେକ୍ ଆଣ୍ଡ ବାଲାନ୍ସ’ ବ୍ୟବସ୍ଥା କଡ଼ାକଡ଼ି କାର୍ଯ୍ୟକାରୀ କରିବାକୁ ନିର୍ଦ୍ଦେଶ
ଆଗରୁ ମଧ୍ୟ ବିବାଦ ଘେରରେ ରହିଛି ରାଜ୍ୟ ଚଳଚିତ୍ର ପୁରସ୍କାର । ହାଇକୋର୍ଟଙ୍କ ରାୟ ଚଳଚିତ୍ର ପୁରସ୍କାର ଚୟନ କ୍ଷେତ୍ରରେ ହୋଇଥିବା ଅନିୟମିତତାକୁ ପଦାରେ ପକାଇ ଦେଇଛି ।